[10] 2 Samuela 23

¹Oqo nai otioti ni vosa nei Tevita, ka sa vaka: sa tukuna o Tevita na luvei Jese, na tamata sa vakatuburi cake, nai lumuti ni Kalou i Jekope, na daunisame kamikamica e Isireli:

²"Na yalo ni Kalou sa vosa vei au, ka sa tiko e yamequ na nona vosa.

³Na Kalou ni Isireli sa tukuna mai, sa vosa vei au na Uluvatu ni Isireli: 'O Koya sa vakatulewa vei ira na tamata, me dodonu, ka veiliutaki ena rerevaka na Kalou.

⁴E dodonu me vaka na rarama ni mataka ni se qai cadra mai na matanisiga, na mataka e sega na kena o, me vaka na buroro mai ni veico era cacalivaliva mai ni se qai tauca oti na uca.'

⁵"E dina ni sega ni vakakina na noqu vale vei Jiova, sa cakava vei au e dua na veiyalayalati e sega ni mudu, sa vakarautaki ena veika kecega me tudei, ni oqo na noqu vakabulai kei na noqu gagadre; ena sega beka ni na vakatubura o Koya?

⁶O ira kece na gone ni talaidredre, era na vaka na voto ni kau sa musuki tani, baleta ni ra sa na sega ni tuberi rawa ena liga.

⁷Ia, na tamata ena tarai ira, e dodonu me tiko e ligana na kaukamea, na kaukamea ni tolo ni moto, me ra vakamai kece sara ena bukawaqa ena vanua era dui tu kina."

⁸Oqo na yacadra na tamata qaqa era sa tiko kei Tevita: O Josebi-Basebeci na Takamoni, na nodra i liuliu nai liuliu “ sa yacana talega o Adina na Eseni, baleta ni sa vakamatea e walu na drau na tamata ena dua ga na gauna.

⁹Ai karua o Iliesa na luvei Dodo na Aoite, e dua vei iratou na lewe tolu vata kei Tevita, e ratou sa bolei ira na Filisitia ni ra sa lako tiko mai me vala “ Ni ra sa via dro tiko na Isireli.

¹⁰Sa tucake ka valuti ira na Filisitia me yacova ni sa malumalumu mai na ligana, ia sa taura matua tikoga nai seleiwau. Sa vakavuna e dua na qaqa levu ena siga o ya “ era sa lesu mai na tamata ka taura ga vakaveitalia na ka era via taura.

¹¹Sa tarava yani o Sama na luvei Aki na Araraite. Era sa tuva mai na Filisitia ena dua na vanua sa sinai kina na bini. Era sa dro na Isireli mai vei ira na Filisitia.

¹²Ia, o Sama sa tuvakadua ena loma ni veiwere (bini), ka tataqomaki, ka vakamatei ira na Filisitia. Sa kauta mai kina o Jiova e dua na qaqa levu.

¹³E tolu vei ira na tolusagavulu na i liuliu sa lako sobu ki na tatamusuki ka lako mai vei Tevita ena qara vatu mai Etulama. Era sa wawa tiko na Filisitia ena Buca mai Refaimi.

¹⁴Sa tiko o Tevita ena vanua cecere, kei ira na Filisitia e Peceliema.

¹⁵Sa tukuna o Tevita, "Me dua mada ga e solia vei au na wai mai Peceliema me'u gunu kina, mai na matamata ni koro!"

¹⁶E ratou sa lako na tolu na tamata qaqa oqo ka basuka yani na nodra i tikotiko na Filisitia “ takiva na wai mai Peceliema, mai na matamata ka kauta mai vei Tevita. Sa sega ni gunuva, ia, sa sova yani vua na Kalou o Jiova.

¹⁷Sa tukuna kina, "Me kua sara vei au Jiova, me'u cakava na ka oqo! sa sega beka ni oqo, na nodratou dra na tamata e ratou sa sega ni kauwaitaka na nodratou bula?" Sa sega ni via gunuva o Tevita. Oqo na ka e ratou sa cakava na tamata qaqa oqo.

¹⁸O Apisai na taci Joape na luvei Seruia sa nodratou i liuliu e tolu tale. Sa laveta na ligana vei ira e tolu na drau na tamata ka vakamatei ira, ka sa liu kina na yacana mai vei iratou na lewe tolu oqo.

¹⁹Sa sega beka ni dokai cake vei iratou na lewe tolu oqo? Oqo sa nodratou i liuliu kina o koya. Ia, sa sega ga ni yacovi iratou nai matai ni tolu.

²⁰O Penaia na luvei Joata, na luve ni qaqa mai Kabasili “ o koya sa cakava e levu na veika lelevu. Sa vakamatei rau e rua na tamata qaqa me vaka na laione mai Moape. Sa lako sobu ka vakamatea e dua dina na laione ena loma ni dua na qara, ena dua na siga batabata sara.

²¹Sa vakamatea talega e dua na kai Ijipita, e tamata qaqa. Sa tiko e ligana na kai Ijipita e dua na moto “ sa lako yani o Penaia vata kei na dua na i titoko. E rau sa vei mulomulo kei na kai Ijipita, ka sa taura na moto mai ligana, ka vakamatea na kai Ijipita oqo ena nona moto ga.

²²Na ka oqo sa cakava o Penaia na luvei Joata ka sa liu kina vei ira na tamata qaqa oqo.

²³Sa tamata dokai sara vei ira na tolusagavulu na tamata qaqa oqo. Sa sega ga ni yacova yani na i matai ni tolu. Sa digitaki koya o Tevita mei liuliu ni nona mata yadra.

²⁴O Aseli na taci Joape, sa dua vei ira na tolusagavulu. O Ecanani na luvei Dodo mai Peceliema,

²⁵O Sama na Arotaite, O Elika na Arotaite,

²⁶O Elesi na Palataite, O ira na luvei Ikesi na Tekoite,

²⁷O Apiesa na Anacoci, O Mebunai na Asuaite,

²⁸O Salimoni na Aoaite, O Maerai na Nefofate,

²⁹O Elepi na luvei Baena na Nefofate, O Itai na luvei Ribai mai Kipea vei ira na luvei Penijamini,

³⁰O Penaia na Piratonaite, O Idai mai na veimataniwai mai Qaesi,

³¹O Abi-Aliboni na Abataite, O Asimaveci na Baumaite,

³²O Eliaba na Saelibone (mai vei ira na luvei Jaseni) Jonacani,

³³O Sama na Araraite, O Aiame na luvei Sarari na Araraite,

³⁴O Alifalate na luvei Asabai na luvei Maekataite, O Eliame na luvei Aitofeli na Kilioni.

³⁵O Esarai na kai Kameli, O Paerai na kai Abi,

³⁶O Ikali na luvei Nacani mai Soba, O Bani na Kata,

³⁷O Seleki na Amoni, O Naerai na Biroce (na daucola yaragi nei Joape na luvei Seruia),

³⁸O ira na Iceraite, O Karebi na Iceraite,

³⁹Kei Uraia na Itaiti “ Era lewe tolusagavulu ka vitu kece.