[47] 2 Koronica 6

¹Keitou sa dau cakacaka vata kei Koya, ka keitou sa kerekere sara vakabibi, mo dou kakua ni vakawaletaka na loloma ni Kalou.

²Ni tukuna o Koya: "Au a rogoci iko ena gauna ni vinakati, kei na gauna ni veivakabulai au a vukei iko." Raica, oqo na gauna ni vinakati; raica, oqo na siga ni veivakabulai.

³Keitou sega ni vinakata me dua e tarabe ena dua na ka, de qai beitaki kina na neitou cakacaka vakai talatala.

⁴Ena ka kecega e yaco, keitou na dau vakaraitaka ni oi keitou nai talatala ni Kalou: keitou vosota na veivakararawataki, sega ni vakani, na gauna ni vei butuki sobu,

⁵Ena veivakanakuitataki, e na biu ki vale veivesu, vaculaki mai na lewe vuqa, vakasaurarataki me cakacaka, moce vakaca, waloloi;

⁶Keitou sauma ena yalo vinaka, ena kila na ka, ena vosota vakadede, ena yalo loloma, ena Yalo Tabu, ena loloma dina,

⁷Ena vosa ni dina, ena kaukauwa ni Kalou, e nai yaragi ni yalododonu ena ligai matau kei na ligai mawi,

⁸Ni keitou dokai se beci, se talanoataki vakavinaka se talanoataki vaka ca, se keitou vakaisini; keitou na dina tu ga;

⁹Keitou sega ni bau kilai, keitou sa kilai ga mai cake; keitou sa vaka na tamata mate, keitou sa bula ga, vakararawataki na yagoi keitou, ia keitou sa sega ni mate.

¹⁰Keitou sa dau kune ka rarawa, keitou sa qai dau reki tikoga; keitou vakadravudravuataki, keitou sa vu ni nodra vutuniyau na lewe vuqa; sega ni keitou liga lala, ia keitou sa qai taukena na veika kecega.

¹¹Kemudou na kai Koronica! Keitou vosa vakadodonu vei kemudou ena yalo e vinaka.

¹²Na nomudou vakaleqai tiko sa baleti kemudou ga, ka sega, ni vuna oi keitou.

¹³Au vosa oqo vei kemudou (me vaka vei ira na gone lailai), me tiko vei kemudou na yalo e rawa ni vakatavulici.

¹⁴Dou kakua ni vakaivua vata kei ira na sega ni vakabauta. A cava sara mada na kena yaga vua na tamata yalododonu me veitokani kina kei na sega yalododonu? Ena rawa vakacava vua na rarama me veiwekani kei na butobuto?

¹⁵E rau sa duavata vakaevei o Karisito kei Piliali? Se rau na cakacaka vata vakaevei, o koya sa vakabauta kei koya sa sega vakabauta?

¹⁶E rau sa lomavata vakaevei na Vale ni Kalou kei na veimatakau? Ni sai kemudou na Vale ni Kalou Bula. Me vaka sa tukuna na Kalou: "Au na tiko vei ira ka lako voli ena kedra maliwa. Au na qai nodra Kalou, era na qai noqu tamata."

¹⁷O koya oqo: "Dou lako tani mai vei ira ka tawasei tu, sa tukuna na Turaga. Dou kakua ni tara na ka sa sega ni savasava, Au na qai ciqomi kemudou."

¹⁸"Au na yaco me tamamudou, oi kemudou dou na qai luvequ tagane kei na luvequ yalewa, sa tukuna na Turaga kaukauwa sara."