Eksodus 40

¹Verder het die HERE met Moses gespreek en gesê:

²Op die dag van die eerste maand, op die eerste van die maand, moet jy die tabernakel van die tent van samekoms oprig.

³En jy moet daarin plaas die ark van die Getuienis en die ark met die voorhangsel bedek.

⁴Dan moet jy die tafel inbring en daarop regsit wat daarop behoort. Jy moet ook die kandelaar inbring en sy lampe opsteek.

⁵En jy moet die goue altaar vir die reukwerk voor die ark van die Getuienis neersit. Dan moet jy die bedekking van die ingang van die tabernakel ophang.

⁶Jy moet ook die brandofferaltaar voor die ingang van die tabernakel van die tent van samekoms neersit.

⁷En jy moet die waskom tussen die tent van samekoms en die altaar neersit en daar water in gooi.

⁸En maak die voorhof rondom, en hang die bedekking aan die poort van die voorhof op.

⁹Dan moet jy die salfolie neem, en jy moet die tabernakel salf en alles wat daarin is, en dit heilig met alles wat daarby behoort; en dit sal heilig wees.

¹⁰Jy moet ook die brandofferaltaar salf met al sy gereedskap, en jy moet die altaar heilig, en die altaar sal hoogheilig wees.

¹¹Salf dan die waskom en sy voetstuk, en heilig dit.

¹²Jy moet ook Aäron en sy seuns laat nader kom, na die ingang van die tent van samekoms toe, en jy moet hulle met water was.

¹³Trek Aäron dan die heilige klere aan; en salf hom en heilig hom, dat hy vir My die priesteramp kan bedien.

¹⁴Jy moet ook sy seuns laat nader kom en hulle die rokke aantrek.

¹⁵Salf hulle dan, soos jy hulle vader gesalf het, dat hulle vir My die priesteramp kan bedien. En hul salwing moet vir hulle ‘n ewige priesterskap in hulle geslagte wees.

¹⁶En Moses het gedoen net soos die HERE hom beveel het; so het hy gedoen.

¹⁷En in die eerste maand, in die tweede jaar, op die eerste van die maand, is die tabernakel opgerig.

¹⁸En Moses het die tabernakel opgerig: hy het sy voetstukke neergesit en sy style daarop gesit en sy dwarshoute vasgemaak en sy pilare opgerig.

¹⁹En hy het die tentseil oor die tabernakel gespan en die dekkleed van die tent daar bo-oor getrek, soos die HERE Moses beveel het.

²⁰Verder het hy die Getuienis geneem en dit in die ark neergelê en die draaghoute aan die kant van die ark ingesteek, en die versoendeksel het hy bo-op die ark gesit.

²¹Toe het hy die ark in die tabernakel gebring en die voorhangsel tot bedekking opgehang en die ark van die Getuienis bedek, soos die HERE Moses beveel het.

²²Hy het ook die tafel in die tent van samekoms neergesit, aan die kant van die tabernakel, teen die noorde, buitekant die voorhangsel.

²³En hy het die brood daarop gerangskik voor die aangesig van die HERE, soos die HERE Moses beveel het.

²⁴Hy het ook die kandelaar in die tent van samekoms gesit, teenoor die tafel, aan die suidekant van die tabernakel.

²⁵En hy het die lampe opgesteek, voor die aangesig van die HERE, soos die HERE Moses beveel het.

²⁶En hy het die goue altaar in die tent van samekoms neergesit, voor die voorhangsel,

²⁷en reukwerk van speserye daarop aan die brand gesteek, soos die HERE Moses beveel het.

²⁸Hy het ook die bedekking van die ingang van die tabernakel opgehang.

²⁹En hy het die brandofferaltaar by die ingang van die tabernakel van die tent van samekoms neergesit, en hy het daarop die brandoffer en die spysoffer gebring, soos die HERE Moses beveel het.

³⁰Hy het ook die waskom tussen die tent van samekoms en die altaar gesit, en hy het daar water in gegooi om mee te was.

³¹En Moses en Aäron en sy seuns het daaruit hulle hande en voete gewas.

³²As hulle ingaan in die tent van samekoms of nader kom na die altaar, het hulle hul elke keer gewas, soos die HERE Moses beveel het.

³³Hy het ook die voorhof opgerig, rondom die tabernakel en die altaar, en die bedekking vir die poort van die voorhof opgehang. So het Moses dan die werk voltooi.

³⁴Toe het die wolk die tent van samekoms oordek, en die heerlikheid van die HERE het die tabernakel vervul,

³⁵sodat Moses nie in die tent van samekoms kon ingaan nie, omdat die wolk daarop gerus en die heerlikheid van die HERE die tabernakel vervul het.

³⁶En as die wolk van die tabernakel af optrek, het die kinders van Israel elke keer weggetrek op al hulle togte;

³⁷maar as die wolk nie optrek nie, dan trek hulle nie weg nie, totdat dit weer optrek.

³⁸Want die wolk van die HERE was bedags op die tabernakel, en vuur was snags daarin, voor die oë van die hele huis van Israel, op al hulle togte.