[46] 1 Koronica 7

¹Na taro dou a tarogi au tiko yani kina ena nomudou i vola: Me'u tukuna vei kemudou, na tagane me kua ni tara e dua na yalewa.

²Ia me vaka nai valavala ca ni veibutakoci, e na daumaka ga me sa vakawati na tagane kei na yalewa me dua talega na watina.

³Me cakava kina na ka dodonu me vaka nai vakarau dina ni veiwatini na tagane vua na watina, ka vaka talega kina na yalewa vua na watina.

⁴Ni sa vakawati na yalewa sa sega ni qai tu vua na kaukauwa me veitalitaka na yagona, na kena lewa sa tu vua na watina tagane. Sa vaka talega kina na tagane sa sega ni qai tu vua na kaukauwa me vakaveitaliataka na yagona, ni sa lewa tu na watina.

⁵Kua ni sogoti iko mai vua na watimu, me tikoga nomudrau veidinadinati ena vuku ni lolo kei na masu, mo drau tiko vata tale me tarovi kina nona veitemaki o Setani, ena vuku ni dau tarovi vakadredre na tikovata.

⁶Oqo nai vakasala ga ka sega ni vakaro.

⁷Au diva moni vakataki au ia eda sega ni tautauvata kece, ni duidui nai solisoli e soli vei keda, eso me vakataki au.

⁸Ia vei kemuni na sega tu ni vakawati kei kemuni na yada: ena uasivi vei kemuni mo ni tikoga me vakataki au.

⁹Ia kevaka era sa sega ni tarovi ira rawa, sa vinaka cake ga mera vakawati, ni sa vinaka mera vakawati ka sa qai ca sara, na garogaro lo se na wainidiva tu ga.

¹⁰Oqo vei kemuni na vakawati au sa vakaroti kemuni, sega ni o au, ia mai vua na turaga: Na yalewa me kakua ni biuta na watina.

¹¹Ia kevaka me sa lako me kakua ni laki vakawati, me tatau vinaka me vakavinakataki kina nodrau veiwekani. Na tagane me kakua ni sereka nai vesu ni vakamau vua na watina.

¹²Ia vei ira tale eso, sega ni tukuna na turaga, oi au ga, e vaka oqo, kevaka e dua na tuakada e lotu tiko ka sega ni lotu tiko na watina, ka sa lomasoli tu na watina me rau bula vata, me kakua ni biuta o koya na watina.

¹³Kevaka e dua na yalewa me sega ni lotu na watina, ka sa lomasoli na watina me rau bula vata, me kakua ni biuti watina o koya.

¹⁴Na yalewa e vakasavasavataka na watina sega ni lotu, kei koya na yalewa sega ni lotu e vakasavasavataki mai vua na watina; ke sega era na sega ni savasava na luvemudou, ia oqo era sa savasava tu.

¹⁵Ia kevaka me sa lako o koya na sega ni lotu, laivi koya me lako; vei keda sa lotu na tagane kei ne yalewa, meda kakua ni vesuki tiko kina bula vaka oqo. Ia sa kacivi keda na Kalou meda loma vakacegu.

¹⁶Ena rawa vakacava mo kila, o iko na yalewa, na watimu mona vakabulai koya tale? Se o iko na tagane, ena rawa vakacava mo kila, na watimu mo vakabulai koya tale?

¹⁷Ia na Kalou sa vota vei ira yadua, me vaka nona kaciva na tamata yadua na turaga, mera bula vaka kina, oqo na lewa au sa vinakata me muria na veisoqosoqo lotu kece.

¹⁸E dua sa kacivi ni sa cilivi? Me kakua tale ni qai sega cili. E dua sa kacivi ni sega cili? Me kakua tale ni qai cilivi.

¹⁹Na cili kei na sega cili e sega sara ga ni dua na kena yaga, ia na kena maroroi ga nai vakaro ni Kalou oqori e ka bibi.

²⁰Me tikoga na tamata yadua ena ka e kacivi kina me vaka nona kacivi.

²¹Dou a sega beka ni kacivi ni dou a bobula tu? Kua ni dou via lomaleqataka; ia ni dou sa mai vagalalataki, dou bulataka na kena bula.

²²Ni o koya sa kacivi mai vua na turaga ni a bobula tu, sa tamata sereki ni turaga, ka tautauvata ni sa kacivi me tamata sereki sa nona bobula na turaga.

²³Ni dou sa voli ena dua nai sau levu, mo dou kakua ni bobula vei ira na tamata.

²⁴Na veiwekani, me tiko na tamata yadua kei na Kalou, ena i tutu sa tiko kina ni sa kacivi. Vei Ira Na Dawai Kei Na Yada

²⁵Me baleti ira na sega ni vakawati: E sega ni dua nai vakaro mai vua na turaga e tiko vei au; Ia me vaka na loloma ni turaga vei au kei na nona veivakabauti, au na tukuna kina noqui vakasala.

²⁶Au nanuma ni rairai daumaka cake na tagane me sa bula tu mada ga vakaoqori, ena vuku ni leqaleqa eda dau sota e veisiga.

²⁷E dua na yalewa drau sa veiwatini? Kakua ni o via veisere. E sega ni dua na yalewa drau veiwatini tiko? Kakua ni vakasaqara tale e dua na yalewa me watimu.

²⁸Ia kevaka o sa vakawati, o sa qai sega ni valavala ca; kevaka me sa vakawati e dua na goneyalewa, e sa na sega ni valavala ca. Ni vakawati ena levu na dredre ena sotavi kina, au sega ni vinakata me'u tukuna rawa oqo vei kemudou.

²⁹Ia oqo au tukuna vei kemudou na veiwekani, sa lekaleka sara na gauna, vei kemudou sa vakawati mo dou kakua ni vakadredretaki kemudou, mo dou vakarawarawataki kemudou tiko.

³⁰O ira sa tagi mera vakataki ira na sega ni tagi, o ira sa reki mera vakataki ira na sega ni reki, o ira sa volivoli me vaka ga e dua e sega ni dua na ka e tu vua.

³¹Kei ira na rui ogaogataka na ka ni vuravura oqo mera rawata taucoko. Na vuravura sara ga oqo ena vakarusai laivi.

³²Ia au vinakati kemudou me kakua soti ni dou lomaocaoca. O koya e sega ni vakawati sa dua na ka nona qarauna na cakacaka ni turaga, ena nona tovolea tiko me cakava na loma ni turaga.

³³Ia na tagane vakawati sa rui kauwaitaka vakalevu na ogaoga vakavuravura “ ena qai rawa vakacava vua me vakalomavinakataka na watina yalewa.

³⁴E tiko e dua na duidui vua na yalewa sa vakawati kei na dua se goneyalewa. O koya e sega ni vakawati e dau kauwaitaka vakalevu na cakacaka ni turaga, me rawa kina ni savasava tu na yagona kei na yalona. Ia o koya sa vakawati e rui kauwai tu ga vakalevu ena vei ogaoga vakavuravura “ ena rawa vakacava vua me vakalomavinakataka na watina tagane.

³⁵Ia au tukuna oqo mo dou vinaka kina, sega ni dou ca kina me'u via tarovi kemudou, ia au via vaqaqacotaka tikoga nomudou qarava na turaga me dei ka kaukauwa ni tu nai tatao eso.

³⁶Ia kevaka e dua na tagane sa sega ni tarovi koya rawa tiko ni sa via vakawatitaka e dua na goneyalewa, sa ganiti koya vinaka ga mesa vakawati, me sa kua tale ni tarovi sa soli sara ga vua na ka sa gadreva. E sega ni dua na kena valavala ca; me rau sa vakamau ga.

³⁷Kevaka e dua me sa vakadeitaka ni sa lewa oti tu e lomana ni na sega ni vakawati, ena uasivi nona cakacaka.

³⁸Ena vaka oqo, o koya sa vakawati ena vinaka nona cakacaka, ia o koya sa sega ni vakawati ena vinaka cake sara na nona cakacaka.

³⁹Na yalewa vakawati ena vauci koya tu na lawa ena gauna taucoko e bula tiko kina na watina; ia kevaka sa na mate na watina, sa tu vua na galala me vakawatitaka tale e dua sa vinakata o koya, me qarava na turaga.

⁴⁰Ia kevaka me'u lewa ena noqu rai, ena vinaka cake me bula tuga vaka o ya, ni levu na gauna ena mamarau tu ga kina “ ena vakasama o ya, e solia duadua vei au na yalo ni Kalou.