[46] 1 Koronica 4

¹Mo dou raici keitou mai, ni o keitou e dua ga na liga ni cakacaka, ka i talatala ena vuku i Karisito me baleta na ka vuni ni Kalou.

²Sa ka bibi kina vua e dua sai talatala me dau tukuna na ka dodonu kei na nona bulataka na dina.

³E sega ni dua na ka vei au nomudou nanuma kei na nodra nanuma tale eso me baleti au, baleta ni o au mada ga vakataki au, au kila ni levu sara na vanua au luluqa kina.

⁴E sega sara ga ni dua na cala au kila me rawa ni'u beitaki au kina; baleta na Kalou ga ena lewai au ena ka kece au cakava.

⁵O koya oqo, mo dou se kakua mada ni kalasitaka na tamata, dou waraka na lesu mai ni turaga, ena qai vakacilavi na nona rarama me vakavotui cake kina, na veika butobuto ka vunitaki tu ena yalo ni tamata. Eda na qai raica kina nai naki dina ni noda cakacaka vua na turaga, me na qai soli kina na ka e dodonu meda vakavinavinakataki kina.

⁶O ya na vuna veiwekani, au vakayagataka kina na yacaqu kei na yaca i Apolosa vei kemudou, ena noqu via vakaraitaka tiko me kua na bula ni veitovaki, me kua ni dua mo dou raica cake, me kua ni dua mo dou raica sobu.

⁷O cei e vakayacori iko mo duatani duadua mai vei ira tale eso? E dua na ka e dodonu me tiko vei iko ka sega ni tiko vei iko? Ni ka kece oqori vei iko sa solia taucoko na Kalou, mo kakua ni vakacerecerei iko me vaka ni o iko ga o cakava.

⁸Kemudou sa vakasinaiti oti tu! Dou sa vakavutuniyautaki oti tu! Sa tu oqori vei kemudou na kaukauwa vakatui ka sega vei keitou! Au sa nuitaka ni dou na dabeca tikoga nai tutu vakatui, me yacova na siga o ya nidatou na qai laki lewa vata!

⁹Au kila ni Kalou e biuti keitou sara ena boto ni tuitui mei Apositolo, me vaka e dua na tamata sa tau vua nai totogi mate, me qai kau wavoki i vuravura mera vakasaravi koya na tamata kei ira na agilosi.

¹⁰Keitou na lialia ena vuku i Karisito, ia oi kemudou dou sa mai vuku ena vuku i Karisito! Keitou sa mai malumalumu, ia oi kemudou sa kaukauwa! Oi kemudou sa mai vakaturagataki, ia Oi keitou sa mai vakaisitaki!

¹¹Me yacova mai oqo keitou sa walolokai ka karamaca, ka sega nai sulu me keitou veisau kina, keitou mokulaki wavoki tu ga ka sega na vale me keitou bau toka kina.

¹²Keitou sa cakacaka sara ga vakaukauwa ena liga i keitou me keitou bau kana kina, keitou vosa vakalouvinakataki ira sa vosa ruru vei keitou, ni keitou sa vakacacani sara vakalevu keitou sa vosoti ira ga;

¹³Keitou sauma na veika ca kece e vakayacori vei keitou ena caka vinaka, me yacova mai oqo keitou sa vaka tuga e dua na taga ni butubutu vei ira na tamata.

¹⁴Au sega ni vola yani oqo me'u vakamadualaki kemudou kina, ia au via vakasalataki kemudou ga yani ni o kemudou na noqu ka lomani.

¹⁵E dina ni rawa me ra lewe tini na udolu na tamata mera vakavulici karisito vei kemudou, mo dou nanuma vinaka ga, ena dua ga na tamamudou oqori ga o au, ni o au ga au kauta mai vei kemudou nai tukutuku vinaka.

¹⁶O koya oqo au sa vakamasuti kemudou kina, mo dou vakadadamuri au ena ka au cakava.

¹⁷Oqo sara ga na vuna au talai Timoci yani kina vei kemudou, o koya e dua dau yalodina vua na turaga ka noqu gone ni toko, ena laki vakananumi kemudou o koya ena noqui valavala vei Karisito, me vaka na ka au dau vakatavulica ena veivanua kecega ena veisoqosoqo lotu kecega.

¹⁸Au kila ni so vei kemudou ena viavialevu ni nanuma au sa rere ni'u lako yani vei kemudou me'u walia na leqa oqo.

¹⁹Ia au na lako yani ena dua na gauna lekaleka mai oqo, kevaka sa lewa ni Kalou, me'u na laki raica sara kina na kaukauwa ni gusumudou, se dou vosa tiko ena kaukauwa ni Kalou.

²⁰Ni sa sega ni kani vosa walega na matanitu ni Kalou, sa ka ga ni kaukauwa.

²¹Cava dou vinakata? Me'u lako yani vei kemudou ni'u sa taura na kuita, se me'u lako ena loloma, kei na yalomalua?