[14] 2 Veigauna 36

¹O ira na tamata ena vanua era sa tauri Jeoasi na luvei Josaia ka bulia me tui, me sosomitaki tamana e Jerusalemi.

²Sa yabaki ruasagavulu katolu o Jeoasi ena gauna sa tui kina, ka sa lewa ga e Jerusalemi me vula tolu.

³Sa vuaviritaki koya e Jerusalemi o tui Ijipita, ka sa lewa me dau soli nai vakacavacava ni vanua e rua na drau limasagavulu na udolu na dola ki Ijipita.

⁴Na tui Ijipita sa vakatikori tacina oiliakimi me tui e Juta kei Isireli, ka sa veisautaka na yacana me o Joakimi. O Niko sa tauri Jeoasi ka kauti koya tani ki Ijipita. Na Veiliutaki Kei Na Kau Vakavesu Nei Joakimi

⁵Sa yabaki ruasagavulu kalima o Joakimi ena gauna sa tui kina, ka sa veiliutaki me tinikadua na yabaki e Jerusalemi. Sa cakava na ka e ca ena mata i Jiova na nona Kalou.

⁶O Nebukanasa na tui Papiloni sa lako mai me valuti Joakimi ka vesuki koya, ka kauti koya yani i Papiloni.

⁷O Nebukanasa talega sa kauta yani, eso nai yaya mai na vale i Jiova ki Papiloni, ka la'ki biuta sara ena nona vale ni lotu e Papiloni.

⁸Na vo ni veika sa cakava o Joakimi, na veika ca sa cakava o koya, kei na veika ca sa daubeitaki kina o koya, io, era sa volai ena kedra i vola na tui e Isireli kei Juta. O Jeoiakini na luvena sa veiliutaki ena vukuna, me kena i sosomi.

⁹E se qai yabaki walu o Joakini ena gauna sa tui kina, ka sa lewa e Jerusalemi me tolu na vula ka tini na siga. Sa cakava o koya na ka e ca ena mata i Jiova.

¹⁰Ena mua ni yabaki, sa lewa mai o Nebukanasa na Tui vei Joakini me lako yani ki Papiloni vata kei na veiyaya sau levu era tu ena vale i Jiova, ka sa lewa talega me tui o Setekaia na taci Joakimi e Juta kei Isireli.

¹¹E sa yabaki ruasagavulukadua o Setekaia ena gauna sa tui kina, ka sa veiliutaki e Jerusalemi me tinikadua na yabaki.

¹²Sa cakava talega na ka e ca ena matai Jiova na nona Kalou, ka sa sega ni vakamalumalumutaki koya ena mata i Jeremaia na parofita, o koya sa vosa mai na gusu ni Kalou.

¹³E sa vuki tani talega mai vei Tui Nebukanasa, o koya e a cakava vua me bubului ena mata ni Kalou. Ia sa vakaukauwataka ga na domona kei na yalona me kua ni lesu vei Jiova na nodra Kalou na Isireli.

¹⁴O ira kece na nodra i liuliu na bete kei ira na tamata era sa qai talaidredre vakalevu cake ga me vaka na nodra i valavala na veimatanitu kecega, ka era sa vakaduka na vale ni Kalou, o koya sa vakatabui oti mai Jerusalemi.

¹⁵O Jiova na Kalou ni Isireli sa vakauta nai vakaro mai vua na nona tamata nai talai vei ira na Isireli, sa tucake vakamataka ka vakatala yani vei ira baleta ni sa rui lomani ira na nona tamata kei na nona i tikotiko.

¹⁶Era sa mokuta nai talai ni Kalou, ka beca sara na nona vosa ka vakalialia na nona parofita, me yacova ga ni tarai ira na tamata na cudru katakata i Jiova, me yacova ni sa sega ni wali rawa.

¹⁷O Jiova sa kauta mai na tui Kalitia me vakamatei ira na nodra cauravou se goneyalewa, o ira na qase se malumalumu; o Jiova sa soli ira kece vei tui Kalitia.

¹⁸Na i yaya kece mai na vale i Jiova, lelevu kei na ka lalai nai yau talei ni tui kei na nodra na veiliutaki, sa kauta kece ki Papiloni.

¹⁹E ra sa vakama na vale ni Kalou, era sa basuka na bai kei Jerusalemi, ka sa vakamai kece na nona veivale na tui kei na veiyau taleitaki kecega.

²⁰O ira sa dro bula mai nai seleiwau, era sa kau vakabobula ki Papiloni, me ra la'ki dauveiqaravi vei koya na tui kei ira na luvena me yacova ni sa veiliutaki o Perisia,

²¹Me vakayacori kina na vosa ni Kalou ena gusui Jeremaia, me yacova ni sa marautaka na vanua na Siga ni Vakacecegu. Ena veigauna kecega era vakaloloma tiko kina, era sa maroroya na Siga ni Vakacecegu me vakayacori kina na vitusagavulu na yabaki.

²²Ena i matai ni yabaki nei Sairusi na tui Perisia me vakayacori kina na vosa i Jiova mai na gusu i Jeremaia na parofita, o Jiova sa vakayavalata na yaloi Sairusi na tui Perisia, me vakauta kina nai tukutuku ena nona matanitu taucoko ka sa vakaivola talega ka vaka,

²³Sa tukuna o Sairusi na tui Perisia: "Na matanitu kece e vuravura sa solia vei au o Jiova na Kalou, ka sa vakaroti au o Koya me'u tara Vua e dua na vale mai Jerusalemi e Juta. O cei sa tiko oqori kei kemuni na nona tamata? Me tiko vata kei koya o Jiova na nona Kalou, me lako cake o koya!