Kolossense 4

¹Betoon reg en billikheid, here, aan julle diensknegte, omdat julle weet dat julle ook ‘n Here in die hemele het.

²Volhard in die gebed en waak daarin met danksegging;

³en bid tegelykertyd ook vir ons, dat God vir ons die deur van die woord mag open om te spreek van die verborgenheid van Christus, waarvoor ek ook in boeie is,

⁴dat ek dit openbaar kan maak soos ek dit behoort te spreek.

⁵Wandel in wysheid teenoor die wat buite is, en koop die tyd uit.

⁶Laat julle woord altyd aangenaam wees, met sout besprinkel, sodat julle kan weet hoe julle iedereen moet antwoord.

⁷Al my omstandighede sal Tíchikus, die geliefde broeder en getroue dienaar en mededienskneg in die Here, julle bekend maak.

⁸Ek het hom na julle gestuur juis hiervoor, om julle toestande te leer ken en julle harte te vertroos,

⁹saam met Onésimus, die getroue en geliefde broeder wat van julle mense is. Hulle sal julle alles bekend maak wat hier voorval.

¹⁰Aristárchus, my medegevangene, groet julle; en Markus, die neef van Bárnabas, oor wie julle bevele ontvang het—as hy by julle kom, ontvang hom—

¹¹ook Jesus wat Justus genoem word, manne wat uit die besnydenis is. Hulle alleen is my medewerkers vir die koninkryk van God en hulle was ‘n troos vir my.

¹²Épafras wat een van julle is, ‘n dienskneg van Christus, groet julle en stry altyd vir julle in die gebede, dat julle volmaak en volkome mag staan in die ganse wil van God.

¹³Want ek getuig van hom dat hy ‘n groot ywer het vir julle en vir die wat in Laodicéa en die wat in Hiërápolis is.

¹⁴Die geneesheer Lukas, die geliefde, en Demas groet julle.

¹⁵Groet die broeders in Laodicéa en Nimfas en die gemeente wat in sy huis is.

¹⁶En wanneer hierdie brief by julle gelees is, sorg dat dit ook in die gemeente van die Laodicense gelees word en dat julle ook dié uit Laodicéa lees.

¹⁷En sê aan Archíppus: Gee ag op die bediening wat jy ontvang het in die Here, dat jy dit vervul.

¹⁸Die groete van Paulus, met my eie hand. Dink aan my boeie. Die genade sy met julle! Amen.