[11] 1 Tui 4

¹Na tui o Solomoni sa tui e Isireli taucoko.

²Sai ira oqo sa veiliutaki vata kei koya: O Asaraia na luvei Setoki sa bete levu;

³O Iliorefi kei Eaija na luvei Sisa e rau sa vunilawa kei Josefati na luvei Ailuti sa vunivola me dauvolavola;

⁴O Penaia na luvei Joata sai liuliu ni mataivalu; O Setoki kei Epaiaca e rau sa bete;

⁵O Asaraia na luvei Nacani sa i liuliu nodra na daucakacaka; O Sabutu na luvei Nacani sa bete ka i tokani voleka nei Solomoni na tui;

⁶O Aisa sai liuliu ni dauveiqaravi e vale kei Adonirami sa nodra i liuliu na dauveiqaravi e tautuba.

⁷Sa tinikarua na nona mata na tui e Isireli taucoko “ era sa dau raica na kena vakarautaki na kakana ni tui kei na kedra na daucakacaka, ka me ra ya dua ga na vula ena dua na yabaki.

⁸Oqo na yacadra: O Peniu mai na vei ulunivanua Ifereimi;

⁹O Penideka mai Makasi, e Saelabimi, beci Semesi, e Eloni beci Anana;

¹⁰O Peniasi mai Aruboce, sa nona talega O Sakoca kei na vanua kecega mai Epa;

¹¹O Peni-Apenatave mai na vanua o Dori, sa watina talega o Tapeci na luvei Solomoni;

¹²O Baena na luvei Ailuti mai Taenaki Mekito kei Beci-Sini ka yaco sara ki Epeli-Meola ka yaco sara yani ki Jokinemi;

¹³O Peni-Keba mai Ramoci e Kiliati, sa nona talega na veikoro mai Jairi o ira na luvei Manasa e Kiliati, sa nona talega na veivanua e Akobi mai Masani “ e onosagavulu na veikoro lelevu vakabainivalutaki ka matamata varasa;

¹⁴O Ainadabe na luvei Ito mai Maenaimi;

¹⁵O Aimasi mai Navitalai “ o koya talega na wati Vasemaca na luvei Solomoni;

¹⁶O Bana na luvei Usai mai Esa kei Aloci;

¹⁷O Josefati na luvei Perua mai Isakari;

¹⁸O Simei na luvei Ela mai Penijamini;

¹⁹O Keba na luvei Uri mai na vanua o Kiliati, na veivanua nei Sioni na tui mai Amoraiti kei Oki na tui Basani “ o koya duadua ga sa tiki ni veiliutaki sa tiko ena vanua.

²⁰Era sa lewe levu na Juta kei na Isireli, ka sa vaka na nuku ni matasawa na kedra i wiliwili.

²¹O Solomoni sa lewa na matanitu kecega mai na Uciwai levu ki na nodra vanua na Filisitia me yaco sara kina i yalayala kei Ijipita. Era sa kauta mai vei Solomoni na nodra veika ni cau ka qaravi Solomoni ena veisiga taucoko ni nona bula.

²²Nai votavota kei Solomoni kei na nona vale ena dua na siga sa tolusagavulu na taga falawa vinaka, onosagavulu na taga falawa dina,

²³tini na bulumakau vinaka, ruasagavulu na bulumakau kana co, dua na drau na sipi “ ka so na dia tagane, e so na kaseli, so na repuki, kei na toa uro sara.

²⁴Sa lewa o koya na vanua kecega ena tai oqo ni Uciwai mai Tipisa vaka ki Qasa “ o ira kece na tui ena tai oqo ni Uciwai, ka sa veivinakati kei ira kecega sa tiko vakavolivoliti koya.

²⁵O Juta kei Isireli era sa tiko vinaka, na tamata yadua na nona vuni vaini kei na nona vuni lolo, mai Tani vaka sara ki Perisepa, ena veisiga taucoko nei Solomoni.

²⁶O Solomoni sa vasagavulu na udolu na nona ose ni nona qiqi ni valu, sa tinikarua na udolu na tamata ni vodo ose.

²⁷O ira na mata ni tui yadua oqo ena nodra veivula yadua “ era sa vakarautaka na kakana vei Solomoni kei ira vakayadua sa kana mai na nona teveli. Sa sivia kecega na veika e vakarautaki.

²⁸Sa kau talega mai na sila kei na vunisila me keda na ose, era sa solia mai me vaka sa lesi vei ira.

²⁹Na Kalou sa solia vei Solomoni yalomatua kei vuku kila vinaka e levu sara, kei na yalona sa rui levu talega me vaka na nuku ni matasawa.

³⁰Na vuku nei Solomoni sa uasivia na vuku kecega ni tamata mai na tokalau kei na vuku kecega mai Ijipita.

³¹Sa vuku cake mai vei ira na tamata kecega “ sa uasivi, Ecani na kai Esa kei Emani, kei Kalikoli, kei Tarita mai Maoli. Na kena i rogorogo sa tara na veivanua kecega.

³²Sa vakamacalataka e tolu na udolu na Vosa Vakaibalebale ka sa dua na udolu ka lima na nona same kei sere.

³³Sa vakamacalataka talega na veivunikau, mai na Sitari kei Lepanoni, na Isopi talega e sa kadre mai na lalaga; sa vakamacalataka talega na veimanumanu ni vanua, na veimanumanu vuka, na veika sa qasi voli kei na ika talega.

³⁴Na tamata kece mai na veivanua, na tui mai na veimatanitu, o ira sa rogoca na oti na nona vuku, era sa lako mai me rogoca tikoga na nona vuku.