Psalms 59

¹Red my van my vyande, o my God! Beskerm my teen my teëstanders!

²(59:3) Red my van die werkers van ongeregtigheid, en verlos my van die manne van bloed!

³(59:4) Want kyk, hulle lê en loer op my lewe; sterkes val my aan, sonder oortreding en sonder sonde van my kant, o HERE!

⁴(59:5) Buiten my skuld hardloop hulle en maak hulle klaar. Ontwaak, my tegemoet, en kyk!

⁵(59:6) Ja U, HERE, God van die leërskare, God van Israel, word wakker om oor al die heidene besoeking te doen; wees al die ongeregtige trouelose nie genadig nie! Sela.

⁶(59:7) Elke aand kom hulle terug; hulle huil soos honde en dwaal deur die stad.

⁷(59:8) Kyk, hulle smaal met hul mond; swaarde is op hulle lippe, want—wie sou dit hoor?

⁸(59:9) Maar U, o HERE, lag oor hulle; U spot met al die heidene.

⁹(59:10) My Sterkte, op U wil ek wag, want God is my rotsvesting.

¹⁰(59:11) My genadige God sal my tegemoetkom; God sal my op my vyande laat neersien.

¹¹(59:12) Moet hulle nie ombring nie, sodat my volk dit nie vergeet nie: laat hulle rondswerwe deur u krag, en werp hulle neer, o Here, ons Skild!

¹²(59:13) Sonde van hulle mond is die woord van hulle lippe; laat hulle dan gevang word in hul trots, en vanweë die vloek en die leuen wat hulle vertel.

¹³(59:14) Vernietig hulle in grimmigheid, vernietig hulle, sodat hulle daar nie meer is nie; en laat hulle weet dat God heers in Jakob, tot by die eindes van die aarde! Sela.

¹⁴(59:15) En elke aand kom hulle terug; hulle huil soos honde en dwaal deur die stad.

¹⁵(59:16) Húlle swerwe rond om voedsel te soek; as hulle nie versadig word nie, vertoef hulle die hele nag.

¹⁶(59:17) Maar ék sal sing van u sterkte en elke môre jubel oor u goedertierenheid, want U was ‘n rotsvesting vir my en ‘n toevlug in die dag toe ek benoud was.

¹⁷(59:18) My Sterkte, tot u eer wil ek psalmsing, want God is my rotsvesting, my genadige God.