[12] 2 Tui 10

¹Era sa lewe vitusagavulu taucoko na luve i Eapi era tiko mai Samaria. Sa mani vola kina eso na i vola o Jeu me vakau yani ki Samaria, kivei ira na i liuliu mai Jesirieli, vei ira na qase, kei ira era susugi ira cake mai na luvei Eapi, ka vaka:

²"E na gauna ga e yaco yani kina vei kemuni na i vola oqo, me vaka ni ra tiko vata kei kemuni na luvedra na nomuni turaga, ka tiko talega vei kemuni na qiqi ni valu kei na ose, na koro vakabai eso, kei na i yaragi,

³Mo ni qai digitaki ira na tamata e uasivi cake mai na luvedra na nomuni turaga, mo ni qai vakatikori koya e na i cewacewa vakatui i tamana, ka dou vala e na vukuni vuvale ni nomudou turaga."

⁴Ia sa ka vakaitamera na nodra rere, ka ra sa tukuna, "Raica, e rau sega mada ga ni tucake rawa e matana e rua na tui; e na qai rawa vakacava vei keda meda tucake?"

⁵Ia o koya e dauqarava na vale, kei koya e nona vakatabakidua na koro, o ira talega na qase, kei ira era a susugi ira cake mai na gone, era sa talaki vei Jeu ka tukuna, "Keimami sa nomu dauveiqaravi, keimami na cakava na veika kecega o ni sa tukuna vei keimami; ia keimami na sega ga ni bulia e dua me tui. Mo cakava ga na ka e vinaka e matamu."

⁶Sa qai vola tale o koya na i karua ni vola vei ira ka vaka: "Kevaka dou totaki au ka muria na noqu vosa, mo dou taura na uludra na luvedra na nomuni turaga, ka dou lako mai vei au ki Jesirieli e na gauna vata vakaoqo ni mataka." O ira na luveni tui tagane e vitusagavulu, era a tiko vata kei ira na tamata qaqa ni koro, ka ra a susugi ira mai.

⁷Sa qai yaco, ni sa yaco mai vei ira na i vola, era sa tauri ira na luve ni tui ka vakamatea e lewe vitusagavulu na tamata, ka ra sa tawana na uludra kina dua na loma ni kato ka vakauta yani vei koya ki Jesirieli.

⁸Sa qai lako mai vua e dua na i talaki ka tukuna vei koya, "Era sa kauta oti mai na uludra na luve ni tui." A sa tukuna o koya, "Mo ni tuvana cake me rua na i binibini e na matamata ni koro me yacova na mataka."

⁹Ia ni sa kida mai na mataka, sa curu yani i tuba o koya ka la'ki tucake tu, ka vosa vei ira kece na tamata, ka vaka, "O ni sa yalododonu, Ia o au, au a naki ca vua na noqu turaga ka vakamatei koya ia, o cei ga e vakamatei ira kece oqo?

¹⁰"Dou kila mada oqo, ni na sega ni lutu e dua na ka ki vuravura baleta na vosa ni Kalou ka sa vosataka oti o Jiova me baleta na vuvale i Eapi ni o Jiova e sa cakava na ka e vosa kina vua na Nona parofita o Ilaijia."

¹¹Sa vakamatei ira taucoko o Jeu na i vovo ni tamata e na vuvale i Eapi mai Jesirieli, kei ira nona tamata qaqa, kei ira era veikilai vakavoleka sara kei ira na nona bete me yacova sara ni sa sega ni vakavoca e dua.

¹²A sa tucake ka lako yani ka sa gole vaka ki Samaria. E na nona i lakolako ena gaunisala vaka ki Peci Eketi ka nodra na i Vakatawa,

¹³Era sa sota vata kei Jeu na taci Asaia na tui Juta, ka vaka, "O cei o kemudou?" Era sa sauma, "Oi keimami na taci Asaia: keimami sa lako sobu mai me veitavaki ka kidavaki ira na luvedra na tui kei na luvedra na tinana na ranadi."

¹⁴Sa qai tukuna o koya, "Dou tauri ira bula!" Era sa tauri ira bula, ka vakamatei ira ena mata ni wai e Peci Eketi, era lewe vasagavulu ka rua na tagane; ka sega ni qai vo e dua me bula.

¹⁵Sa qai biubiu mai keya o koya, ka rau sa mai sota vata sara kei Jionatapi na luvei Rekapi, ka lako tiko mai me rau mai sota; rau veivakabulataki ka tukuna sara yani vua, "E dodonu tiko beka na yalomu, me vaka ni sa dodonu tu na yaloqu vei iko?" Sa sauma yani o Jionatapi, "Io e vakakina." Sa tukuna sara o Jeu, "Kevaka e vakakina, dodoka mai na ligamu." Sa mani dodoka yani na ligana, a sa vueti koya cake vei koya kina nona qiqi ni valu.

¹⁶Sa tukuna sara, "Lako vata mada kei au ka mo mai raica na noqu lomakatakata vei Jiova." E rau sa mani vodo vata sara e na nona qiqi ni valu.

¹⁷Ni sa yaco mai Samaria o koya, sa vakamatei ira taucoko na kena vo e na vuvale i Eapi e Samaria, me yacova ni sa vaqeavutaki ira taucoko, me vaka na vosa i Jiova vei Ilaijia.

¹⁸Sa qai vakasoqoni ira vata taucoko na tamata o Jeu, ka tukuna vei ira, "O Eapi e qaravi Peali vakalailai ga, ia o Jeu e na qaravi koya vakalevu sara.

¹⁹"O koya mo dou qai vakasoqoni ira taucoko mai vei au na parofita i Peali, ira nona tamata dauveiqaravi, kei ira taucoko na nona bete. Me kakua ni yali e dua, ni sa dua na vakacaboi soro levu me'u cakava vei Peali. O koya e na yali kina e na sega ni bula rawa." Ia sa cakacaka vaqaseqase vei ira o Jeu, ni sa nakita voli me vaqeavutaki ira na dauqaravi Peali.

²⁰Sa qai tukuna o Jeu, "Me kacivaki yani me dua na soqoni levu vei Peali." A sa kacivaki sara yani.

²¹Io o Jeu e sa qai vakau i tukutuku yani e loma i Isireli taucoko; ka ra sa yau mai vakalewe levu na i vavakoso i Peali, ka sa sega ni qai vo tale vei ira e dua na tamata e sega ni lako mai. Era sa qai lako kece mai kina vale ni soro i Peali, ka sa sinai vutu coqa na vale ni soro i Peali mai na dua na muana kina dua tale.

²²Sa mani tukuna sara yani o koya vua na dauqarava na kovate balavu ni maroroi i sulu, "Mo kauta mai ki tuba na nodra siqeleti i loma na i vavakoso taucoko i Peali." Sa qai kauta sara mai o koya na nodra siqeleti i loma.

²³E rau sa qai curu sara kina vale ni soroi Peali o Jeu kei Jionatapi na luve i Rekapi, ka tukuna sara vei ira na i vavakosoi Peali, "Mo dou vakasaqara ka raica talega me kakua sara ni tiko vata kei kemudou eke e dua na tamata i Jiova o ira duaduaga na i vavakoso i Peali."

²⁴Era sa mani curu yani me ra vakacabora na i soro kei na i madrali. Ia o Jeu e sa digitaka oti tu e walusagavulu na tamata e tautuba, ka sa tukuna oti tiko vei ira, "Kevaka e dro bula rawa e dua vei ira na tamata au sa kauta mai kina ligamudou, o koya e vakavuna nona dro, ena saumi vakaidina vua e na nona bula."

²⁵Sa qai yaco, ni sa mai tinia na nona vakacaboi soro kama kei na i madrali, sa vosa sara yani o Jeu vei koya na dauyadra kei ira na kavetani, "Dou curu yani i loma ka vakamatei ira; me kakua ni curu mai tuba e dua!" A ra sa vakamatei ira sara e na i seleiwau; ia o ira na dauyadra kei ira na vakailesilesi era sa kolotaki ira mai tuba, ka ra mani curu sara yani kina rumu sara eloma e na vale ni soro i Peali.

²⁶Era sa kauta mai tuba na matakau tabu ni vale ni soroi Peali ka vakama.

²⁷Era sa tamusulaka na matakau tabu i Peali, ka basuraka sobu na vale ni soroi Peali, ka cakava sara mei benubenu me yacova na siga oqo.

²⁸Sa vakaqeavutaki Peali vakaoqo o Jeu mai vei Isireli.

²⁹Ia o Jeu, e ya sega sara ni mani vuki tani mai na i valavala ca i Jeropoami na luve i Nepati, o koya e vakaivalavalacataki ira na Isireli, mai na luve ni bulumakau koula ka tiko mai Peceli kei Tani.

³⁰Sa qai vosa o Jiova vei Jeu, "Baleta ni o sa cakacaka vagumatua e na nomu cakava na ka e vinaka e Mataqu, ka o sa cakava kina vuvale i Eapi na ka kecega sa tu e yaloqu, e ra na dabeca na luvemu na i dabedabe ni vakatulewa e Isireli me yacova na i ka va ni tabatamata."

³¹Ia e sega ni mani vakamuria o Jeu me lako ena Nona i vunau o Jiova na Kalou i Isireli e na yalona taucoko, ka sega ni vuki tani mai na i valavala ca i Jeropoami, ka a vakaivalavalacataki Isireli taumada.

³²E na gauna o ya sa tekivu o Jiova me tamusuka laivi e so na veivanua e Isireli; ka sa la'ki valuti ira o Asaeli e na veitikina taucoko e Isireli

³³Mai na Joritani kina tokalau, na veivanua taucoko e Kiliati “ o Kata, Rupeni, kei Manasa “ mai Aroeri, ka tiko e na bati ni uciwai na Anoni, ka rau oka kina o Kiliati kei Pasani.

³⁴Ia na veika kece e cakava o Jeu, na veika kece e ya cakava, kei na nona kaukauwa kece e sega li ni volai tu e na kedra i vola tukutuku ni veigauna na tui kei Isireli?

³⁵Sa moce vata kei ira na tamana o Jeu, ka ra buluti koya mai Samaria. Sa qai mani taura o Jeoasi na luvena na vakatulewa me kena i sosomi.

³⁶Sa ruasagavulu ka walu taucoko na yabaki na nona lewa e Isireli kei Samaria o Jeu.