Psalms 33

¹O Regverdiges, jubel in die HERE! ‘n Loflied betaam die opregtes.

²Loof die HERE met die siter; psalmsing tot sy eer met die tiensnarige harp.

³Sing tot sy eer ‘n nuwe lied; speel goed met trompetgeklank.

⁴Want die woord van die HERE is reg, en al sy werk is met trou.

⁵Hy het geregtigheid en reg lief; die aarde is vol van die goedertierenheid van die HERE.

⁶Deur die Woord van die HERE is die hemele gemaak en deur die Gees van sy mond hulle hele leër.

⁷Hy versamel die waters van die see soos ‘n hoop; Hy bêre die wêreldvloede weg in skatkamers.

⁸Laat die hele aarde vir die HERE vrees; laat al die bewoners van die wêreld vir Hom bedug wees;

⁹want Hy het gespreek, en dit was; Hy het gebied, en dit staan.

¹⁰Die HERE vernietig die raad van die nasies, Hy verydel die gedagtes van die volke.

¹¹Die raad van die HERE bestaan vir ewig, die gedagtes van sy hart van geslag tot geslag.

¹²Welgeluksalig is die nasie wie se God die HERE is, die volk wat Hy vir Hom as erfdeel uitgekies het.

¹³Die HERE kyk van die hemel af; Hy sien al die mensekinders.

¹⁴Uit sy woonplek aanskou Hy al die bewoners van die aarde,

¹⁵Hy wat die hart van hulle almal formeer, wat let op al hul werke.

¹⁶‘n Koning word nie verlos deur ‘n groot leër, ‘n held nie gered deur groot krag nie.

¹⁷Die perd help niks vir die oorwinning en red nie deur sy groot krag nie.

¹⁸Kyk, die oog van die HERE is op die wat Hom vrees, op die wat op sy goedertierenheid wag;

¹⁹om hulle siel te red van die dood en hulle in die lewe te hou in hongersnood.

²⁰Ons siel wag op die HERE; Hy is ons hulp en ons skild;

²¹want ons hart is bly in Hom, omdat ons op sy heilige Naam vertrou.

²²Laat u goedertierenheid, HERE, oor ons wees net soos ons op U wag!