Zabur 54

¹Keu teupimpén kor. Deungon iréngan keucapi. Ca-e peungajaran Nabi Daud,

²bak watée ureuëng Zifi teuka jijak peugah ubak Saul, "Nabi Daud geumusöm di teumpat kamoe."

³Ya Allah, peuseulamat kheueh ulôn sabab kuasa Droeneueh, neubri kheueh keuadelan keu ulôn sabab teunaga Droeneueh.

⁴Deungoe kheueh nyang ulôn lakée, ya Allah, sudi kheueh neudeungoe tutoe haba lôn.

⁵Sabab ureuëng aséng jibeudôh jijak prang ulôn, ureuëng sombong jikeuneuk poh maté lôn, awaknyan hana jipakoe ubak Po teu Allah.

⁶Teuma Allah na kheueh nyang tulông lôn; TUHAN na kheueh nyang bila lôn.

⁷Gobnyan geuhuköm musoh lôn deungon keujeuhetan awaknyan keudroe, dan geupeubinasa awaknyan sabab Gobnyan seutia bak ulôn.

⁸Deungon rila até ulôn peuseumah keureubeuen keu Droeneueh, dan meusyukoe ubak Droeneueh sabab Droeneueh gét, ya TUHAN.

⁹Droneueh ka neupeulheueh ulôn nibak mandum nyang susah, dan lôn ngieng musoh lôn ka teupeutaloe.