2 Korintiërs 6

¹En as medewerkers vermaan ons julle ook dat julle die genade van God nie tevergeefs mag ontvang nie.

²Want Hy sê: In die tyd van die welbehae het Ek jou verhoor, en in die dag van heil het Ek jou gehelp. Kyk, nou is dit die tyd van die welbehae; kyk, nou is die dag van heil.

³Ons lê nie die minste hindernis in die weg nie, sodat die bediening nie beklad mag word nie;

⁴maar in alles beveel ons ons aan as dienaars van God, met baie geduld, in verdrukkinge, in node, in benoudhede;

⁵in slae, in gevangenskappe, in oproere, in arbeid, in slapelose nagte, in hongerly;

⁶in reinheid, in kennis, in lankmoedigheid, in vriendelikheid, in die Heilige Gees, in ongeveinsde liefde;

⁷in die woord van waarheid, in die krag van God, deur die wapens van die geregtigheid in die regter— en linkerhand;

⁸deur eer en oneer, deur slegte en goeie gerug, as verleiers en tog waaragtig;

⁹as onbekendes en tog goed bekend, as sterwendes en kyk, ons lewe, as getugtig en tog nie gedood nie;

¹⁰as bedroefdes, maar altyd opgeruimd; as armes, maar wat baie ander ryk maak; as mense wat niks het nie en tog alles besit.

¹¹Ons mond het teenoor julle oopgegaan, Korinthiërs, ons hart het verruim geword.

¹²Nie in ons het julle dit te nou nie, maar in jul binneste het julle dit te nou.

¹³Maar by wyse van vergoeding—ek praat soos met kinders—moet julle ook verruim word.

¹⁴Moenie in dieselfde juk trek saam met ongelowiges nie, want watter deelgenootskap het die geregtigheid met die ongeregtigheid, en watter gemeenskap het die lig met die duisternis?

¹⁵En watter ooreenstemming het Christus met Bélial, of watter aandeel het die gelowige met die ongelowige?

¹⁶Of watter ooreenkoms het die tempel van God met die afgode? Want julle is die tempel van die lewende God, soos God gespreek het: Ek sal in hulle woon en onder hulle wandel, en Ek sal hulle God wees, en hulle sal vir My ‘n volk wees.

¹⁷Daarom, gaan onder hulle uit en sonder julle af, spreek die Here; en raak nie aan wat onrein is nie, en Ek sal julle aanneem;

¹⁸en Ek sal vir julle ‘n Vader wees, en julle sal vir My seuns en dogters wees, spreek die Here, die Almagtige.