[60] 1 Pita 2

¹O koya oqo, mo dou biuta tani na lomaca kecega na veivakaisini, na daulawaki, na yalovuvu kei na vosa dukadukali mai na gusumudou.

²Ka mo dou vaka na gone se qai sucu, ena nomudou gadreva na vosa bula, me vaka na wai ni sucu dina, mo dou tubu cake kina,

³Dou na qai kila dina kina na kena talei na loloma ni Kalou.

⁴Dou lako mai vei Koya na Vatu bula, ka era a cati koya na tamata, ia sa digitaki Koya na Kalou me talei dina sara,

⁵Oi kemudou talega, na vei vatu bula, dou a tara cake mo dou vale vakayalo, ka me mata bete yalosavasava, ka mo dou dau cabora nai soro vakayalo sa vinakata na Kalou ena vuku i Jisu Karisito.

⁶O koya ka sa tu talega ena i volatabu, raica, Au sa vakadabera mai Saioni na vatu ni yavu ena tutu ni vale, sa digitaki, ka talei, o koya ena vakabauti Koya ena sega vakadua ni na vakamaduataki."

⁷O koya oqo, vei kemudou sa vakabauta, ena talei sara o koya; ia vei ira sa sega ni vakabauta, "na vatu era a biuta o ira na matai ni vale sa yaco me kenai vakadei ena tutu ni vale,"

⁸Kei "Na vatu era sa tarabe kina Kei na vatu qiwa era sa bale kina." Era tarabe, ni ra talaidredre kina vosa ni Kalou, Ni ra sa nakita vaka kina.

⁹Ia, oi kemudou nai tabatamata digitaki, a mata bete vakaturaga, a matanitu yalosavasava, oi kemudou na nona ka vakamareqeti na Kalou, ka mo dou vakaraitaka na nomudou vakavinavinakataki Koya, ena Nona a kauti kemudou tani mai ena butobuto ka vakatikori kemudou ena raramasese ka i qoroqoro.

¹⁰Oi kemudou dou a sega tu ni nona na Kalou, ia oqo dou sa luve ni Kalou, dou a sega ni vakila tu na loloma ia oqo dou sa kila sara ga na titobu ni loloma.

¹¹Oi kemudou sa lomani, au sa vakamamasu vei kemudou oi kemudou sa nona na Kalou, mo dou maroroi kemudou mai na gagadre ca ni yago sa veimecaki kei na yalo,

¹²Ka me uasivi na nomudou i valavala ena kedra maliwa na sega ni lotu, ni ra via vosataka e dua na ka ca baleti kemudou, ena sega ni rawa, ka ni ra raica sara tu ga na uasivi ni bula dou bulataka, ena ka oqori era na vakarokorokotaka kina na Kalou.

¹³Dou talairawarawa kina i lesilesi kecega ni tamata ena vuku ni Turaga, se vua na tui o koya sa cecere sara nona lewa,

¹⁴Se vei ira na liuliu ni matanitu, se vei ira mada ga era talai mai mera mai veivesuki ena vuku ni cala, me ra vakavinavinakataki ni ra cakava tiko na cakacaka vinaka.

¹⁵Sai koya oqo na loma ni Kalou, meda dau caka vinaka tikoga, ka me rawa ni sogota kina na nona vosa vakalialia na tamata lialia “

¹⁶Ni dou sa galala, dou kakua ni vunitaki kemudou ena nomudou galala, ia dou bula me vaka na tamata ni Kalou.

¹⁷Dou rokova na tamata kecega. Lomani ira na veiwekani. Dou rerevaka na Kalou ka doka na Tui.

¹⁸Oi kemudou na tamata lotu, dou talairawarawa vei ira na nomudou turaga ena rere, ka sega vei ira ga na turaga vinaka, se turaga yalo malumalumu, vei ira talega na turaga e voravora nona veiliutaki.

¹⁹Ni sa uasivi sara na bula me vaka oqo, ka sa vosota na rarawa ni sa vakararawataki vaka sega dodonu, ka ni vinakata me toso vua na Kalou.

²⁰A ka vinaka cava dou na rawata, kevaka mo dou mokulaki ena nomudou cala, ka dou qai vosota? Ia ni dou cakava na ka vinaka, dou qai vakararawataki, ni dou vosota, ena saumi kemudou kina na Kalou.

²¹Ena ka sara ga oqori dou kacivi kina, baleti Karisito sa mai vosota na rarawa ena vukuda, ka laiva mai vei keda e dua nai vakarau ni bula me rawa ni da muria na mawe ni yavana.

²²Ni sa sega ni kitaka e dua nai valavala ca, ka sa sega ni vosa veicavilaki na gusuna.

²³Ni sa vakalialiai, e sega ni via sauma lesu; Ni sa kune ka rarawa, e sega ni vosa kudrukudru, Ia sa soli Koya taucoko ga vei koya sa ia na lewa dodonu;

²⁴O koya sara ga e colata na noda i valavala ca me tau ena yagona kina kauveilatai; Me rawa kina vei keda ni da a mate tu ena vuku ni valavala ca, meda bula vua na Kalou, ia na we ni kena kuita eda sa mai vakabulai kina.

²⁵Ni dou sa vakataki ira na sipi sa lako sese, ia oqo dou sa lesu tale vei Koya nai vakatawa o Koya ka dau tiko ena yalomudou.