Spreuke van Salomo 16

¹Die planne van die hart is van die mens, maar die antwoord van die tong kom van die HERE.

²Al die weë van ‘n man is suiwer in sy oë, maar die HERE toets die geeste.

³Laat jou werke aan die HERE oor, dan sal jou planne uitgevoer word.

⁴Alles het die HERE gemaak vir sy doel, ja, ook die goddelose vir die dag van onheil.

⁵Elke hoogmoedige van hart is vir die HERE ‘n gruwel; sekerlik, hy sal nie ongestraf bly nie.

⁶Deur liefde en trou word die skuld versoen, en deur die vrees van die HERE wyk ‘n mens af van die kwaad.

⁷As die HERE behae het in die weë van ‘n man, dan laat Hy selfs sy vyande met hom vrede hou.

⁸Liewer ‘n bietjie met geregtigheid, as ‘n menigte van inkomste met onreg.

⁹Die hart van die mens dink sy weg uit, maar die HERE rig sy voetstappe.

¹⁰Die beslissing is op die lippe van die koning; in die regspraak handel sy mond nie ontrou nie.

¹¹‘n Regte weegtoestel en weegskaal kom van die HERE, al die weegstene in die sak is sy werk.

¹²Dit is ‘n gruwel vir konings om goddeloosheid te doen, want deur geregtigheid word die troon bevestig.

¹³Die konings het behae in regverdige lippe, en hulle het hóm lief wat regte dinge spreek.

¹⁴Die grimmigheid van die koning is soos boodskappers van die dood, maar ‘n wyse man bring dit tot bedaring.

¹⁵In die vriendelike blik van die koning is lewe, en sy welgevalle is soos ‘n wolk van die laat reëns.

¹⁶Hoeveel beter is dit om wysheid te verkry as goud, en verkiesliker om verstand te verwerf as silwer.

¹⁷Die gemaakte pad van die opregtes is om van die kwaad af te wyk; hy wat op sy wandel ag gee, bewaar sy lewe.

¹⁸Trotsheid kom voor die verbreking, en hoogmoed kom voor die val.

¹⁹Dit is beter om nederig van gees te wees saam met die ootmoediges as om buit te verdeel met die trotsaards.

²⁰Wie ag gee op die Woord, sal die goeie vind; en hy wat op die HERE vertrou, is gelukkig.

²¹‘n Wyse van hart word verstandig genoem, en soetheid van lippe vermeerder die lering.

²²‘n Fontein van die lewe is die verstand vir sy besitter, maar die tugtiging van die sotte is sotheid.

²³Die hart van die wyse maak sy mond verstandig en vermeerder die lering op sy lippe.

²⁴Vriendelike woorde is soos ‘n heuningkoek: soet vir die siel en ‘n genesing vir die gebeente.

²⁵Daar is ‘n weg wat vir ‘n mens reg lyk, maar die einde daarvan is weë van die dood.

²⁶Die honger van die werksman arbei vir hom, want sy mond jaag hom aan.

²⁷‘n Deugniet grawe ‘n kuil van onheil, en op sy lippe is soos ‘n brandende vuur.

²⁸‘n Man van valse streke saai tweedrag, en ‘n kwaadstoker skei vriende van mekaar.

²⁹‘n Man van geweld verlei sy naaste en lei hom op ‘n weg wat nie goed is nie.

³⁰Hy wat sy oë toemaak om valsheid te bedink, wat sy lippe vasknyp, het die kwaad alreeds gedoen.

³¹Grysheid is ‘n sierlike kroon; dit word gevind op die weg van geregtigheid.

³²Die lankmoedige is beter as ‘n held; en hy wat sy gees beheers, as een wat ‘n stad inneem.

³³In die skoot word die lot gewerp, maar elke beslissing daarvan kom van die HERE.