[12] 2 Tui 2

¹Sa mani yaco, ni sa vakarau o Jiova me kauti Ilaijia cake ki lomalagi e na covulaca, e rau sa lako vata mai Kilikali o Ilaijia kei Ilaisa.

²Sa vosa sara o Ilaijia vei Ilaisa, "Au kerea mo tiko mada eke, ni sa vakatalai au tiko yani o Jiova ki Peceli." Ia sa tukuna o Ilaisa, "Me vaka sa bula o Jiova, ka sa bula vakakina na yalomu, au na sega ni biuti iko!" E rau sa lako vata ruarua yani ki Peceli.

³Era sa lako mai na luvedra na parofita ka ra tiko mai Peceli me ra mai tavaki Ilaisa, ka tukuna vua, "O kila tiko li ni na kauti nomu turaga tani o Jiova mai vei iko e daidai?" Ia sa tukuna o koya, "Io au sa kila; dou tiko lo ga!"

⁴Sa qai tukuna vua o Ilaijia, "Au kerei iko sara vakabibi Ilaisa, mo tiko mada ga e ke, ni sa talai au yani o Jiova ki Jeriko." A sa tukuna, "Me vaka sa bula o Jiova, ka sa bula vakakina na yalomu, au na sega ni biuti iko!" E rau sa yaco sara mai ki Jeriko.

⁵Era sa lako sara na luvedra na parofita ka ra tiko mai Jeriko kivei Ilaisa ka tukuna vua, "O kila tiko li ni na kauti nomu turaga tani mai vei iko o Jiova e daidai?" Sa sauma yani o koya ka vaka, "Io, au sa kila; dou tiko lo ga!"

⁶A sa tukuna vei koya o Ilaijia, "Mo wawa tiko eke, au kerekere vakabibi, ni sa talai au yani o Jiova ki na Joritani." Ia sa vosa o koya ka vaka, "Me vaka sa bula o Jiova, ka sa bula vakakina na yalomu, au na sega ni biuti iko!" E rau sa mani lako ruarua vata yani.

⁷Era lewe limasagavulu na luvedra tagane na parofita era sa lako yani ka ra vakaraici rau tu mai, ni rau sa duri tu oi rau ena bati ni Joritani.

⁸A sa taura na nonai tutuvi o Ilaijia, lobika cake, ka samuta na wai; ka sa tawase rua sara, e rau sa taubale takoso sara yani e na qele mamaca.

⁹Ia sa yaco, ni rau sa takoso rawa ki tai kadua, sa tukuna o Ilaijia vei Ilaisa, "Mo kerea na ka au rawa ni cakava vei iko, ni bera ni'u kau tani yani vei iko?" Sa vosa o Ilaisa ka vaka, "Au kerea kevaka e rawa ni vakaruataki vei au na yalo sa tiko vei iko."

¹⁰Sa vosa o koya ka vaka, "E sa rui dredre na ka o kerea, Ia kevaka ga o raica ni'u sa kau tani mai vei iko, e na qai yaco dina sara na ka oqori; ia, kevaka e sega, e na sega tale ga ni yaco."

¹¹Sai qai yaco, ni sa toso tikoga na nodrau i lakolako ka veitalanoa, sa basika vakasauri mai e dua na qiqi bukawaqa kei na rua na ose bukawaqa, ka tawasei rau sara na rua; ia sa kau cake o Ilaijia ki lomalagi ena covulaca.

¹²Ia sa raica o Ilaisa, ka kacivaka yani, "Na tamaqu, na tamaqu, na qiqi ni valu i Isireli kei ira na kena tamata dau vodo ose!" Sa sega ni qai kunei koya tale. Sa qai taura na nonai sulu ka basuka rua.

¹³Sa taura cake talega o koya nai tutuvi i Ilaijia ka lutu sobu mai vei koya, ka sa lesu tale ka mai tucake tu e na bati ni Joritani.

¹⁴Sa qai taura nai tutuvi i Ilaijia ka a lutu mai vua, ka samuta na wai, ka tukuna, "E vei o Jiova na Kalou i Ilaijia?" Ia ni sa samuta oti na wai o koya, sa tawase rua sara yani; ka takoso sara o Ilaisa i tai kadua.

¹⁵Ia ni ra sa raici o ira na luvedra na parofita mai Jeriko, era sa tukuna, "E sa kabiti Ilaisa na yalo i Ilaijia." Era sa lako mai ka veitavaki kei koya, ka ra sa cuva sobu ki na qele e matana.

¹⁶Era sa tukuna vua, "Mo raica mada, ni ra sa tiko oqo e limasagavulu na tamata qaqa kei ira na nomu dauveiqaravi. Mo ni vakatarai ira mada me ra lako yani ka vakasaqarai koya na nomu turaga, de dua e sa kauti koya cake na Yalo ni Kalou ka biuti koya yani kina veiulunivanua se na veibuca." Sa vosa o koya ka vaka, "Dou kakua ni vakatala e dua."

¹⁷Era sa mani cikevi koya tikoga me yacova sara ni sa la'ki madua, Sa mani tukuna, "Dou talai ira yani!" Era sa mani tala yani e limasagavulu na turaga, ka ra sa vakasaqarai koya me tolu na siga era sa sega ni kunei koya.

¹⁸Ia ni ra sa lesu tale mai vei koya, ni sa tiko ga mai Jeriko o koya, a sa vosa vei ira ka vaka, "E sega beka li ni'u a tukuna vei kemudou, 'Dou kakua ni lako'?"

¹⁹Era sa vosa na turaga e na koro kivei Ilaisa ka vaka, "Mo ni kila mada, ni sa daumaka tu na i tuvaki ni koro oqo, me vaka o ni sa raica noqu turaga; ia na wai ga e sa rui ca, ka sega ni bulabula vinaka tu na qele."

²⁰Sa mani tukuna o koya, "Dou kauta mai vei au e dua na dari vou, ka biuta e loma na masima." Era sa qai kauta mai kivei koya.

²¹A sa lako yani o koya kina i vurevure ni wai ka kaburaka yani kina na masima, ka tukuna, "Sa tukuna vakaoqo o Jiova; 'Au sa vakabula na wai oqo; ena sega tale ni qai yaco kina na mate se na sega ni vuavuai.'"

²²A sa vakabulai tiko mai na wai me yacova na siga oqo, me vaka na vosa sa cavuta o Ilaisa.

²³A sa cavutu mai keya o koya ki Peceli; ia ni sa lako cake tiko e na sala, era sa lako mai na koro eso na i taba gone ka vakalialiai koya, ka tukuna vua, "Lako cake tu, na ulucou!"

²⁴A sa rai vuki mai o koya me raici ira, ka sa vatonaki ira e na yaca i Jiova. E rau sa basika mai e loma ni veikau e rua na pera yalewa ka basuraki ira na lewe vasagavulu ka rua na i taba gone.

²⁵A sa lako mai keya o koya kina Ulunivanua o Kameli, mai keya e sa lesu tale i Samaria.