[14] 2 Veigauna 31

¹Ni sa oti kece na veika oqo, era sa lako kecega na Isireli era a tiko e kea ki na veikoro kecega e Juta ka vorovorolaka nai cabocabo ni soro, era taya sobu na vei matakau kau, ka vakarusa na veitikina cecere kei na kenai cabocabo ni soro O e Juta taucoko, Penijamini, Ifereimi, Manasa O me yacova ni ra sa vakarusai kece sara. Era sa qai dui suka lesu tale na luve i Isireli kecega ki na nodra veikoro, na tamata yadua ki na nonai votavota.

²O Esekaia sa digitaki ira na dui mata bete kei na Livai me vaka na nodra dui wasewase na tamata yadua ki na nonai tavi, na bete kei na Livai e na vuku ni soro kama, kei nai soro ni veivinakati, me ra veiqaravi, me ra vakavinavinaka, ka vakacerecerei Jiova e na matamata ni tikotiko i Jiova.

³Sa vakarautaka talega na tui e dua nai wasewase ni nonai yau me ka ni soro kama; me baleta nai soro kama ni mataka kei nai soro kama ni yakavi, nai soro kama ni Siga ni Vakacecegu kei na vula vou kei na vei solevu tale sa volai e nai vola ni Vunau i Jiova.

⁴Sa vakaroti ira talega na tamata era tiko e Jerusalemi me ra kauta mai nai katini me ra tokoni kina na bete kei na Livai, me ra na vakadetaki ira tikoga ki nai Vunau i Jiova.

⁵Ena gauna ga sa tarai ira yani kina na luve i Isireli kei Juta nai vakaro oqo, era sa kauta mai vakalevu nai sevu ni vuata kecega, nai sevu ni waini, waiwai, nai sevu ni de-ni-o ni kei na veika kecega sa solia mai na vanua, ka ra sa kauta mai vakalevu nai katini ni veika kecega.

⁶O ira na luve i Isireli kei Juta, o ira sa tiko e na veikoro e Juta, era sa kauta mai nai katini ni bulumakau kei na sipi, nai katini ni veika tabu sa vakatabui me nei Jiova na nodra Kalou ka sa cere tu na kenai binibini.

⁷E nai katolu ni vula, era sa tekivu binia vata, ka taura e va na vula na kena caka tiko na cakacaka oqo.

⁸Ni sa lako mai o Esekaia kei ira na veiliutaki ka raica na veika sa bini tu oqo, era sa vakacerecerei Jiova ka vakalouvinakataki ira na Nona tamata na Isireli.

⁹Sa qai tarogi ira na bete kei na Livai o Esekaia na tui me baleta na veika sa bini tu oqo.

¹⁰Ia o Asaraia na bete, mai na vale i Setoki, sa sauma mai ka vaka, "Me tekivu mai na gauna era sa kauta mai kina na tamata nai soro (solisoli) ki na vale i Jiova, sa qai levu na keimami kakana ka levu talega e vo, ni sa vakalouvinakataki ira na Nona tamata o Jiova; ka sa ka levu na ka sa vo tu oqo."

¹¹Sa vakaroti ira na tamata o Esekaia me vakarautaki na veitikina e na vale i Jiova, ka ra sa vakarautaka.

¹²Era sa kauta mai e na yalodina na nodra i soro, nai katini, kei na veika kece sa vakacabori; o Kononaia na Livai sa nodra i liuliu, kei Simei na tacina sa taravi koya.

¹³O Jeieli, Amasaia, Neaci, Asaeli, Jerimoce, Josevate, Ilieli, Isimakaia, Meaci, kei Venaia era sa vakaraica na veika oqo e na ligai Kononaia kei Simei na tacina, e nai vakaroi Esekaia na tui kei Asaraia nai liuliu e na vale ni Kalou.

¹⁴O Koa na luve i Imina na Livai, nai vakatawa ni Matamata e na Tokalau, sa vakaraica na soli ka ni loloma vei Jiova, na kena wasei nai solisoli vei Jiova kei na veika e tabu sara.

¹⁵Sa tiko e rukuna o Iteni, o Miniamini, Josua, Semaia, Amaraia, kei Sekanaia, o iratou na nonai vukevuke yalodina e na veikoro ni bete, me ra dau wasea nai votavota vei ira na tacidra e na nodra dui wasewase, vei ira na lelevu kei ira na lalai.

¹⁶E yasadra na tagane mai na yabaki tolu me yacovi ira sara sa volai na yacadra e nai vola ni kawabula, era sa wasea vei ira yadua era curuma yani na vale i Jiova na kedra i votavota ni veisiga e na vuku ni nodra veiqaravi, e na nodra dui wasewase,

¹⁷kei ira talega na bete era sa volai e na nodra dui vola ni kawa me vaka na vuvale i tamadra, kei ira na Livai era sa yabaki ruasagavulu ka lako cake ka me vaka na nodra cakacaka, e na nodra dui wasewase,

¹⁸kei ira kece sa volai e nai vola ni kawa O na nodra lalai kei na dui watidra, na luvedra tagane kei na luvedra yalewa, na nodra i wasewase taucoko O e na nodra yalodina, era sa tawasei ira me ra ka tabu sara.

¹⁹Vei ira talega na luve i Eroni na bete, era sa tiko e na vanua mai na nodra veikoro, e na veikoro yadua, sa tu kina o ira sa digitaki na yacadra ka lesi me ra dau wasea nai votavota, vei ira na tagane kece era bete kei ira kecega na Livai sa tu na yacadra e nai vola ni kawa.

²⁰Sa cakava oqo o Esekaia e Juta taucoko, ka sa cakava na veika e vinaka, e dodonu ka dina e na mata i Jiova na nona Kalou.

²¹E na cakacaka kecega sa tekivuna e na kena qaravi na vale ni Kalou, e nai vunau kei nai vakaro, me vakasaqara na Nona Kalou, e cakava e na yalona taucoko. Sa tamata yaco kina o koya.