[9] 1 Samuela 7

¹Era sa lako mai na kai Kirijaci Jaerimi ka taura na Kato ni Kalou ka kauta mai ki na vale nei Apinatave; sa vakatabui na luvena o Iliesa me maroroya na Kato ni Kalou.

²Sa tiko vakadede e Kirijaci Jaerimi na Kato ni Kalou, sa tiko e kea me ruasagavulu na yabaki ka era sa tagici Jiova vakalevu na Isireli.

³Sa vosa vei ira kece na Isireli o Samuela ka vaka: "Kevaka o ni sa lesu vei Jiova ena yalomuni taucoko ka biuta laivi na veikalou ni veivanua oqo kei Esitaroci mai vei kemuni, ka vakarautaka na yalomuni vei Jiova, ka qaravi koya ga; ena qai vakabulai kemuni mai na ligadra na Filisitia."

⁴Sa yaco me ra biuti Peali kei Esiteroci laivi na Isireli ka qaravi Jiova duadua ga.

⁵Sa tukuna yani o Samuela, "Mo ni vakasoqoni vata kece mai na Isireli e Misipa, au na masulaki kemuni vei Jiova."

⁶Era sa vakasoqoni vata mai e Misipa, era sa takiva mai na wai ka sova yani ena mata i Jiova. Era sa lolo ena siga o ya ka tukuna, "Keimami sai valavala ca vei Jiova." Sa lewa vei ira na Isireli o Samuela mai Misipa ena siga o ya.

⁷Ni ra sa rogoca na Filisitia na nodra sa soqoni vata na Isireli mai Misipa, o ira na turaga e Filisitia era sa lako cake me vala kei Isireli. Ni ra sa rogoca oqo na Isireli, era sa rerevaki ira na Filisitia.

⁸Era sa tukuna mai vei Samuela, "Me kua ni cegu na nomu kacivi Jiova na nomuni Kalou ena vukuda,

⁹Sa taura e dua na lami o Samuela ka vakacabora me i soro kama taucoko vei Jiova. Sa tagi talega vei Jiova me baleti ira na Isireli, ka sa sauma mai vua o Jiova.

¹⁰Ni sa vakacabora tiko nai soro kama o Samuela “ era sa toso voleka mai na Filisitia me vala kei Isireli. Sa kurukuru mai o Jiova ena dua na kurukuru levu vei ira na Filisitia ena siga o ya. Era sa yatayata ka veilecayaki na Filisitia ka era sa vakamalumalumutaki mai vei ira na Isireli.

¹¹O ira na Isireli era sa lako mai Misipa ka cicivi ira na Filisitia ka cemuri ira me yaco sara ki Beci- Kara.

¹²Sa taura o Samuela e dua na vatu levu ka vakatikora ena kedrau maliwa o Misipa kei Seni ka vakatoka me yacana o Apenisa, kena i balebale, "Sa veivuke o Jiova me yacova mai na siga oqo."

¹³Era sa vakamalumalumutaki na Filisitia, ka era sa sega tale ni torova mai nai yalayala kei Isireli. Na liga i Jiova sa veivala tiko kei ira na Filisitia ena gauna kece i Samuela.

¹⁴Na veikoro kece era sa taura na Filisitia mai vei ira na Isireli, era sa vakasuka tale vei ira na Isireli, mai Ekironi ki Kaca; o Isireli sa taura tale na nona veivanua mai vei ira na Filisitia. Sa yaco talega na veisaututaki vei ira na Isireli kei ira na Amoraiti.

¹⁵O Samuela sa lewa e Isireli ena nona bula taucoko.

¹⁶Ena veiyabaki sa dau veilakoyaki ki Peceli, ki Kilikali kei Misipa, ka sa lewa e Isireli mai na veivanua kece o ya.

¹⁷Ia, sa dau lesu ga ki Rama ni sa tiko kina na nona vale. Mai kea sa lewa tiko kina e Isireli ka sa tara talega e kea e dua nai cabocabo ni soro vei Jiova.