[14] 2 Veigauna 17

¹O Josevata na luvena sa lewa ena vukuna, ka sa vakaukauwataki koya ena vukudra na Isireli.

²Sa biuti ira na mata sotia ena veikoro kece e Juta kei na i vakaruru ni valu ena vanua e Juta kei na veikoro vaka Ifereimi e a kovea mai o Esa na tamana.

³Sa tiko vata kei Josevata o Jiova, baleta ni sa muria na sala i Tevita na tamana, sa sega ni via muri Peali,

⁴ia, sa vakasaqara na Kalou i tamana ka muria na nonai vakaro ka sega ni vaka na nodra i valavala na Isireli.

⁵Oqo na vuna, sa vakadeitaki kina na matanitu ena ligana; o ira kece na Juta, era sa soli ka ni loloma vei Josevata, ka sa rui levu sara tu vua na i yau kei na dokai.

⁶Na yalona sa rekitaka na sala i Jiova; ni sa talaraka na veitikina cecere kei na veimatakau e Juta.

⁷Ena i katolu talega ni yabaki ni nona veiliutaki, sa vakatalai ira na dauveivuke vua, o Penieli, o Opetaia, o Sakaraia, o Nacanieli kei Maikaia, me ra veivakavulici ena veikoro e Juta.

⁸Sa vakatalai ira vata kei na Livai o Semaia, o Necanaia, o Sebadaia, o Aseli,. o Semiramoci, o Jeonacani, o Atonaija, kei Tobadonaija ” o ira oqo na Livai, kei na rua na bete o Elisama kei Jorame.

⁹Era sa veivakavulici e Juta, ni sa tiko vei ira nai Vola ni Vunau i Jiova; era sa lako yani ki na veikoro kece e Juta ka vakavulici ira na tamata.

¹⁰Sa lutuka na matanitu kei na vanua taucoko na rerevaki Jiova “ oqo na veivanua vakavolivoliti Juta, ka sa vakavuna na nodra sega ni via valuti Josevata.

¹¹Eso vei ira na Filisitia era sa kauta mai na i loloma vei Josevata, na siliva kei ira na kai Arapea era sa kauta mai e vitu na udolu vitu na drau na me tagane.

¹²Sa tubu cake tiko ga na kaukauwa i Josevata ka sa tara na koro ni valu kei na koro ni maroroi yaya e Juta.

¹³Sa levu na veika e taukena ena veikoro e Juta, kei na tamata qaqa, na tamata i valu era sa tiko e Jerusalemi.

¹⁴Oqo na kedra i wiliwili “ me vaka nai wiliwili ni vuvale i tamadra e Juta, na turaganivalu ni veiyaudolu: O Adena na turaganivalu, sa tiko vei koya e tolu na drau na udolu na tamata qaqa ni vala;

¹⁵taravi koya, o Joanani na turaganivalu, sa tiko vata kei koya e rua na drau walusagavulu na udolu na tamata qaqa ni vala;

¹⁶O Amasai na luvei Sikiri “ o koya sa soli koya vei Jiova, sa tiko vua e rua na udolu na tamata qaqa ni valu.

¹⁷Vei Penijamini; o Eliada na tamata qaqa ni vala, sa tiko vua e rua na udolu na tamata vaka dakai ka vaka i sasabai talega;

¹⁸sa taravi Eliada o Jeosapate ni sa tiko vua e dua na drau walusagavulu na udolu sa vakarautaki oti tu me vala.

¹⁹O ira oqo sa vakarau tu vua na tui, sa sega ni wili kina o ira sa biu tu ki na veikoro ni qaqa e Juta taucoko.