Zabur 76

¹Keu teupimpén kor. Deungon iréngan keucapi. Zabur Asaf. Lagu.

²Po teu Allah meusyeuhu di Yehuda; Nan Gobnyan meusyeuhu ngon meugah di Israel.

³Yerusalem na kheueh teumpat tinggai Gobnyan; Bukét Sion teumpat tinggai Gobnyan.

⁴Disinan Gobnyan geupeuhanco banmandum alat prang, banmandum panah meukilat, peurisai dan peudeueng.

⁵Keubit that agong Droeneueh, dan ceumeurlang, leubeh nibak gunong-gunong purba kala.

⁶Ureuëng-ureuëng nyang beuhe ngon ceubeuh ka habéh geureupah; awaknyan teuéh dan hana jibeudôh le. Sipa-i-sipa-i nyang gagah peukasa ka gadôh teunaga jih.

⁷Banmandum guda dan ureuëng pasang ateueh guda nyan habéh rhot dan maté, deungon dumpék Droeneueh, ya Allah Nabi Yakub!

⁸Keubit luwa biasa Droeneueh! Meunyoe Droeneueh beungéh, soe nyang hase meuteun?

⁹Di langét neupeugah keuputosan Droeneueh; bumoe teumakot dan seungab.

¹⁰Watée Droneueh beudôh keuneuk neuhakém keu neupeuseulamat ureuëng nyang meudeurita di ateueh bumoe.

¹¹Ureuëng-ureuëng nyang paleng juah ngon jeuhet pih jipujoe Droeneueh, dan nyang mantong beungéh laju jijak cok ija krong tanda meukabong.

¹²Peutrok kheueh janji gata ubak TUHAN Allah gata, bah kheueh banmandum bansa nyang na tinggai rab jiba peuseumahan keu Po teu Allah nyang jitakot.

¹³Gobnyan nyang peupatah seumangat ureuëng mat kuasa; bubena raja jiteuka yo keu Gobnyan.