[47] 2 Koronica 11

¹Isa, au kerea mo dou vosoti au mada ga vakalailai “ au kerea mo dou vosoti au.

²Au vuvutaki kemudou ena vuvu e Vakalou. Ni'u a musuki kemudou vua e dua me watimudou, me'u vakaraitaki kemudou kina ena mata i Karisito ni dou sa savasava sara.

³Ia ka'u sa rere, de dua na ka ena vakacalai kina na lomamudou mai na kena dina kei na kena savasava vei Karisito, me vaka nona vakacalai Ivi e liu na gata ena nona i lawaki ca.

⁴De mani lako mai e dua, ka mai vunautaka vei kemudou e dua tani na Jisu, sega ni o koya keitou dau vunautaka, se dou ciqoma e dua tani na Yalo Tabu ka sega ni koya na Yalo Tabu sa yaco mai vei kemudou e liu, se duatani na kosipeli mai na kosipeli dou sa vakabauta “ dou tovolea mo dou vosota oqori.

⁵Au tukuna oqo vei kemudou, o ira nai apositolo oqori era sega ni uasivi mai vei au.

⁶E dina ni'u sega ni vulica vinaka na vosa, ia au kila na ka au tukuna tiko, Ka dou sa raica na kena vakamatatataki vei kemudou na kecega.

⁷Au sa caka cala beka li ni'u vakamalumalutaki au mo dou vakalevulevui kina. Baleta ni sega ni'u lavaka vei kemudou me saumi na noqu vunautaka nai tukutuku ni Kalou?

⁸Au butakoca beka mai vei ira na veisoqosoqo lotu, nai solisoli, me rawa ni'u veiqaravi kina vei kemudou?

⁹Ni'u tiko ekeri, ni dua na ka au vinakata au sega ni vakaraitaka vei kemudou me'u vakaogai kemudou kina, ni'u leqa oiratou ga na lako mai Masitonia era vukei au mai kina. E sega ni dua bulu mada ga na sede me'u lavaka vei kemudou, ena sega ni rawa ga vei au.

¹⁰Me vaka na dina i Karisito ena noqu bula, ena sega ni rawa me dua e tarovi au, ena noqu vosa doudou ena ka oqo ena yasana vaka Akaia.

¹¹Ena vuku ni cava? Baleta ni'u sega beka ni lomani kemudou? Na Kalou ga sa kila!

¹²Ia, na ka au cakava, au na cakava tikoga, me'u musuki ira laivi kina o ira era vakadokadokataka tiko na nodra cakacaka vua na Kalou, ni ra tukuna era tautauvata kei keitou ena cakacaka.

¹³O ira oqo nai apositolo vakailasu, na nodra cakacaka e veivakaisini, ka ra qai vukici ira tu me vaka nai apositolo i Karisito.

¹⁴Sega ni da qai kurabui ena ka oqo! O Setani e vukici koya tu me vaka na agilosi ni rarama.

¹⁵O koya oqo, e sega kina ni dua na ka levu sara, me vukici koya na nona i talatala me ra vakataki ira nai talatala ni valavala dodonu, ni nodra i tinitini e vakatau mai na nodra cakacaka.

¹⁶Au na cavuta tale, me kakua ni dua e nanuma ni'u lialia, kevaka sa vaka kina vei kemudou, ia dou ciqomi au ga me vaka na lialia, me rawa ni'u tukuna tale kina eso na ka.

¹⁷Na ka au tukuna tiko, sa sega ni nona lewa na Turaga, ia sa vosa ga ni lialia ni'u sa vakalevulevui au ena doudou.

¹⁸Eda raica ni levu era vakaqoroqoroi ena veika vakavuravura, oi au talega au rawa ni uasivi cake sara kina.

¹⁹Sa dua na ka nomudou dokai ira na lialia, oi kemudou sa vuku tu.

²⁰Ka dou sega ni bau via kauwai ena nodra vakasaurarataki kemudou kei na nodra butakoci kemudou, se na nodra lawakitaki kemudou, se na nodra vosa vakaviavialevu, se na nodra sabica na balumudou.

²¹Na neitou madua au sa tukuna kina ni keitou sa malumalumu vaka levu ena ka oqo! Ia kevaka e dua sa doudou ena dua na ka “ oi au talega e rawa ni vosa vakalialia “ ni'u rawa me'u vosa doudou.

²²O ira beka era Iperiu? Au sa vakakina. Era sa luvei Isireli beka? Au sa vaka kina. Era sa kawa beka i Eparaama? Au sa vaka kina.

²³Era talatala li i Karisito? “ au sa vosa me vaka na lialia “ au sa uasivi cake: e levu sara na cakacaka au cakava, au a warolaki ena kuita ka sega ni wili rawa, e levu cake na gauna au tu kina ena vale ni veivesu, ka levu na gauna e dodonu me'u sa mate kina.

²⁴E vaka lima na gauna me ra kuitalaki au kina na Jiu, ena nodra i kuita vaka tolusagavulu ka ciwa me tau e yagoqu.

²⁵Au a mokulaki vakatolu ena kau; au a vakaviriki oti ena vatu; ena noqu veisokoyaki au a voca vakatolu; e dua na bogi taucoko ka dua na siga taucoko au veiciriyaki voli ena loma ni wasa liwa;

²⁶Au taubaletaka e vuqa na sala dredre, au takosova na veiuciwai waluvu, era butakoci au na daubutako, era vakacacani au na kai matanitu tani, au a vaculaki ena loma ni koro, au a vakalolomataki ena vanua dravuisiga, au voleka ni mate ena loma ni wasawasa, au kune ka rarawa mai vei ira na veiwekani vakailasu;

²⁷Au a dauoca ka daurarawa, ena levu na gauna au sega ni daumoce, au a dauviakana ka dauviagunu, e levu na gauna e sega ni dua na kakana me tu e ketequ, edau curumi au na batabata ni lailai nai sulu e yagoqu “

²⁸Ni sa yaco tiko na veika oqori, na cava tale e tarai au tu ena veisiga: e mosita tu na yaloqu na veisoqosoqo lotu.

²⁹O cei sa malumalumu, ia au sa sega ni malumalumu? O cei sa vakacalai, au sega ni via yalokatakata kina?

³⁰Kevaka me'u vaqoroqoroya e dua na ka, au na vaqoroqoroya na veika sa yaco vei au, me'u vakamalumalumutaki au kina.

³¹Na Kalou ka Tama ni noda Turaga o Jisu Karisito, o Koya sa vakarokorokotaki me Sega ni mudu, sa kila ni'u sa sega ni vosa lasu.

³²Mai Tamasiko na Kovana nei Tui o Arita, sa yadrava tiko na koro o Tamasiko, e saga tiko me vesuki au;

³³Ia au a biu ena dua na sova, qai tukuci sobu mai e na katuba leka, ka vakalutulututaki mai ena yasa ni lalaga ni vale, au dro bula rawa mai kina ena ligana.