[14] 2 Veigauna 20

¹Ni oti oqori era sa lako mai ka vakacibi i valu o ira na Moape kei ira na Amoni, kei ira tale eso ka ra to vata kei ira na Amoni, me ra mai valuti Josevata.

²Era sa qai lako mai eso ka tukuna vei Josevata, ka vaka, "E dua nai wiliwili levu era sa lako tiko mai oqo vei iko mai na tai kadua ni wasawasa, mai Siria, ka ra sa tiko mai Esasoni Tamari" (oqori o Eniketi).

³Sa rere o Josevata, ka sa vakarautaki koya me vakasaqarai Jiova, ka kacivaka me ra lolo taucoko na tamata e Juta.

⁴Era sa mani soqoni taucoko na Juta me ra kerea na veivuke mai vei Jiova; era sa lako kece talega mai na veikoro kece e Juta me ra mai vakasaqarai Jiova.

⁵Sa qai tucake tu o Josevata e na kedra maliwa na Juta kei Jerusalemi, e na loma ni vale i Jiova, e na mata ni butu rara vou,

⁶ka tukuna: "Isa i Jiova na nodra Kalou na neimami qase, o ni sega li ni Kalou ni lomalagi, o ni sega li ni lewa na veimatanitu kei na veivanua, ka sega li ni tu e Ligamuni na kaukauwa kei na qaqa, me sega kina ni rawa ni duri e dua e Matamuni?

⁷"O ni sega li ni neimami Kalou, o Koya ka vakacemuri ira tani nai taukei ni vanua oqo e matadra na Nomuni tamata na Isireli, ka solia vei ira na kawa i Eparaama na Nomuni i tokani me sega ni mudu?

⁸"Ka ra sa vakaitikotiko kina, ka tara kina vei Kemuni e dua na vale e na Yacamuni, ka tukuna,

⁹'Kevaka e na yacovi keimami na ca “ nai seleiwau, na veicudruvi, mate ca, se dausiga “ keimami na mai tu e na mata ni vale ni soro oqo kei na Matamuni talega ( ni sa tiko na Yacamuni e na vale ni soro oqo), ka tagi yani vei Kemuni e na neimami rarawa, ka o ni na rogoca ka veivakabulai.'

¹⁰"Ia oqo, era sa tu oqo na Amoni, Moape, kei na ulunivanua o Sia, o ira o ni sega ni vinakata me valuti ira o Isireli e na gauna era lako tani kina mai na vanua o Ijipita, ia era a vuki tani mai vei ira ka sega ni vakarusai ira “

¹¹"Era sa tu oqo, me ra sauma vei keimami nira lako mai me vakasavi keimami tani mai na Nomuni vanua o ni a solia vei keimami me keimami taukena.

¹²"Isa na neimami Kalou, o ni na sega li ni lewai ira? Ni sega vei keimami na kaukauwa me keimami vorata rawa kina nai soqosoqo levu oqo era sa lako mai vei keimami; se me keimami kila na ka me keimami na cakava, ia na matai keimami sa rai matua vei Kemuni."

¹³Ia oqo o ira kecega na Juta, o ira talega na nodra lalai, na watidra, kei ira na luvedra, era sa mai tucake tu e na Mata i Jiova.

¹⁴Na Yalo i Jiova sa qai curumi Jeasieli na luve i Sakaraia, na luve i Venaia, na luve i Jieli, na luve i Matanaia, e dua na Livai na luve i Esava, ni tucake tu e na kedra maliwa nai vavakoso.

¹⁵Sa tukuna o koya, "Mo ni rogoca, oi kemuni kecega na Juta kei kemuni kecega na kai Jerusalemi, kei kemuni Josevata na tui! Sa vakaoqo na vosa i Jiova vei kemuni: 'Mo ni kakua ni rere se taqaya e na vukudra nai soqosoqo levu oqo, ni sa sega ni nomuni nai valu, ia sa Nona ga na Kalou.

¹⁶'Ni mataka mo ni na lako sobu ka veivala kei ira. Era na lako cake vakaidina mai ki na Delana o Sisi, ka o ni na kunei ira e na bati ni mataniwai vaka ki na Vanua Liwa e Jerueli.

¹⁷'O ni na sega ni gadrevi mo ni vala e nai valu oqo. Mo ni tuvai kemuni vinaka ga, tu vakadua ka raica na veivakabulai i Jiova, o Koya sa tiko vata kei kemudou, i Juta kei Jerusalemi!' Mo ni kakua ni rere se taqaya; ni mataka mo ni lako yani ka vorati ira, ni sa tiko vata kei kemuni o Jiova."

¹⁸Sa vakacuva sobu na uluna o Josevata ka matana sobu ki na qele, kei ira kecega na Juta kei na kai Jerusalemi era sa cuva sobu e na matai Jiova, ka lotu vei Jiova.

¹⁹O ira na Livai mai vei ira na luve i Koaca kei ira na luve i Kora era sa tucake ka vakavinavinaka vei Jiova na Kalou ni Isireli e na domo e rogo levu ka kaukauwa.

²⁰Era sa mani yadra vakamataka lailai ka lako yani ki na Vanua Liwa e Tekoa; ia ni ra sa lako yani, sa tucake o Josevata ka tukuna, "Mo ni rogoci au, i Juta kei kemuni na kai Jerusalemi: Mo ni vakabauti Jiova na nomuni Kalou, o ni na vakataudeitaki kina; mo ni vakabauti ira na Nona parofita, o ni na vakasaututaki kina."

²¹Ni sa veivosaki oti kei ira na tamata o koya, sa lesi ira me ra na lagasere vei Jiova, kei ira me ra na vakavinavinakataka na totoka ni yalosavasava, ni ra sa lako e matadra na mataivalu ka tukuna: "Me vakavinavinakataki o Jiova, Ni sa sega ni mudu na Nona yalololoma."

²²Ia oqo ni ra sa tekivu me ra lagasere ka vakavinavinaka, sa cakava o Jiova nai lawaki ni valu vei ira na Amoni, na Moape kei na ulu-nivanua o Sia, o ira sa tuvai valu vei Juta; ka ra sa vakadrukai.

²³Baleta ni o ira na Amoni kei na Moape era sa veivorati kei ira nai taukei ni ulu-ni-vanua o Sia me ra vakamatei ira ka vakarusai ira vakadua sara. Ni rau sa vakaoti ira nai taukei ni ulu-nivanua o Sia, e rau sa qai veivakamatematei ga vakairau.

²⁴Ni ra sa yaco mai na Juta ki na dua na vanua cecere ka irova sobu na veikau, era sa rai yani vaka vei ira nai soqosoqo levu; era sa raica walega na yago ni tamata mate ni ra sa veidavoci tu. E sega ni dua e dro bula.

²⁵Ni sa lako yani o Josevata kei ira na nona tamata me ra kauta mai nai toki ni valu, era sa kunea ni sa ka levu sara nai yau e yaga ka tu vei ira na mate, kei nai ukuuku sau levu, era sa dui luvata tani me nodra, e sivia na ka era rawa ni kauta yani; era sa soqona vata tiko me tolu na siga baleta ni sa rui levu.

²⁶E nai kava ni siga era soqoni vata mai ki na Buca e Beraka, maikea era sa cavuta kina na vosa ni veivakacaucautaki vei Jiova; o koya oqo sa vakatokai kina na vanua o ya me Buca e Beraka me yacova mai na siga oqo.

²⁷Era sa qai lesu tale, o ira kecega na Juta kei na kai Jerusalemi, e liutaki ira o Josevata, ni ra lesu tale i Jerusalemi e na reki, ni sa vakavuna o Jiova na nodra reki e na vuku ni ka e yacovi ira na kedra meca.

²⁸Era sa mani lako mai ki Jerusalemi, kei nai vakatagi vakawa, na api kei na bitu ni vakatagi, ki na vale i Jiova.

²⁹Ia na rerevaka na Kalou sa kani ira kecega na veimatanitu ni veivanua oqori ni ra sa rogoca ni sa vala o Jiova kei ira na meca i Isireli.

³⁰Sa qai malumu na veiliutaki i Josevata, ni sa solia vua o Jiova na vakacegu e na veika kecega.

³¹O Josevata e a tui e na vanua o Juta. E sa yabaki tolusagavulu ka lima o koya ni sa tekivu me tui,ka sa lewa mai Jerusalemi me ruasagavulu ka lima na yabaki. Na yaca i tinana o Asuva na luve i Sili.

³²Sa muria o koya nai valavala i Esa na tamana, ka sega ni lako tani mai kina, ka cakava na ka e dodonu e na mata i Jiova.

³³Ia e a sega ga ni kauta tani na veivanua cecere, ni se vo tiko ga vei ira na tamata me ra vakadodonutaka na yalodra vua na Kalou ni nodra qase.

³⁴Ia oqo na vo tale ni veika e cakava o Josevata, na kenai tekivu ki na kenai otioti, era sa volai vakaidina e nai vola i Jeu na luve i Anani, ka sa cavuti e na kedra i vola na tui e Isireli.

³⁵Ni sa oti oqori sa vakaveiwekanitaki koya o Josevata kei Esaia na tui Isireli, o koya e dua na tui i valavala ca.

³⁶Ka rau sa duavata me rau taya eso na waqa me ra soko ki Tasisi, ka rau sa taya na waqa kecega oqori mai Esioni Keveri.

³⁷Ia o Iliesa na luve i Totava mai Maresa sa parofisai e na vuku i Josevata, ka vaka, "Baleta ni o soli iko mo drau cakacaka vata kei Esaia, sa vakarusa kecega o Jiova na nomu cakacaka." Era sa voca kecega na waqa ka vakacacani me ra kakua ni soko rawa ki Tasisi.