Zabur 49

21 verses

¹Zabur kawöm Korah. Keu peumimpén kor.

²Deungoe kheueh, hai sigala bansa, pasang kheueh geulinyueng hai peunduduek donya,

³bah kheueh nyan ureuëng seudeurhana, meunan cit ngon ureuëng nyang meugah raya, bah kheueh nyan ureuëng gasien, meunan cit keu ureuëng kaya.

⁴Ulôn teuma lôn meututoe ngon haba nyang bijaksana, pikeran ulôn lhok lumpah na.

⁵Ulôn teuma lôn simak pribasa, dan lôn peutrang makna jih sira lôn peumeuén keucapi.

⁶Ulôn hana teumakot watée ulôn ka jiseupet, watée ulôn jikeupong lé musoh nyang jeuhet.

⁷Awaknyan bandum jimeubangga ngon atra keukayaan, dan jipeusombong droe ngon atra jih nyang kaya.

⁸Nyang sikeubiet jih hana meusidroepi nyang hase jipeuseulamat syedara jih, atawa jibayeue yuem teutuboh syedara jih nyan ubak Po teu Allah.

⁹Peue mantong nyang jibri meuneujok jih nyan hana teuma séb; keubit that meuhái yuem teutuboh nyawöng syedara jih nyan,

¹⁰mangat jihnyan teupeusie nibak maté dan jeuet udeb siumu masa.

¹¹Hana, jihnyan teuma jingieng keudroe bahwa ureuëng bijaksana pih teuma binasa. Ureuëng bangai mandum binasa, dan jitinggai atra jih le keu ureuëng laén.

¹²Awaknyan teuma jitinggai lam jrat siumu masa; nyan kheueh teumpat tinggai awaknyan sampoe akhé masa, bah kheueh yoh watée ilée jihnyan luwah that tanoh.

¹³Manusia hana hase udeb sabe lam makmu; saban lagée beulatang, ureuëng nyan teuma binasa.

¹⁴Meunan kheueh naseb ureuëng nyang peubangga droe jih, dan watée ukeue ureuëng nyang puih ngon tutoe haba.

¹⁵Lagée bubiri, awaknyan ka teupeuteuntée keu maté; mawöt teuma jeuet keu ureuëng nyang rabe awaknyan. Ban seuboh buta awaknyan ka jipeutaloe lé ureuëng jujoe; tuboh awaknyan nyang gagah ka jeuet keubrok lam donya ureuëng maté, jiôh that nibak teumpat tinggai nyang mewáh.

¹⁶Teuma Po teu Allah geupeu lheueh ulôn, Gobnyan teuma geupeuleukang ulôn nibak keukuasaan mawöt.

¹⁷Bék teumakot meunyoe na sidroe ureuëng ka jeuet keukaya, dan hareuta jih meutamah le.

¹⁸Sabab watée ureuëng nyan maté hana sapeue pih nyang jiba, atra jih nyan hana jiba lam kubu meusajan droe.

¹⁹Meunan cit meunyoe na sidroe ureuëng nyang meu untông lam udeb jih, dan ji pujoe-pujoe sabab ureuëng nyan meuhase lam udeb nyoe,

²⁰ureuëng nyan pih jiseutôt indatu jih nyang ka awai di alam baka ubak teumpat nyang seupôt glab siumu masa.

²¹Manusia hana hase udeb sabe lam keuméwahan, saban lagée beulatang, jihnyan pih teuma maté.

← Previous All Books Next →