[10] 2 Samuela 3

¹Oqo, sa qai dua nai valu balavu ena kedrau maliwa na vale nei Saula kei na vale nei Tevita. Sa kaukauwa cake tikoga o Tevita, ka sa malumalumu tiko ga mai o Saula.

²Sa sucu vei Tevita na gonetagane mai Epironi. Na ulumatua o Amoni, mai vei Ainoami na Jeserieli;

³Nai karua o Kiliape mai vei Apikali na yada mai vei Nepali na kai Kameli; nai ka tolu o Apisalome na luvei Maika na luvei Talimai yalewa na tui Kesure;

⁴Nai kava o Atonaija na luvei Aqici; nai kalima o Sefatia na luvei Abitali;

⁵Nai kaono oicerimi na luvei Ekila na wati Tevita. Oqo era sa sucu vei Tevita mai Epironi.

⁶Sa qai yaco, ni rau se vala tiko na vale nei Saula kei na vale nei Tevita, sa kukube kaukauwa tikoga o Epana vei Saula.

⁷Sa dua tiko na wati Saula lailai, na yacana o Risipa na luvei Aia. Sa tukuna o Isiposeci vei Epana, "Na cava o sa laki mocera kina na watina lailai na tamaqu?"

⁸Sa cudru sara ga vakalevu o Epana ena vuku ni vosa nei Isiposeci ka qai tukuna, "O au beka e dua na ulu ni koli e taukena o Juta? Ena siga oqo au sa solia tiko na noqu veitokoni ki na vale i Saula na tamamu, vei ira na tacina kei ira na nona i tokani, ka sega ni soli kemuni ki na liga i Tevita; o sa dusi au ena siga oqo ena dua na cala me baleta na yalewa oqo?

⁹"Me cakava talega na Kalou vei Epana, ka vakalevu, kevaka au na sega ni cakava ena vuku i Tevita, me vaka sa yalayala vua na Kalou o Jiova”

¹⁰"Me solia na matanitu mai na vale i Saula ki na vale i Tevita, ka tara cake na nona i tikotiko vakaturaga e Isireli kei Juta talega, mai Tani ki Perisepa."

¹¹Sa sega ni sauma rawa tale e dua na vosa vei Epana, baleta ni rerevaki koya.

¹²Sa vakauta na i tukutuku o Epana ena vukuna vei tevita ka tukuna, "E nei cei na vanua?" Sa tukuna talega, "Mo cakava vakatotolo e dua na veidinadinati vata kei au, ena qai tiko vakaidina kei iko na ligaqu me ra kau kece mai na Isireli vei iko."

¹³Sa qai tukuna o Tevita, "Vinaka, au na cakava e dua na veidinadinati kei iko, ia e dua na ka au gadreva vei iko: O na sega ni raica na mataqu me yacova ni o sa kauti Mikeli mada mai e liu, na luvei Saula, ni o sa lako mai me raica na mataqu."

¹⁴Sa vakauta nai tukutuku o Tevita vei Isiposeci, na luvei Saula ka tukuna, "Mo soli Mikeli na watiqu mai, o koya au a musuka me watiqu ena duanadrau na vusodra na kai Filisitia."

¹⁵O Isiposeci, sa talatala ka tauri mai o Mikeli mai vua na tagane e rau sa tiko vata, mai vei Palatieli na luvei Laisi.

¹⁶Sa lako vata kei koya na tagane oqo ki Baurimi, ka tagi muri koya tiko. Sa tukuna vua o Epana, "Mo lesu tale!" A sa lesu tale.

¹⁷O Epana sa veivosaki kei ira na qase e Isireli ka tukuna, "Ena veigauna sa oti, o ni sa dauvakasaqarai Tevita me tui vei kemuni.

¹⁸"Oqo mo ni cakava sara, ni sa vosa o Jiova vei Tevita ka vaka: 'Ena ligana na noqu tamata o Tevita, au na vakabulai ira kina na noqu tamata na Isireli mai na ligadra na Filisitia kei na ligadra kecega na meca.'"

¹⁹Sa vosa tiko o Epana ena nodra vakarorogo na Penijamini. Sa vosa talega o Epana ni vakarorogo tiko o Tevita mai Epironi, na veika kece me vinaka kina o Isireli kei Penijamini.

²⁰O Epana kei na ruasagavulu na nona tamata era sa lako mai vei Tevita e Epironi. Sa cakava e dua na solevu o Tevita vei Epana kei ira sa tiko vata kei koya.

²¹Sa tukuna o Epana vei Tevita, "Au na tucake ka lako me'u soqoni ira kece mai na Isireli vua na noqu turaga na tui, me ra mai cakava e dua na veidinadinati kei kemuni, mo ni na lewa kina vei ira kecega o ni sa vinakata e yalomuni." Sa vakatalai Epana yani o Tevita, ka sa lako ena vakacegu.

²²Ena gauna o ya, o ira na tamata nei Tevita kei Joape era sa lesu mai ena dua na kaba vakaivalu ka era sa kauta mai e levu sara nai toki ni valu. Sa sega ni tiko vata kei Tevita e Epironi o Epana, ni sa vakatalai yani, ka lako ena vakacegu.

²³Ni sa lako mai o Joape kei ira kece na nona i valu, sa tukuni sara vua ka vaka, "O Epana sa lako mai vua na tui, ka sa vakatalai yani, ka sa lako talega ena vakacegu."

²⁴Sa lako mai vua na tui o Joape ka tukuna, "Na cava o sa cakava? Raica sa lako mai vei iko o Epana, na cava o sa vakatalai koya yani kina, ka sa mani lako?

²⁵"O sa kila vakaidina ni sa lako mai o Epana na luvei Neri me vakaisini iko “ me kila na nomu lako yani kei na nomu curu mai, ka me kila kecega na veika o sa cakava tiko."

²⁶Sa lako tani mai na matai Tevita o Joape, ka sa vakatala nai talai me muri Epana, ka sa laki kau lesu mai ena wai mai Sira. Sa sega ni kila o Tevita.

²⁷Ni sa lesu mai ki Epironi o Epana, sa kauti koya vakatikitiki mai na matamata o Joape ka vosa duadua vua. Sa suaka na ketena, ka sa mate ena vuku ni dra nei Aseli na taci Joape.

²⁸Ni sa oti oqo, sa qai rogoca o Tevita, sa tukuna sara, "Na noqu matanitu kei au sa sega ni beitaki ena mata i Jiova me sega ni mudu ena vuku ni dra nei Epana na luvei Neri.

²⁹"Me toka ga ena ului Joape kei na vuvale nei tamana; me kakua ni yali mai na nona vale, na vale nei Joape na turi dra, na vukavuka, na kukuna kei na via kana."

³⁰O Joape kei Apisai na tacina, e rau sa vakamatei Epana, baleta ni sa vakamatea na tacidrau o Aseli mai Kipioni ena i valu.

³¹Sa tukuna o Tevita vei Joape kei ira kecega na tamata sa tiko vata kei koya, "Mo ni basuraka na nomuni i sulu ka daramaka nai sulu taga, ka tagicaki Epana." Sa muria na kato ni mate o Tevita.

³²Era sa buluti Epana mai Epironi, sa tagi vakadomo i levu o Tevita ena i bulubulu i Epana, ka era sa tagi kecega na tamata.

³³Sa dua na tagi i Tevita na tui sa vaka: "Me mate o Epana me vaka e dua na lialia?

³⁴Sa sega ni vesu na ligamu, se me vesuki na yavamu; me vaka sa vakamatei e dua mai vei ira na daucaka ca, o sa mata vakakina." Era sa tagicaki koya na tamata kecega.

³⁵Ni ra sa lako mai na tamata me vakauqeti Tevita me kana ni se siga tiko. Sa bubului o tevita ka tukuna, "Me vakayacora na Kalou vei Tevita ka vakalevu kevaka au sa tovolea na madrai se dua tale na ka, me yacova na lako sobu ni matanisiga!"

³⁶Era sa kila na tamata kecega ka era sa yalovinaka kina, ni veika ga e cakava na tui sa rui vinaka vei ira na tamata.

³⁷Ni ra sa kila na tamata kecega kei ira kecega na Isireli ni sa sega ni i naki ni tui me vakamatei Epana na luvei Neri.

³⁸Sa tukuna na tui vei ira na nona tamata, "O ni sa sega beka ni kila ni dua?

³⁹"Au sa malumalumu sara e daidai, e dina ni'u tui lumuti; kei na tamata oqo na luvei Seruia, sa rui kaukauwa vei au. O Jiova ena sauma vua na daucaka ca me vaka na nona ca."