[9] 1 Samuela 18

¹Sa qai yaco ni rau sa veivosaki oti tiko kei Saula, na yalo i Jonacani sa kabita na yalo i Tevita, ka sa lomani koya o Jonacani me vaka ga na yalona dina.

²Sa kauti koya o Saula, ka sa sega tale ni laiva me lesu ki nodratou vei tamana.

³O Jonacani kei Tevita e rau sa cakava e dua na veiyalayalati “ baleta ni sa lomani Tevita vakalevu o Jonacani, me vaka ga na nona lomani koya.

⁴Sa taura ga na nona i oro ka vakaiorotaki Tevita kina kei na nona i sulu vaka i valu kei na nona yaragi talega ni valu “ nai seleiwau, na dakai kei na kena beleti.

⁵Sa dau lako o Tevita ki na vanua cava ga sa talai koya kina o Saula, sa dau vakayalomatuataka na nonai valavala. Sa biuti ira vata na qaqa ni vala, ka sa ciqomi mai vei ira kecega na tamata, vei ira talega na dauveiqaravi i Saula.

⁶Sa yaco ni ra sa lako tiko mai ki vale, ni sa lesu tiko mai e nai valu o Tevita, era sa lako mai na marama kecega e Isireli ena nodra sere ka meke tiko mai, me sotavi Saula na tui, vata kei na bitu ni vakatagi kei na reki kei na veiyaya ni qiriqiri tale eso.

⁷Era sa meke ka lagata tiko - "Sa vakamatea o Saula na veiudolu ia o Tevita na veitini na udolu."

⁸Sa cudru sara vakalevu o Saula, ka sa yaloca ena veika sa rogoca, "Ni ra sa lagataka tiko na veitini na udolu vei Tevita, ia, vei au, na veiudolu ga. Na cava tale, sa rawa ni nona na matanitu?"

⁹Mai na siga o ya, sa vakaraici Tevita tiko o Saula.

¹⁰Sa yaco ena siga ka tarava, sa lako mai vei Saula na yalo ni veivakacalai mai vua na Kalou ka sa parofisai e loma ni vale. Sa qiria nai vakatagi e ligana o Tevita me vaka sa dau cakava, ia, sa dua na moto sa taura tiko o Saula e ligana.

¹¹Sa cokataka yani na moto o Saula ni sa tukuna tiko, "Au na vakoti Tevita vata kei na lalaga ena moto oqo." Ia, o Tevita sa dro me vaka e liu.

¹²O Saula sa rerevaki Tevita tiko, baleta ni sa tiko vata kei koya o Jiova, ka sa lako tani mai vei Saula.

¹³Sa kauti Tevita tani mai matana o Saula ka sa biuti koya me liutaki ira na mata i valu e veiudolu; sa dau lako yani ka lako mai e matadra na tamata.

¹⁴Sa dauqarauni koya o Tevita ka bula vakayalomatua ena veika kecega, sa tiko vata kei koya o Jiova.

¹⁵Ni sa dau-raica o Saula na nona i valavala vakayalomatua; sa dau rerevaki koya.

¹⁶O ira kece na Isireli kei na Juta era sa taleitaki Tevita baleta ni sa daulako yani ka lako mai e matadra. Rau Sa Veiwatini O Tevita Kei Mikeli

¹⁷Sa tukuna mai o Saula vei Tevita, "Oqo na luvequ yalewa qase yacana o Merape; au na soli koya vei iko me watimu, mo noqu qaqa ka vala ena i valu i Jiova." Ni sa nanuma o Saula, "Me kua ni tarai koya na ligaqu “ me ra tarai koya ga na Filisitia.

¹⁸Sa tukuna mai o Tevita vei Saula, o cei mada o Tevita, na cava o au kei na vuvale i tamaqu e Isireli, me'u wili kina me vugona na tui?"

¹⁹Sa yaco na gauna me sa soli kina o Merepa vei Tevita, sa qai soli vei Adreli na kai Meolati me watina.

²⁰O Mikeli na luvei Saula yalewa sa domoni Tevita, sa tukuni vei Saula ka sa marau kina o koya.

²¹Sa tukuna o Saula, "Au na soli Mikeli vei Tevita, me tagavi kina ka me na tarai koya na ligadra na Filisitia. Sa tukuna vei Tevita o Saula ena i karua ni gauna, "O sa na vugoqu ena siga oqo."

²²Sa vakaroti ira na nona dauveiqaravi o Saula, "Veivosaki vata kei Tevita vakavuni ka tukuna, "Raica sa rui marautaki iko na tui kei ira kece na nona dauveiqaravi era sa lomani iko. Oqo mo sa mai veivugoni kei na tui."

²³Sa cavuti na vosa nei Saula ni sa vakarorogo o Tevita. Sa sauma mai o Tevita, "O ni sa nanuma beka ni sa ka rawarawa me dua e rau veivugoni kei na tui, ni'u sa dravudravua ka tamata lolovira sara?"

²⁴Sa tukuni vei Saula ni sa vosa mai vaka o ya o Tevita.

²⁵Sa sauma yani o Saula, "Dou tukuna vei Tevita ni sa sega ni vinakata na tui nai sau ni yalewa, me dua ga na drau na kuli ni yagodra vakatagane na kai Filisitia me cudruvaki kina na tui vei ira na nona meca. Sa nanuma tiko ga o Saula me mate o Tevita ena ligadra na kai Filisitia.

²⁶Ni ra sa mai tukuna vei Tevita na vosa oqo o ira na dauveiqaravi “ sa marau kina o Koya me rau veivugoni kei na tui. E se bera tiko ni oti na gauna yalataki;

²⁷Sa tucake o Tevita ka lako yani, o koya kei ira na nona tamata. Era sa vakamatea e rua na drau na kai Filisitia. Sa kauta mai o Tevita na kuli ni yagodra vakatagane ka soli nai wiliwili taucoko vua na tui me rawa ni wili kina me vugona na tui. Sa qai soli Mikeli o Saula me rau veiwatini.

²⁸Sa raica ka kila o Saula ni sa tiko vata kei Tevita o Jiova ka sa domoni Tevita talega o Mikeli;

²⁹e se rerevaki Tevita tiko ga o Saula, sa meca levu tikoga i Saula o Tevita.

³⁰Era sa lako ki valu na veituraga lalai ni Filisitia. Sa yaco ena veigauna kecega era lako kina, sa kilikili ka vuku tikoga o Tevita mai vei ira kece na tamata i Saula. Sa raici cake duadua tiko ga o Tevita.