[10] 2 Samuela 16

¹Ni sa lako sivia yani na dela ni ulunivanua o Tevita, sa rau sota kei Sipa na dauveiqaravi nei Mefiposeci, sa mai sotavi Tevita kei na vica na asa. Sa vakavodoki tu ena asa oqo e rua na drau nai buli madrai, dua na drau nai soso vaini, dua na drau na vuata ni vula i katakata kei na dua na saqa waini.

²Sa tukuna na tui vei Sipa, "Na cava o sa nanuma mo cakava ena ka oqo?" "Na vuvale vakatui me ra vodo kina, na madrai kei na vuata me kedra na cauravou, kei na waini me ra gunuva o ira sa malumalumu ena vanua liwa."

³Sa tukuna na tui, "Sa evei ga na luvena na nomu turaga?" Sa sauma o Sipa vua na nona turaga, "Sa tiko vakaidina mai Jerusalemi o koya, ni sa tukuna, 'Ena siga oqo na vuvale e Isireli ena vakatikora lesu na matanitu nei Tamaqu vei au.'"

⁴Sa tukuna na tui vei Sipa, "Na veika kece sa nei Mefiposeci, sa nomu." "Ena yalomalumalumu au sa cuva vei kemuni, me'u kune loloma kina e matamuni, na noqu turaga na noqu tui!" Sa sauma yani o Sipa.

⁵Ni sa lako mai ki Baurimi na tui o Tevita, sa dua na tamata mai na vuvale i Saula, na yacana o Simei na luve i Kira. Sa ruru ka veirukaki tikoga ni sa lako tiko mai.

⁶Sa vakaviriki Tevita ena vatu kei ira kece talega na nona tamata. O ira kece na tamata era sa tu vata kei Tevita kei ira na tamata qaqa e nai matau kei nai mawi.

⁷Ni sa ruru tiko o Simei sa tukuna tiko, "Lako mai, lako mai “ tamata daugunu dra, tamata siosio, viavialevu!

⁸"O Jiova sa kauta mai vei iko na dra kece ni vale i Saula, o sa mai veiliutaki tiko kina; ka sa solia kina na matanitu o Jiova vei Apisalome na luvemu. Oqo o sa vesuki ena nomu ca, baleta ni o sa tamata dau via gunu dra!"

⁹O Apisai na luvei Seruia sa tukuna vua na tui, "Na cava e rukaka kina na tui na koli dukalevu oqo? Laivi au me'u lako yani ka musulaka laivi na domona!"

¹⁰"Na cava me'u cakava vei iko na luvei Seruia? Laiva me ruru me vaka sa solia vei koya o Jiova, 'Rukaki Tevita' “ O cei tale me tukuna, 'Na cava o sa cakava kina oqo?'"

¹¹Sa tukuna o Tevita vei Apisai kei ira kece na nona tamata, "Raica na luvequ sa lako mai na yagoqu dina sa vakasaqara na noqu bula. Qai vakacava li na kai Penijamini oqo? Laivi koya “ laiva me ruru tiko; ni sa vakaroti koya tiko na Kalou.

¹²"Sa rawa ni o Jiova sa vinakata me raica na noqu vakararawataki “ o Jiova ga ena sauma vei au ena vinaka ena vuku ni nona ruru ca ena siga oqo."

¹³Ni ra sa lako yani ena sala o Tevita kei ira na nona tamata. O Simei sa lako ena yasana ka dua, ka ruru ca tiko mai, ka viriviri tiko mai ena vatu, ka caqeta tiko mai na kuvu ni soso.

¹⁴Na tui kei ira kece sa tiko vata kei koya era sa wawale. Era sa vakabulabulataki ira tale e keya.

¹⁵O Apisalome kei ira kece na Isireli era sa lako mai ki Jerusalemi. Sa tiko vata kei ira o Eitofeli.

¹⁶Sa yaco o Usaia na Akiti nai tokani nei Tevita sa lako mai vei Apisalome ka tukuna, "Me bula balavu na tui! Me bula balavu na tui!"

¹⁷Sa tukuna mai o Apisalome vei Usaia, "O koya beka oqo na nomu veitokoni vua na wekamu voleka? Na cava o sega ni lako kina vata kei koya?"

¹⁸Sa sauma o Usai vei Apisalome, "E sega, ocei era digitaka na Isireli au na tiko kina, au na tiko ga kina.

¹⁹"Me kena i kuri, o cei me'u na qarava? Me'u kua ni qarava ena mata ni luvena? Me vaka ni'u sa veiqaravi ena matai tamana, ena vaka kina e matamu."

²⁰Sa tukuna o Apisalome vei Eitofeli, "Solia nai vakasala ena veika meda cakava."

²¹Sa tukuna o Eitofeli vei Apisalome, "Lako vei iratou na watina lalai na tamamu, era sa biu tu mai me raica na vale “ era na rogoca kece na Isireli ni o sa cati mai vei tamamu. Na ligadra kece sa tiko vata kei iko sa na qai kaukauwa mai."

²²Era sa qai vakaduria e dua na vale laca ena dela ni vale vei Apisalome. Sa qai dau tiko vata kina kei ira na wati tamana lalai ena matadra kece na Isireli.

²³Nai vakasala nei Eitofeli sa solia ena gauna o ya “ sa vaka ga e dua sa taura mai nai vakasala mai vua na Kalou. Sa vakakina nai vakasala nei Eitofeli vei Tevita kei Apisalome.