[12] 2 Tui 13

¹E nai ka ruasagavulu katolu ni yabaki i Joasi na luvei Asaia, na tui Juta, e sa yaco me tui Isireli mai Samaria o Jioeasi na luve i Jeu, ka mani tinikavitu taucoko na yabaki na dede ni nona lewa.

²E sa dau caka ca o koya e na mata i Jiova, ka ucuya nai valavala ca Jeropoami na luve i Nipati, o koya ka vakai-valavalacataki Isireli. E a sega ni bau biuta laivi o koya.

³Sa qai tubu cake mai na cudru i Jiova vei ira na Isireli, ka sa mani soli ira yani o Koya ki na ligai Asaeli na tui Siria, kei na liga i Peni-Etati na luve i Asaeli, e na nodra veisiga taucoko.

⁴Sa qai vakamamasu o Jioeasi vei Jiova, ka sa rogoci koya o Jiova; ni sa raica o Koya na nodra rarawa na Isireli, ni sa vakararawataki ira o tui Siria.

⁵Ia o Jiova sa qai solia vei ira na Isireli e dua na dauveisereki, ka ra sa mani dro bula mai na ligadra na kai Siria; ka ra sa vakatawana tikoga na nodra vale laca na Isireli me vaka ga mai liu.

⁶Era sa sega ga ni biuta rawa nai valavala ca mai na vuvale i Jeropoami, o koya ka vakaivalavalalcataki Isireli, ia era sa lako muria tikoga; ka se tiko voli ga e Samaria na matakau.

⁷Ni a biuta tu ga mai ki na mataivalu i Jioeasi era lewe limasagavulu na dauvodo ose, tini na qiqi ni valu, kei na tini na udolu na sotia era taubale e yavadra, ni sa vaqeavutaki ira oti o tui Siria ka vakayacori ira me ra kuvu ni qele sa dau samulaki.

⁸Na vo ni cakacaka i Jioeasi, na veika kece e sa cakava o koya, kei na nona kaukauwa, era sega li ni volai ena kedra i vola tukutuku ni veigauna na tui Isireli?

⁹Sa mani moce vata kei ira na nona qase o Jioeasi, ka ra sa buluti koya mai Samaria. Sa qai sosomitaki koya o Jioasi na luvena.

¹⁰E nai ka tolusagavulu kavitu ni yabaki i Jioasi na tui Juta, sa yaco me tui mai Isireli o Jioasi na luve i Jioeasi mai Samaria ka vakatulewa tiko e kea me rauta ni tini ka ono na yabaki.

¹¹Sa daucaka ca sara o koya e na mata i Jiova, ka sega ni biuta laivi o koya nai valavala ca i Jeropoami na luve i Nivati, ka vakaivalavalacataki Isireli, ia sa lakova ka cakava ga.

¹²Ia na kena vo ni cakacaka i Jioasi, na ka kece e cakava, na nona kaukauwa ka vala kina o koya kei Amasaia na tui Juta, e sega beka ni volai e na kedra i vola tukutuku ni veigauna na tui Isireli?

¹³Sa qai moce vata kei ira na nona qase o Jioasi. Sa qai dabeca na nona i dabedabe vakatui o Jeropoama. Sa qai bulu mai Samaria o Jioasi kei ira na tui Isireli.

¹⁴Sa mani tauvi Ilaisa e dua na mate dauveiveitauvi ka sa na mate kina. Sa lako sobu sara mai vei koya o Jioasi na tui Isireli ka tagicaki koya sara e matana, ka tukuna, "Ulei na tamaqu, na tamaqu, na qiqi ni valu i Isireli kei ira na dauvodo ose!"

¹⁵Sa qai tukuna vei koya o Ilaisa, "Mo taura e dua na dakai titi kei na so na gasau." Sa mani taura sara o koya e dua na dakai titi kei na so na gasau.

¹⁶Sa qai tukuna sara o koya vei tui Isireli, "Mo biuta na ligamu e na dakai." Sa biuta sara o koya na ligana e na dakai, ka sa biuta yani oilaisa na ligana ki na dela ni ligana na tui.

¹⁷Sa tukuna sara o koya, "Dolava na katuba leka donuya na tokalau"; ka sa dolava sara o koya. Sa tukuna sara vua o Ilaisa, "Vanataka"; sa vanataka yani o koya. Ka sa tukuna o koya, "Na gasau ni veisereki i Jiova kei na gasau ni veivakabulai mai vei ira na kai Siria; ni dodonu mo samuti ira na kai Siria mai Afeki me yacova ni o sa vaqeavutaki ira."

¹⁸Sa qai tukuna o koya, "Mo taura na gasau;" sa taura sara o koya. Sa tukuna vei tui Isireli o koya, "Samuta na qele"; sa samuta vakatolu, ka qai cegu.

¹⁹Ia sa cudruvi koya na tamata ni Kalou, ka tukuna, "E dodonu mo a samuta vakalima se vakaono; o na samuti Siria talega kina vakaoqo me yacova sara ni o sa vaqeavutaki koya! Ia oqo, o na samuti Siria ga vakatolu."

²⁰Sa qai mai mate o Ilaisa, ka ra sa buluti koya sara. Donuya na vula i tubutubu ni yabaki o ya, era sa cakava mai na kai Moape e dua na kaba vakaivalu.

²¹Sa qai yaco, ni ra sa buluta tiko e dua na tamata; vakasauri era sa raica rawa e dua nai lawalawa batikadi; ka ra sa mani biuta ga yani na tamata o ya ki nai bulubulu i Ilaisa; ia ni ra sa tukuca sobu na yago ni tamata o ya ka tara sara na sui nei Ilaisa, sa bula tale ka tucake tale e yavana. Era Sa Taura Tale Na Isireli Na Veikoro Mai Vei Siria

²²Ia o Asaeli na tui Siria sa vakatotogani Isireli e na gauna taucokoi Jioasi.

²³O Jiova sa lomani ira dina, ka sa yalololoma talega vei ira, ka kauwaitaki ira baleta na Nona veiyalayalati vei Eparaama, Aisake, kei Jekope ka sega ni via vaqeavutaki ira se vakasavi ira tani mai na Nonai Serau.

²⁴Sa qai mai mate o Asaeli na tui Siria. Sa qai vakatulewa o Peni-Etati na luvena.

²⁵Ia o Jioasi na luve i Jioeasi sa taura lesu tale mai e na liga i Peni-Etati, na luve i Asaeli, na veikoro ka a kauta tani e na liga i Jioeasi na tamana e na i valu. E vakatolu na nona vakadrukai koya o Jioasi ka taura lesu tale mai vua na veikoro e nei Isireli.