[54] 1 Timoci 4

¹Esa tukuna oti tiko mai na Yalo Tabu ni so ena vuki tani mai na vakabauta ena gauna e muri, ena nodra sa tamoi ni ra via rogoci ira na yalo ni dauveivakacalai, kei na nona i vakavuvuli na tevoro,

²Era vosa vakamikamica ni veitemaki ka yaco kina na nodra lewa e loma me kama vaka na kaukamea katakata.

³Era sega ni taleitaka me yaco na vakawati, era tarova ka sega ni duavata ena kakana sa solia mai na Kalou, me laukana vei ira sa vakabauta me ra vakavinavinakataka kina na dina ni Kalou.

⁴Nai bulibuli taucoko ni Kalou e vinaka, me da ciqoma taucoko nai solisoli ni Kalou ena vakavinavinaka ka me kakua ni da biliga tani;

⁵Ni ka oqori sa vakasavasavataka oti tu na vosa ni Kalou kei na masu.

⁶Kevaka mo dau vakamatatataka vei ira na veiwekani na ka oqo, o na qai dua na i talatala vinaka i Jisu Karisito, mo tuberi ira vakamalua ena vosa ni vakabauta kei na vakavuvuli dina, me vaka na nomu a tuberi mai kina.

⁷Ia mo kakua ni galeleta na vosa ni veivakasewasewani kei na nodra vosa ni veiwali ca na yalewa sa vakawati, ka mo maroroi iko tikoga mo savasava tiko.

⁸Ni sa yaga vakalailai ga na ogaoga vakavuravura, ia na ogaoga e na ka ni bula vakayalo sa yaga ena ka kecega, e yalataki kina na ka me baleta na bula oqo, ka qai vakauasivi na bula se bera mai.

⁹Oqo na vosa sa cecere ka vinaka vakaoti ka sa dodonu me ciqomi.

¹⁰Ena ka oqo eda na vosota kina na veika rarawa, ka vakabauta tikoga na Kalou bula, o Koya nai vakabula ni tamata kecega, ka vakauasivi vei ira na vakabauta.

¹¹Mo dau vakatavuvuli taka ka vakarota tiko na veika oqo.

¹²Me kakua ni dua e beci iko ni o se cauravou tikoga, ia na nomu i vosavosa, nomu i tovo, ena nomu loloma, nomu yalodina, nomu vakabauta, kei na nomu maroroya na savasava.

¹³Me yacova na noqu lako yani, mo dau vakaogai iko vakalevu ena wilika nai vola, ka mo dau veivakasalataki tiko, ka tukuna tiko nai vakavuvuli dina.

¹⁴Mo kakua ni vakamocera nai solisoli e tiko vei iko, ni sa yaco vei iko ena parofisai kei na veitabaki ni liga mai vei ira nai talatala qase.

¹⁵Dau vakanananu ki na veika oqo; ka soli iko taucoko kina, me rawa ni levu na ka o kila mai vei ira kece.

¹⁶Vakaraici iko vinaka kei nai vakavuvuli. Mo bulataka sara, ni o sa cakava oqo o sa vakadewa tiko kina vei ira era rogoci iko na bula, ka vakauasivi sara ga vei iko.