[10] 2 Samuela 13

¹O Apisalome na luvei Tevita sa dua tiko na ganena rairai vinaka, na yacana o Tema; o Aminoni na luvei Tevita sa dau domoni koya.

²Na levu ni nona dodomo sa vakavuna kina me tauvimate, ni se goneyalewa savasava o Tema. Oqo na vuna e sega ni cakava rawa kina vua e dua na ka o Aminoni.

³Sa dua tiko nai tokani vinaka nei Aminoni na yacana o Jonatave na luvei Simea, na taci Tevita. Sa tamata lawaki levu sara o Jonatave.

⁴Sa tukuna sara vei Aminoni, "Na cava na vuna o sa lila tikoga kina e veisiga?" O iko na luve ni tui, e sega beka ni o na tukuna mai vei au? Sa qai tukuna vua o Aminoni, "Raica au sa rui domoni Tema vakalevu na ganei Apisalome na taciqu."

⁵Sa tukuna vua o Jonatave, "Davo tiko ena nomui davodavo me vaka e dua sa tauvimate levu. Ni sa lako mai o tamamu ka raici iko, tukuna vua, 'Au kerea, me lako mada mai o Tema na ganequ, me solia na kequ, me vakarautaka na kequ e mataqu, me'u raica ka kania mai ligana.'"

⁶Sa davo tiko o Aminoni ka vakamatematei koya sara tu, ni sa lako mai na tui ka raici koya “ sa tukuna sara vua na tui, "Au kerea me lako mada mai o Tema me cakava mada e so na keke e mataqu, me'u qai kania mai ligana."

⁷Sa talatala o Tevita vei Tema ka vaka: "Lako ki na vale nei ganemu o Aminoni ka vakarautaka na kakana vua."

⁸Sa lako ki na vale nei Aminoni o Tema, sa davo tiko o Aminoni. Sa taura na falawa ka vakarautaka na keke e matana ka vavia.

⁹Sa kauta mai na kakana ka biuta e matana me kana “ ia, sa bese ga ni kana o Aminoni. Sa vosa yani o Aminoni, "Me lako tani kece na tamata mai mataqu." Era sa lako tani kece yani.

¹⁰Sa tukuna o Aminoni vei Tema, "Kauta mai na kakana ki noqu rumu ni moce me'u kana kina mai ligamu." Sa kauta mai na keke o Tema vei Aminoni na ganena ki nona rumu ni moce.

¹¹Ni sa kauta mai na madrai ki vua me kana, sa vesuki koya o Aminoni ka tukuna vua, "Lako mai na ganequ, daru mai davo mada."

¹²Sa sauma vua o Tema, "Sega na ganequ, kua ni tauri au vakaukauwa, sa sega ni dodonu me caka na ka oqo e Isireli, kua ni cakava na ka veivakatorosobutaki oqo!

¹³"O au, me'u kauta ki vei na noqu vakamaduataki oqo? Kei iko, o na vaka e dua na lialia e Isireli. Au kerea, mo vosa vua na tui, ni na sega ni bureitaki au vei iko o koya."

¹⁴Sa sega ga ni via rogoca na domona; baleta ni sa kaukauwa cake, sa qai tauri Tema vakaukauwa ka kucuvi koya.

¹⁵Sa ca vakalevu na yalo i Aminoni vei Tema, sa levu cake na kena ca, mai na nona a domoni koya e liu. Sa tukuna vua o Aminoni, "Mo tucake, ka lako tani!"

¹⁶Sa tukuna o Tema vua, "Me kua sara, na ca ni nomu vakatalai au, ena levu cake mai na ca ni nomu kucuvi au." Sa sega ga ni via rogoci koya o Aminoni.

¹⁷Sa kacivi ira mai na dauveiqaravi ka tukuna, "Raica, me kautani na yalewa oqo mai vei au ka vakota na katuba ni sa lako yani."

¹⁸Sa daramaka tiko o Tema e dua nai sulu duirokaroka mei vakatakilakila ni goneyalewa savasava ka luve ni tui. Era sa biuti koya e tuba ka vakota na katuba.

¹⁹Sa boroya na dravusa e uluna o Tema ka basubasuka nai sulu duirokaroka e tokara tiko ka biuta na ligana e uluna ka lako yani ni sa tagi vakararawa tiko.

²⁰Sa tarogi koya o Apisalome na ganena, "Sa moceri iko o Aminoni na ganemu? Mo tauri iko vakamalua na ganequ “ o koya e ganemu, mo kua ni kauta sara e lomamu na ka oqo." Sa tiko ga e vale nei Apisalome o Tema.

²¹Sa cudru vakalevu na Tui o Tevita ni sa rogoca na veika oqo.

²²O Apisalome sa sega ni tukuna e dua na ka vinaka se ka ca vei Aminoni na tacina, ni sa cati Aminoni o Apisalome baleta ni a kucuva na ganena o Tema.

²³Sa oti e rua vinaka na yabaki, o Apisalome sa kotivi ira tiko na sipi mai Peali-Asori, oqo sa voleka i Ifereimi; sa sureti ira kece na luve ni tui o Apisalome.

²⁴Sa lako mai o Apisalome vua na tui ka tukuna, "Mo raica ni ra sa kotiva tiko na sipi na dauveiqaravi, au kerea me lako na tui kei ira na nona tamata vata kei na nona dauveiqaravi."

²⁵Sa tukuna na tui vei Apisalome, "Sega na luvequ, me kua ni da lako kece, de keimami vakaocaoca vei iko." Sa cikevi tamana tiko “ ia, sa sega ga, sa qai vakalouvinakataka ga.

²⁶Sa qai kerea o Apisalome, "Kevaka o sa sega ni lako, ia, me lako mai o Aminoni na taciqu." Sa tukuna mai na tui, "Na cava me lako kina o Aminoni vata kei kemuni?"

²⁷Sa cikecike ga o Apisalome, sa qai vakatarai Aminoni, na tui, me lako, kei ira kece na luve ni tui me lako vata kei koya.

²⁸Sa vakaroti ira oti na nona tamata o Apisalome ka vaka: "Mo ni raica tiko ni sa mamarau tiko vakalevu o Aminoni ena waini, ka sa yaco me'u tukuna yani, 'Mo ni mokuta, mo ni vakamatei koya sara!' Mo ni kua ni rere, sa sega beka ni'u vakaroti kemuni? Mo ni yalovakatagane ka yatedei."

²⁹O ira na tamata nei Apisalome era sa cakava vei Aminoni me vaka sa vakarota o Apisalome. Era sa tucake kece na luve ni tui “ o ira vakayadua sa ciciva na nodra Meule ka dro yani.

³⁰Sa qai yaco, ni ra se dro tiko yani, sa yaco vei Tevita nai tukutuku ka vaka: "O Apisalome sa vakamatei ira kece na luve ni tui, ka sa sega ni dua e vo!"

³¹Sa tucake na tui ka dresulaka na nona i sulu ka davo ki na qele, era sa tu kece e yasana na nona tamata ka sa dresulaki talega na nodra i sulu.

³²O Jonatave na luvei Simea na taci Tevita sa vosa mai ka vaka: "Me kua ni nanuma na noqu turaga ni ra sa mate kece oqo, na luve ni tui, ni o Aminoni duadua ga sa mate. Ni oqo nai vakaro nei Apisalome, mai na siga e a kucuvi Tema kina na ganena.

³³"O koya oqo, me kua ni kauta sara kina ki yalona na tui, me nanuma ni ra sa mate kece na luve ni tui."

³⁴Sa dro o Apisalome. Na cauravou sa vakatawa tiko, sa rai yani “ sa raici ira na lewevuqa era sa lako tiko mai ena sala mai delana e na nodra muri tiko yani.

³⁵Sa tukuna o Jonatave vua na tui, "Raica, era sa lako tiko mai na luve ni tui; me vaka sa tukuna na nomuni tamata, sa vaka kina."

³⁶Sa yaco vaka kina, ni sa oti tikoga na nona vosa vua na tui, era sa yaco dina mai na luve ni tui. Era sa tabalaka na domodra ka qoqolou. Era sa tagi talega na tui kei ira na nona tamata.

³⁷O Apisalome sa dro ka lako sara ki Talemai na luvei Ameuti na tui Kesuri. Sa tagicaki na luvena tiko o Tevita ena veisiga.

³⁸Sa dro o Apisalome ka yaco ki Kesuri, sa tiko mai kea me tolu na yabaki.

³⁹Sa vinakata o Tevitana Tui me lako vei Apisalome. Sa vakacegu oti o koya ena vuku i Aminoni baleta ni sa mate oti.