መዝሙረ ዳዊት 48

¹እግዚአብሔር ትልቅ ነው፤ በአምላካችን ከተማ በተቀደሰ ተራራ ምስጋናው ብዙ ነው።

²በሰሜን ወገን በመልካም ስፍራ የቆመ የምድር ሁሉ ደስታ የጽዮን ተራራ ነው፤ እርሱም የትልቁ ንጉሥ ከተማ ነው።

³እግዚአብሔር በአዳራሾችዋ መጠጊያ ሆኖ ይታወቃል።

⁴እነሆ፥ ነገሥታት ተከማችተው በአንድነት መጥተዋል።

⁵እነርሱስ አይተው ተደነቁ፥ ደነገጡ፥ ታወኩ።

⁶መንቀጥቀጥ እንደ ወላድ ምጥ በዚያ ያዛቸው።

⁷በኃይለኛ ነፋስ የተርሴስን መርከቦች ትሰብራለህ።

⁸እንደ ሰማን እንዲሁ አየን በሠራዊት ጌታ ከተማ፥ በአምላካችን ከተማ፤ እግዚአብሔር ለዘላለም ያጸናታል።

⁹አምላክ ሆይ፥ በሕዝብህ መካከል ምሕረትህን ተቀበልን።

¹⁰አምላክ ሆይ፥ እንደ ስምህ እንዲሁም እስከ ምድር ዳርቻ ድረስ ምስጋናህ ነው፤ ቀኝህ ጽድቅን የተሞላች ናት።

¹¹አቤቱ፥ ስለ ፍርድህ የጽዮን ተራራ ደስ ይበለው፥ የአይሁድም ሴት ልጆች ሐሤት ያድርጉ።

¹²ጽዮንን ክበቡአት፥ በዙሪያዋም ተመላለሱ፥ ግንቦችዋንም ቍጠሩ፤

¹³በብርታትዋ ልባችሁን አኑሩ፤ አዳራሽዋን አስቡ፤ ለሚመጣው ትውልድ ትነግሩ ዘንድ።

¹⁴ለዓለምና ለዘላለም ይህ አምላካችን ነው፥ እርሱም ለዘላለም ይመራናል።