[9] 1 Samuela 26

¹O ira na kai Sipi era sa lako mai vei Saula e Kipea ka tukuna, "Sa sega beka ni vuni tiko o Tevita ena veidelana mai Akila veibasai kei Jesimoni?"

²Sa tucake o Saula ka lako sobu ki na vanua liwa mai Sipi, sa tiko vata kei koya e tolu na udolu na tamata digitaki vei ira na Isireli; me ra vaksaqarai Tevita ena vanua lala mai Sipi.

³Sa mai tiko o Saula ena delana mai Akila veibasai kei Jesimoni ena sala. Sa tiko o Tevita mai na vanua lala oqo, ka sa raici Saula ni sa lako tiko mai me vakasaqarai koya.

⁴Sa vakatala yani o Tevita eso na tamata, ka sa vakadeitaka ni sa lako dina tiko mai o Saula.

⁵Sa tucake o Tevita ka lako mai ki na vanua sa tiko kina o Saula “ sa raica talega o Tevita na vanua sa davo tiko kina o Saula kei Epana na luvei Neri na liuliu ni mataivalu. Sa davo tiko o Saula e loma ka era sa vakavolivoliti koya o ira na tamata.

⁶Sa vosa o Tevita ka tukuna vei Aimeleki na Itaiti kei Apisai na luvei Seruia na taci Joape ka vaka: "O cei me lako vata kei au kivei Saula ki na keba?" Sa sauma mai o Apisai, "Au na lako sobu vata kei iko."

⁷E rau sa lako mai o Tevita kei Apisai ena bogi; sa moce tu o Saula ena loma ni tikotiko sa coba tu na nona moto ena qele voleka e uluna. O Epana kei ira kece era sa moce vakavolivoliti koya.

⁸Sa tukuna mai o Apisai vei Tevita, "Na Kalou sa soli koya na kemu meca ki na ligamu ena siga oqo, mo solia vei au na galala me'u cokai koya ga vakadua vata kei na qele ena moto, au na sega ni cokai koya vakarua!"

⁹Sa tukuna o Tevita vei Apisai, "Kua ni vakarusai koya; o cei e rawa ni dodoka na ligana vua nai lumuti i Jiova me qai sega ni cala?"

¹⁰Sa tukuna tale o Tevita, "Me vaka sa bula o Jiova, o Jiova ga ena vakarusai koya, se ena mate mai na nona veisiga, se ena lako yani nai valu ka na rusa kina.

¹¹"Sa vakatabuya o Jiova me'u dodoka na ligaqu vua nai lumuti i Jiova. Au kerea mo taura na moto kei na joke ni wai sa toka voleka e uluna, ka me daru lako yani."

¹²Sa taura mai o Tevita na moto kei na joke ni wai sa toka voleka e uluna, ka rau sa lako yani; sa sega ni dua e raica se kila se me bau yadra mada ga. Ni sa dua na moce levu mai vei Jiova sa tarai ira.

¹³Sa lako yani o Tevita ki na yasana ka dua ka tucake tu ena dua na delana lailai, sa yawa toka mai vei ira.

¹⁴Sa kaci yani o Tevita vei Epana na luvei Neri kei ira talega na tamata ka tukuna, "O sa sega ni sauma mai Epana?" Sa vosa yani o Epana, "O cei o iko mo kaci tiko mai vaka oqori vua na tui?"

¹⁵Sa sauma yani o Tevita vei Epana, "O tagane beka o iko? O cei e vakataki iko e Isireli? Na cava o sa sega kina ni yadrava na nomu turaga na tui? Ni sa lako mai e dua me vakamatea na tui.

¹⁶"Na ka o sa cakava oqo sa sega ni vinaka me vaka sa bula na tui “ sa dodonu mo mate baleta ni o sa sega ni yadrava na nomu turaga, nai lumuti ni Kalou. Mo vakaraica mada sa tiko e vei na nona moto na tui kei na joke ni wai sa toka voleka e uluna."

¹⁷Sa kila o Saula ni sa domo i Tevita oqo, sa tukuna mai, "Sai koya beka oqori na domomu, Tevita na luvequ?" Sa sauma yani o Tevita, "Sa domoqu ga oqo, noqu turaga, noqu tui."

¹⁸Sa tukuna tale yani; "E cava na vuna e saga tiko kina na nona bula na nona tamata? Na cava au sa cakava, na cala cava sa tiko e ligaqu?

¹⁹"O koya oqo, au kerea na noqu turaga na tui, me rogoca na domona na nona tamata: kevaka sa yavalati kemuni tiko na Kalou ena vukuqu, me ciqoma mada nai soro. Ia, kevaka ga era sa cakava tiko na luve ni tamata “ mera rukaki ena mata i Jiova, ni ra sa cemuri au tiko mai na noqu tiko ena mata i Jiova o koya na noqu i votavota, ni ra sa tukuna tiko, 'Lako ka qaravi ira na Kalou tani.'

²⁰"O koya oqo, me kua ni turu na noqu dra ki na qele ena mata i Jiova. Ni sa lako tiko mai na tui Isireli me vakasaqara e dua na kutu “ me vaka sa vakasaqarai e dua na toa ena loma ni veikau."

²¹Sa tukuna mai o Saula, "Au sa i valavala ca, mo lesu mai na luvequ, ni'u na sega tale ni tarai iko baleta ni sa rui ka taleitaki na noqu bula e mataqu. Au sa cakacaka vakalialia ka cala vakalevu sara."

²²Sa sauma mai o Tevita ka vaka: "Oqo na nona moto na tui. Me dua e lako cake mai ka mai kauta yani.

²³"O Jiova me na sauma vua na tamata na nona yalododonu kei na nona yalodina; ni sa soli iko ki na ligaqu o Jiova ena siga oqo “ ia, au sa sega ga ni dodoka na ligaqu vua nai lumuti ni Kalou.

²⁴"Me vaka ni sa rui sau levu na nomu bula e mataqu, me sa rui ka taleitaki vakakina na noqu bula ena mata i Jiova, ka me vakabulai au o koya mai na veivakararawataki levu kece oqo."

²⁵Sa tukuna mai o Saula vei Tevita, "Mo kalouvinaka na luvequ, Tevita! O na cakava na veika lelevu, ka ona qaqa tikoga." Sa lako yani o Tevita ka sa lesu tale ki nodratou o Saula.