[11] 1 Tui 22

¹Sa oti e tolu na yabaki ena kena sega ni yaco tiko na i valu vei rau o Siria kei Isireli.

²Sa qai yaco ena i ka tolu ni yabaki, o Josevata na tui Juta sa lako sobu me sikovi tui Isireli.

³Sa tukuna na tui Isireli vei ira na nona tamata, "O ni sa kila beka ni o Ramoci e Kiliati e noda, ka eda sa vinakata tiko meda kauta tani mai vei tui Siria?"

⁴Ka sa qai tukuna vei Josevata, "E rawa ni o lako vata kei au me vala e Ramoci “ Kiliati?" Sa sauma yani o Josevata vei tui Isireli, "Oi, au sa vakataki iko ga, kei ira na noqu tamata me vakataki ira ga na nomu tamata, na noqu me nomu ose."

⁵Sa tukuna o Josevata vei tui Isireli, "Au kerea mo vakataroga na vosa i Jiova ena siga oqo."

⁶Sa qai vakasoqoni ira mai na parofita o tui Isireli, era lewe va na drau na parofita ka tukuna vei ira, "Me'u lako cake beka ki Ramoci-Kiliati ka vala, se me kua?" Era sa tukuna mai, "Mo lako cake ni o Jiova ena solia ki na ligana na tui."

⁷Sa tukuna o Josevata, "E dua tale beka na parofita e sega ni tiko oqo “ me rawa ni da tarogi koya talega?"

⁸Sa sauma yani na tui Isireli vei Josevata, "E dua tale e tiko oqo, o Maikaia na luvei Imala e rawa talega ni da tarogi Jiova mai vua: ia, au sa dau cati koya baleta ni sa dau sega ni tukuna na veika vinaka baleti au “ na ka ca ga." Sa tukuna yani o Josevata, "Me kua ni tukuna oqori na tui!"

⁹Sa kacivi ira mai na nona tamata na tui Isireli ka tukuna, "Me lako mai vakatotolo o Maikaia na luvei Imala!"

¹⁰O tui Isireli kei Josevata na tui Juta ni rau sa tokara na nodrau i ubi vakatui ka dabe ena i tikotiko vakaturaga ena vanua ni butu sila, ena i curucuru ni matamata mai Samaria. Era sa parofisai kece na parofita e matadrau.

¹¹O Setekaia na luvei Kenana, sa cakava e so na davui kaukamea me nona ga, ka sa vosa mai vaka oqo, "Sa tukuna vaka oqo o Jiova, 'Ena ka oqo (davui kaukamea), dou na suasuaraki ira kina na kai Siria me yacova ni ra sa vakarusai kece.'"

¹²Era sa parofisai kece vaka kina na parofita ka vaka: "Lako cake ki Ramoci Kiliati, ka vakayaco ka, ni na solia o Jiova ki vua na tui e ligana."

¹³O koya nai talaki me kacivi Maikaia mai, sa tukuna vei Maikaia ka vaka: "Mo rogoca oqo, na nodra vosa kece na parofita sa duavata me vakauqeta na tui. Me vakatalega kina na nomu vosa, me veivakauqeti."

¹⁴Sa tukuna o Maikaia, "Me vaka sa bula o Jiova “ na veika ena tukuna vei au, au na vosataka."

¹⁵Sa yaco mai o Maikaia vua na tui, ka sa tarogi koya na tui, "Maikaia, me da lako cake beka ki Ramoci-Kiliati ka vala, se me kua?" Sa sauma mai, "Mo lako cake ka mo vakayaco ka, o Jiova e na solia ki na ligana na tui!"

¹⁶Sa tukuna vua na tui, "Me vaka vica soti na noqu cakava mo yalataka, mo kua ni tukuna vei au e dua na ka, ia, me ka dina ga ena yaca i Jiova?"

¹⁷Sa tukuna tale o Maikaia, "Au sa raica ni ra sa kabuwacara tu na Isireli ena ulunivanua me vaka na sipi sa sega tu na kena i vakatawa. Sa qai tukuna o Jiova, 'O ira oqo sa sega tu na nodra i vakatawa. Me ra dui lesu ki nona vale ena vakacegu. '"

¹⁸Sa tukuna na tui Isireli vei Josevata, "E sega beka ni'u a tukuna vei iko, ni na sega ni parofisaitaka na veika vinaka me baleti au, na ka ca ga?"

¹⁹Sa tukuna mai o Maikaia, "Mo rogoca na vosa i Jiova, au sa raici Jiova ni dabe tiko ena i tikotiko vakaturaga kei ira kece na kai lomalagi era sa tu e yasana, ena yasana i matau kei na yasana i mawi.

²⁰"Sa qai tukuna o Jiova, 'O cei ena vakauqeti Eapi me lako cake, ni na vakadrukai mai Ramoci- Kiliati?' E dua sa tukuna oqo, ka dua sa tukuna o ya.

²¹"Sa lako mai e dua na yalo ka tu ena mata i Jiova, ka tukuna mai, 'Au na lako ka vakauqeti koya.'

²²"Sa tarogi koya o Jiova, 'O na cakava vakacava?' Sa tukuna mai na yalo, 'Au na lako yani ka yalo lasulasu ena gusudra na nona parofita.' Sa tukuna mai o Jiova, 'Mo lako ka vakauqeti koya, ena yaco. Mo lako ka cakava sara.'

²³"Oqo, raica, o Jiova sa biuta na yalo daulasulasu ena gusudra na nomu parofita kece oqo, ka sa vakaraitaka mai vei iko na leqa levu."

²⁴Sa lako yani o Setekaia na luvei Kenana vei Maikaia ka vacuka na galegalena ka tukuna. "Sa lako mai vakacava na yalo mai vei Jiova, ena nona lako mai vei au me vosa vei iko?"

²⁵Sa sauma yani o Maikaia, " O na raica vakaidina ena siga o na curu kina ki na nomu loqi mo vuni kina!"

²⁶Sa tukuna na tui Isireli, "Tauri Maikaia ka vakalesui koya vei Amoni na Kovana ni koro kei Joasi na luve ni tui;

²⁷"Ka tukuna, 'Sa lewa na tui Isireli: "Me biu na tamata oqo ki valeniveivesu ka vakani koya ena madrai ni veivakararawataki, me yacova ni'u sa lako mai ena vakacegu."'"

²⁸Sa sauma yani o Maikaia, "Kevaka o sa lesu tale mai ena vakacegu, mo kila ni sa sega ni vosa vei au o Jiova." Sa vakuria tale, "Mo ni qaqarauni, oi kemuni kecega!"

²⁹E rau sa lako cake ki Ramoci-Kiliati o Eapi na tui Isireli kei Josevata na tui Juta.

³⁰Sa tukuna o tui Isireli vei Josevata, "Au na lako vakalecaleca ki nai valu, o iko ga mo dara na nomu i oro vaka tui." Sa vakaisulu vakalecaleca yani o tui Isireli ka lako ki nai valu.

³¹O tui Siria sa vakaroti ira oti e tolusagavulu karua na nona turaga ni valu ni qiqi vakaivalu ka vaka: "Mo kua ni valuta e dua e lailai se levu sara, me valuti ga o tui Isireli."

³²Ni ra sa raici Josevata na turaga ni valu, era sa tukuna, "Oqo sara ga na tui Isireli!" Era sa vuki yani ka vala kei Josevata, sa kaci yani o Josevata.

³³Sa qai yaco, ni ra sa rai yani na turaga ni valu ka kila ni sa sega ni tui Isireli o koya oqo, era sa vuki tani mai vua.

³⁴Sa dua na tamata sa vanataka tu ga vakaveitalia na nona dakai titi, ka sa la'ki coba sara na gasau ena i sema ni sasabai nei Tui Isireli. Sa qai tukuna vua sa cicivaka tiko na qiqi ni valu, "Vakagolea lesu na qiqi ka kauti au tani mai nai valu, ni'u sa mavoa tiko."

³⁵Sa kaukauwa cake tikoga nai valu ena siga o ya, ka sa vakaduri cake tikoga na tui, ena nona qiqi, ni tadravi ira tiko yani na kai Siria. Sa mate ena yakavi o ya, ni sa maca na nona dra ena vuku ni mavoa.

³⁶Ni sa kala na matanisiga, sa rorogo e dua na domo mai nai valu ka vaka: "Na tamata vakayadua ki na nona koro, na tamata vakayadua ki na nona vanua!"

³⁷Sa mate na tui, ka sa kau mai ki Samaria. Era sa buluta na tui e Samaria.

³⁸E dua sa mai savata na qiqi e Samaria ka era sa dramica na dra na koli, ena gauna sa sava tiko kina na qiqi, me vaka ga na vosa i Jiova, e a vosataka ga o Jiova.

³⁹Na vo ni veika sa cakava o Eapi kei na veika kece e caka kei na veivale e tara ena lase, kei na veikoro, era sa sega beka ni volai ena i vola tukutuku ni veigauna nodra na tui Isireli?

⁴⁰Sa vakacegu vata kei ira na tamadra o Eapi. Sa veiliutaki ena vukuna o Easaia na luvena.

⁴¹O Josevata na luvei Esa sa tui e Juta e na i ka va ni yabaki nei Eapi na tui Isireli.

⁴²E sa yabaki tolusagavulu ka lima o Josevata ena gauna sa tui kina. Ka sa lewa tiko me ruasagavulu ka lima na yabaki mai Jerusalemi. Na tinana o Asuba na luvei Sili.

⁴³Sa muria nai valavala kecega i tamana o Esa. Sa sega ni lako tani mai kina, ni sa cakava na veika dodonu ena mata i Jiova. E dina ga ni sega ni basuka na veitikina cecere “ ni ra se vakacaboi soro tikoga ka vakama na ka boi vinaka ena veitikina cecere.

⁴⁴O Josevata talega sa cakava na veiwekani vinaka kei tui Isireli.

⁴⁵Na kena vo ni veika sa cakava o Josevata, na qaqa e vakaraitaka kei nai valavala ni kaba vakaivalu, era sa sega beka ni volai ena i vola tukutuku ni veigauna nodra na tui Juta?

⁴⁶O ira na kena vo ni tamata ca era sa bula mai na gauna nei Esa “ sa vakarusai ira mai na vanua.

⁴⁷Sa sega na tui e Itomi “ sa dua tiko ga kina na nona i vukevuke na tui.

⁴⁸Sa cakava o Josevata e so na waqa ni veivoli me dau lako ki Ofira me kau koula mai; ia, era sa sega ni soko rawa ni ra voca kece tu ga e Esioni Keba.

⁴⁹O Easaia na luvei Eapi sa tukuna vei Josevata, "Me ra lako na noqu tamata kei na nomu tamata ena waqa. Ia, sa sega ni vinakata o Josevata.

⁵⁰Sa vakacegu o Josevata vata kei ira na tamana, ka sa bulu vata kei ira na tamana ena koroi Tevita na tamana. O Jeorame na luvena sa lewa ena vukuna.

⁵¹O Easaia na luvei Eapi sa tui e Isireli mai Samaria, e nai ka tinikavitu ni yabaki nei Josevata na Tui Juta. Sa lewa me rua na yabaki e Isireli.

⁵²Sa cakava na ka ca ena mata i Jiova. Ka sa muria ga nai valavala i tamana kei tinana, nai valavala nei Jeropoame na luvei Nabati, o koya sa vakavuna na nodra valavala ca na Isireli;

⁵³ni sa qaravi Peali ka lotu vua, ka vakayalocataki Jiova na Kalou ni Isireli me cudru kina, me vaka na veika kece sa cakava o tamana.