[60] 1 Pita 4

¹O koya oqo, ni sa vakararawataki o Karisito ena vuku ni noda i valavala ca, vei keda me dei tiko ena noda vakasama, o koya e vakararawataki ena yagona, ka e sega vua nai valavala ca.

²E sega ni mai bula tiko o koya e vuravura ena nona bula taucoko, me baleta na gagadre ca ka tu vei keda na tamata, ia ena vuku ga ni lewa ni Kalou.

³Vei keda, eda a bula tu mai ena dua na gauna ena bula vakasisila ka tekivu sara mai vei ira noda qase “ eda a dauvakacaca, dau gagadre ca, dau mateni, dau veivala, dau marau vakalialia, dau qarava na ka buli.

⁴Na ka oqo, era vosavakacacataki kemudou kina, ni ra sega ni raica mo dou bulataka na bula era vakayacora tiko.

⁵Ka era na tu taucoko, ena matai Koya ena lewai ira na bula kei ira na mate, ka mera na vakatusai ira vua.

⁶Ena vuku ni ka oqo, ea laki vunautaki kina nai tukutuku vinaka vei ira na mate, ni ra na lewai talega ena vuku ni nodra i valavala; ka tautauvata kei ira na bula tiko, ia mera bula vua na Kalou ena yalodra.

⁷Ia sa voleka sara nai vakataotioti; o koya mo dou gumatua sara ka dau yadrava na masumasu.

⁸Na ka kece, me kua ni guilecavi mo dou dau veilomani vakaikemudou, "ni sa ubia na levu ni valavala ca na loloma."

⁹Dou dau loma vinaka, ka me kakua ni dou dau veikaseti vakai kemudou.

¹⁰Me vaka dou sa dui ciqoma nai solisoli, dou vakayagataka sara vei kemudou, me vaka na dauveiqaravi vinaka ni kila tiko na loloma ni Kalou.

¹¹Kevaka e dua me vosa, me vosa mai ena vosa ni Kalou. Kevaka e dua sa via cakava na cakacaka, me kitaka sara ena kaukauwa ni Kalou sa sovaraki mai, na veika kece me rokovi na Kalou, ena vuku i Jisu Karisito, o koya sa dodonu me nona na vakarokoroko kei na lewa ena gauna kecega ka sega ni mudu. Emeni.

¹²Vei kemudou sa lomani, dou kakua ni leqa taka na kaukauwa ni veivakacacani vei kemudou, me vaka dou sa vakadinadinataka tiko oqori;

¹³Ia ka mo dou reki ga, ni dou sa vakaitavi vata kei Karisito ena vakacacani, ni na vakaraitaki mai na nona i ukuuku vei kemudou, dou na qai reki vakalevu sara kina.

¹⁴Kevaka dou sa vakacacani ena vuku i Karisito, dou sa kalouvinaka kina, ni sa tiko vei kemudou na yalo e uasivi, ka yalo ni Kalou. Na ka era cakava era vosavakacacataki Koya, io vei kemudou me vakarokorokotaki tikoga o Koya.

¹⁵Me kakua ni dua vei kemudou, me laba, se butako, se vakarau kaukauwa, se me la'ki lewa tale e dua na bula ni dua na tamata.

¹⁶Kevaka e dua sa yaco vua na ka rarawa e vinaka mo vakararawataki ena vuku i Karisito, kakua ni madua kina; mo vosota ga, me rawa ni vakarokorokotaki kina na Kalou.

¹⁷Ni na yaco mai na gauna, me tekivu kina na veilewai ena vale ni Kalou; kevaka me sa vakayacori vei keda, cava na nodra i tinitini o ira era sega ni via rogoca na vosa ni Kalou?

¹⁸Vakacava mada "Kevaka sa rui savasava sivia na tamata lotu, Me ra na qai bula vakaevei na sega ni lotu, kei ira nai valavala ca?"

¹⁹O koya oqo, o ira kece era vakacacani ni ra caka vinaka tiko, me vaka na lewa ni Kalou, me ra solia taucoko na yalodra vua na dauveibuli, ena nona yalodina vei ira kecega.