[13] 1 Veigauna 5

¹Sai iratou oqo na luve i Rupeni tagane na ulumatua i Isireli ” o koya dina na ulumatua, ia me vaka ni a vakadukadukalitaka nai davodavoi tamana, sa soli kina nai tutu vakaulumatua vei rau na luve i Joseva, na luve i Isireli tagane, sa mani sega kina volai na kawa me vaka na veitaravi ni nodra sucu;

²Ia sa gumatua vei ira na tacina o Juta, ka sa lako mai vei koya e dua na tui, e dina ga ni sa nei Joseva nai tutu vakaulumatua”

³O iratou na luve i Rupeni tagane na ulumatua i Isireli o Anoke, Palu, Esironi, kei Karimi.

⁴Na luve i Joeli tagane o Semaia, Koki, Simei,

⁵Maika, Reaia, Peali,

⁶kei Biera, o koya ka kauta vakavesu o Tikilaci- Pileseri na tui Asiria. O koya na nodra i liuliu na luve i Rupeni.

⁷Kei ira na luvena ena nodra dui vuvale, ni sa volai nai tukutuku ni nodra kawa: sa turaga o Jieli, kei Sakaraia,

⁸kei Bela na luve i Asasi tagane, na luve i Sema tagane, na luve i Joeli tagane, o koya ka tiko mai Aroeri, me yaco sara ki Nepo kei Peali-Meoni.

⁹Era sa tiko mai na tokalau e na matamata vaka ki na veikau ena yasana oqo ni uciwai na Uferetisi, baleta ni sa vakaikuritaki tikoga na levu ni nodra bulumakau e na vanua o Kiliati.

¹⁰Ia oqo ena gauna i Saula era a vala kei ira na Akiraiti, o ira era sa mate e ligadra; ka ra sa tiko e na nodra veivale laca e na vanua taucoko mai na tokalau ni vanua o Kiliati.

¹¹O ira na vuvale i Kata era vakaitikotiko volekati ira e na vanua o Pasani vaka ki Salika:

¹²O Joeli sa turaga, o Safaimi e tarava, ka tarava yani o Jeanai kei Safati mai Pasani,

¹³kei ira na tacidra ena vale i tamadra: O Maikali, Mesulame, Seva, Jorai, Jakani, Sia, kei Ebari ” e lewe vitu taucoko.

¹⁴O ira oqo na luve i Apieli na luve i Ura tagane, na luve i Jaroa tagane, na luve i Kiliati tagane, na luve i Maikali tagane, na luve i Jesisai tagane, na luve i Jado tagane, na luve i Busa tagane;

¹⁵O Ai na luve i Apetieli tagane, na luve i Kuni, sa turaga vei ira na lewe ni vale i tamana.

¹⁶Ka ra sa tiko mai Kiliati, mai Pasanikei na kena veikoro o ira na kawa i Kata, kei na veivanua rawarawa mai Saroni e na loma ni kenai yalayala.

¹⁷O ira kece oqo era sa volai e nai vola ni kawa e na gauna i Jocame na tui Juta, kei na gauna i Jeropoama na tui Isireli.

¹⁸O ira na luve i Rupeni, na luve i Kata, ka veimama na kawa i Manasa e vasagavulu kava na udolu, vitu na drau, onosagavulu na tamatai valu qaqa, o ira era taura rawa na nodra i seleiwau kei nai sasabai, era vanataka rawa na dakai-titi, era kena dau e nai valu, era lako ki nai valu.

¹⁹Era sa vala vata kei ira na Akiraiti, na Jeturi, Nafisi, kei na Nodabi.

²⁰Ia era sa vukei e na nodra vala kei ira, ka ra soli na Akiraiti ki na ligadra, kei ira kecega era sa tiko vata tukuna, ni ra tagi vua na Kalou ena gauna ni veivala. Sa rogoca na nodra masu o Koya, baleta ni ra sa vakararavi Vua.

²¹Era sa qai kauta tani na nodra manumanu ” e limasagavulu na udolu na Kameli, rua na drau limasagavulu na udolu na sipi, rua na udolu na asa ” kei na dua na drau na udolu talega na nodra tamata i valu;

²²e lewe levu era mate, baleta nai valu e Nona na Kalou. Ka ra sa tiko ga e na vale me yacova na veivakabobulataki.

²³O ira na luvedra e veimama ni yavusa i Manasa era sa tiko e na vanua. Sa tubu na kedra i wiliwili me tekivu mai Pasani me yaco ki Peali- Erimoni, o ya mai Senira, se na ulu-ni-vanua o Erimoni.

²⁴Oqo o ira nai liuliu ena veivale i tamadra: Eferi, Isi, Elieli, Asirieli, Jeremaia, Odavia, kei Jadieli. Era sa tamata qaqa ni valu, tamata rogo, ka ulu ni veivale i tamadra.

²⁵Ia era sa sega ni dina vua na nodra Kalou na tamadra, ka ra sa cakava nai valavala ni yalewa ca vei ira na nodra kalou na tamata ni vanua o ya, o koya ka vakarusa oti e matadra na Kalou.

²⁶Ia na Kalou sa qai vakauqeta na yaloi Puli na tui Asiria, o ya o Tikelaci-Pileseri na tui Asiria. Sa kauti ira na luve i Rupeni, na luve i Kata, kei na veimama ni yavusa i Manasa mera bula. Sa kauti ira ki Aleli, Apora, Ara, kei na uciwai mai Kosani me yacova na siga oqo.