[9] 1 Samuela 14

¹Sa qai yaco ena dua na siga o Jonacani na luvei Saula sa tukuna vua na nona cauravou daucola yaragi, "Lako mai, daru lako mada ki na nodra i tikotiko na Filisitia ena yasana ka dua." Ia sa sega ga ni tukuna vei tamana.

²O Saula sa dabe tiko ena yasa ka dua mai Kipea ena ruku ni dua na vuni ponekaraneti sa tiko mai Mikoroni. Era sa tiko vata kei koya e rauta ni ono na drau na tamata.

³O Eaia na luvei Aitubu na tuakai Ikapote, na luvei Vanaisi na luvei Ilai na bete i Jiova mai Sailo, sa dara tiko na efoti. Era sa sega ga ni kila ni sa lako o Jonacani.

⁴Ena veimama ni tatakoso, na vanua sa vinakata o Jonacani me lako yani kina vei ira na Filisitia, sa tiko kina na vatu momoto ena yasana ruarua, na yacana e dua o Bosese ka yacana ka dua tale o Senei.

⁵E dua na vatu sa qara vaka ki na vualiku me veibasai kei Mitimasi kei na dua tale sa qara vaka ki na ceva ka veibasai kei Kipea.

⁶Sa tukuna sara o Jonacani vua na nona cauravou sa daucolata na nona yaragi, "Lako mai, me daru mai lako ki na nodra i tikotiko na sega ni cili oqo, de na cakacaka vata kei kedaru o Jiova. Ni sa sega na ka ena tarovi Jiova me veivakabulai, se lewe levu se lewe lailai."

⁷Sa tukuna vua o nona daucola yaragi, "Mo cakava kece na veika sa tiko oqori e lomamu. Mo lako yani; au sa tiko oqo vata kei iko, me vaka sa yalomu kina."

⁸Sa tukuna o Jonacani, "Vinaka, me daru sa takoso sara yani ki vei ira na tamata oqo, ka me daru vakaraitaki kedaru vei ira.

⁹"Kevaka era sa tukuna vakaoqo vei kedaru, 'drau wawa me keimami na lako mai vei kemudrau, 'daru na tu ka sega ni lako vei ira.

¹⁰"Kevaka era sa tukuna mai, 'Drau lako mai.' Daru lako cake ni sa soli ira o Jiova kina ligadaru ni sai koya oqo na kena i vakatakilakila."

¹¹E rau sa vakatakilai rau ki vei ira na Filisitia, era sa tukuna “ "Raica era sa lako mai na Iperiu mai na veiqara era sa vuni tiko kina"

¹²Era sa kaci yani na Filisitia ki vei Jonacani kei na nona cauravou, "Lako sobu mai me keimami vakaraitaka e dua na ka." Sa tukuna o Jonacani vua na nona cauravou, "Muri au mai, o Jiova sa soli ira oqo ki na ligadra na Isireli."

¹³Sa kaba cake o Jonacani kei na nona daucola yaragi sa muri tiko yani; ka era sa bale e matai Jonacani. Sa vei vakabalei talega na nona cauravou.

¹⁴Nai matai ni veivakamatei e rau sa cakava o Jonacani, sa rauta e ruasagavulu na tamata, ena loma ni dua na vanua lailai ga.

¹⁵Sa dua na sautaninini levu sa yaco ena nodra i tikotiko na Filisitia. Na i tikotiko vakaivalu kei ira na daukaba vakaivalu era sa sautaninini kecega. Sa uneune na vanua, ka sa dua na sautaninini levu.

¹⁶O ira na dauyadra nei Saula mai Kipea e Penijamini, era sa raica e dua nai wiliwili levu ni tamata e ra sa veidroyaki ka veiseseyaki.

¹⁷Sa tukuna o Saula vei ira sa tiko vata kei koya, "Me da kaci yaca mada me kilai se o cei sa sega ni tiko vata kei keda," ni ra sa cakava oqo, era sa qai kila ni rau sa yali tiko o Jonacani kei na nona cauravou daucola yaragi.

¹⁸Sa tukuna o Saula vei Eaitia, "Kauta mai na Kato ni Kalou eke", (ni sa tiko vata kei ira na Isireli na Kato ni Kalou.)

¹⁹Sa yaco tiko ni sa vosa tiko vei ira na bete o Saula, sa yaco me sa rogolevu tiko ga mai na domodra na Filisitia. Sa tukuna o Saula vei ira na bete “ "Mo ni vakasuka na ligamuni."

²⁰Era sa vakasoqoni vata mai vei Saula na tamata kecega ka lako yani ki nai valu “ sa dina era sa veivakamatei vaka i ira ga na Filisitia, ka sa tiko e dua na veilecayaki levu vei ira.

²¹O ira na Iperiu era a tiko vata kei ira na Filisitia mai liu sara, era sa to vata mai kei Saula kei Jonacani.

²²O ira kece na Isireli era a vuni tu ena vei qara vatu mai Ifereimi “ ni ra sa rogoca na nodra sa veidroyaki na Filisitia, era sa cici talega mai ka veitokoni ena nodra valuti na meca.

²³Sa vakabulai Isireli ena siga o ya o Jiova, ka sa toso sara na i valu ki Beci-Aveni.

²⁴Era sa wawale vakalevu na Isireli ena siga o ya, ka sa vakayavalati ira na tamata o Saula mera bubului, ena nona tukuna, "Me vakaloucataki na tamata sa kana mai na mataka me yacova ni sa karobo mai, ni bera na noqu cudruvi ira na meca." Era sa sega ni tara sara na tamata na kakana.

²⁵O ira kece na tamata era sa lako mai ki na veikau; era sa lutu tu na oni ena qele.

²⁶Ni ra sa yaco mai ki veikau na tamata, era sa lutu tu na oni, sa sega ni dua e via kania baleta ni ra sa rerevaka tiko na bubului.

²⁷Ia, o Jonacani, sa sega ni rogoca na vosa nei tamana me baleta na bubului, sa dodoka yani na nona moto ki na oni ka kauta mai ligana ka kania sara, ka sa laukune me vinaka cake mai na kena i rairai.

²⁸E dua vei ira na tamata sa tukuna mai, "O tamamuni sa yalayala vei ira na tamata me ra bubului ka tukuna, 'sa kalouca o koya sa kana ena siga oqo.'" Era sa malumalumu sara na tamata.

²⁹Sa tukuna mai o Jonacani, "O tamaqu sa vakaleqa na vanua. Mo ni raica mai ni sa vinaka mai na kequ i rairai ni'u sa kania na oni oqo.

³⁰"Sa na vinaka sara kevaka o ni sa kana ga ena nomuni lewa nikua ni sa tu oqo nai toki ni valu! Ni sa sega ni levu na nodra vakamatei na Filisitia?"

³¹Era sa cemuri na Filisitia ena siga o ya mai Mitimasi ki Aijaloni. Era sa malumalumu sara ga na tamata.

³²Era sa cici yani na tamata, ka taura nai toki ni valu ka vakamatea ka kania vata na kena dra.

³³Era sa tukuna vei Saula, "Raica era sai valavala ca na tamata vei Jiova ni ra sa kania vata na dra na tamata!" Sa tukuna o Saula, "O ni sa cakacaka vakaca sara; mo ni vakaqiqica mai vei au e dua na vatu levu e nikua sara ga."

³⁴Sa tukuna yani o Saula, "Mo ni dui lako yani ka tukuna vei ira na tamata, 'me ra kauta mai na bulumakau ni tamata vakayadua ga, na sipi talega, me ra vakamatei ka laukana; mo ni kua ga ni valavala ca vei Jiova ena nomuni kania vata kei na dra.'" Era sa dui kauta mai na veika e gadrevi ka era sa vakamatei.

³⁵Sa tara o Saula e dua nai cabocabo ni soro ki vei Jiova. Oqo na kena i matai sa tara vei Jiova.

³⁶Sa tukuna o Saula, "Me da lakovi ira sobu na Filisitia; ka butuki ira ena bogi taucoko me yacova na mataka ka me kakua ni dua e drobula." Era sa tukuna kece, "Me caka na veika o sa nanuma ni vinaka vei iko." Era sa tukuna na bete, "Eke, me da sa toso voleka kina vua na Kalou."

³⁷O Saula, sa taroga nai vakasala mai vua na Kalou, "Me'u cici muri ira beka na Filisitia? O ni na soli ira beka e ligadra na Isireli?" Ia, na Kalou sa sega ni sauma vua ena siga o ya.

³⁸Sa tukuna o Saula, "Mo ni lako kece mai ki kea oi kemuni na nodra turaga na veitamata, mo ni kila mada ka raica se cava sa tu kina nai valavala ca oqo e daidai.

³⁹"Me vaka sa bula o Jiova, o Koya sa vakabulai Isireli, kevaka mada ga ke sai Jonacani na luvequ, ena mate vakaidina." Ia, sa sega na tamata sa sauma vua.

⁴⁰Sa qai tukuna vei ira kece na Isireli, "Mo ni tu ena dua na yasana kei Jonacani na luvequ, au na tiko ena dua tale na yasana." Era sa tukuna na tamata, vei Saula, "mo cakava na veika sa vinaka vei iko."

⁴¹Sa qai tukuna o Saula vei Jiova na nodra Kalou na Isireli, "Mo ni solia e dua na wirimadigi e dodonu sara," e rau sa tauri o Saula kei Jonacani “ era sa dro na tamata kecega.

⁴²Sa tukuna o Saula, "Me viritaki na wirimadigi baleti au kei Jonacani na luvequ" “ sa qai tauri o Jonacani.

⁴³Sa tukuna o Saula vei Jonacani, "Tukuna mai, na cava o sa cakava," sa tukuna vua o Jonacani, "Au tovolea ga na oni lailai sa tiko ena mua ni moto sa tiko e ligaqu. Oqo mo vakamatei au!"

⁴⁴Sa sauma o Saula, "me cakava na Kalou, me levu vakaidina; ni o na mate vakaidina, Jonacani."

⁴⁵Era sa tukuna vei Saula na tamata, "Me mate o Jonacani, o Koya ga sa cakava na veivakabulai levu e Isireli? Me tabu sara! Me vaka sa bula o Jiova, sa tabu ni lutu e dua na drau ni uluna ki na qele, ni sa cakacaka o koya vata kei na Kalou me yacova e daidai." Era sa vakabulai Jonacani na tamata ka sa sega ni vakamatei.

⁴⁶Sa lesu mai o Saula ena nona muri ira na Filisitia. Era sa dui lako na Filisitia ki na nodra dui tikotiko.

⁴⁷Sa vakadeitaka na nona veiliutaki e Isireli o Saula, ka sa valuti ira na kena meca ena veiyasana kece “ o ira na Moapi, na Amoni, na Itomi, o ira na tui mai Sopa kei ira na Filisitia. Na vanua ga sa vuki kina, sa vakararawataki ira.

⁴⁸Sa vakasoqoni ira mai na mataivalu ka valuti ira na Amalekaiti, ka vakabulai ira na Isireli mai na ligadra na dauveivakasosataki.

⁴⁹O iratou na luvei Saula, o Jonacani, kei Tisui kei Malakisua. Na yacadrau na luvena yalewa o, Merabe na qase kei Maikili na gone.

⁵⁰Na yaca i wati Saula o Ainoami na luvei Aimorasi. Na yaca i koya nai liuliu ni nona mataivalu o Apana na luvei Neri na momo nei Saula.

⁵¹Na tama i Saula o Kisi kei Neri na Apana sa luvei Apieli.

⁵²Sa dau ia nai valu katakata kei ira na Filisitia ena gauna i Saula. Ni sa dau raici ira na tamata kaukauwa ka qaqa o Saula “ sa dau kauti ira vei koya.