[53] 2 Cesalonaika 2

¹Vei kemudou na veiwekani; me baleta tiko ga na nona lako mai na noda Turaga o Jisu Karisito kei na noda veisotavi kei koya, keitou kerei kemudou kina,

²Mo dou qarauna na nomudou vakasama me kua ni moici rawarawa, se dua na ka me yavalati kina na yalomudou se dua e vosa vei kemudou se dua e volavola vei kemudou, (me vaka sa mai vei keitou) me vaka ni sa lako mai na siga i Karisito.

³Me kua ni dua na ka mo dou na vakaisini kina; ni na sega ni yaco na siga o ya, ka vakavo me so e vuki tani mada, ena qai vakaraitaki mai na tamata i valavala ca, na luve ni dauveivakarusai.

⁴Na dauveisaqasaqa ka vakacerecerei koya vei ira kecega, me vaka sa Kalou ka me qaravi talega, ena dabe tu me vaka sa Kalou ena vale ni Kalou, ka tukuni koya ni o koya na Kalou.

⁵Dou se nanuma tiko beka ni'u sa tukuna oti tiko vei kemudou na veika oqo se dou sa guilecava tale?

⁶Oqo dou sa qai kila na ka sa tarova tiko, me qai vakaraitaki ga mai ena kena gauna.

⁷Na ka vuni ni basu lawa (lewalewa i koya ga) sa cakacaka tiko ena gauna sara ga oqo. O koya ga sa tarova tiko “ me yacova ni sa kau tani yani o koya

⁸Sa na qai vakaraitaki koya mai na dau basu lawa oqo “ na Turaga ena qai vakamai koya ena i cegu ni gusuna, ka vakarusai koya ena rarama ni Nona lako mai.

⁹Na lako mai nei koya na daubasu lawa oqo “ sa cakacaka ga i Setani ena kaukauwa, ena i vakatakilakila kei na veika mana lasutaki,

¹⁰Era na rusa o ira kecega sa vakacalai ka sega ni yalododonu “ ni ra sa sega ni lomana na dina me ra bula kina.

¹¹Oqo na vuna sa tala kina vei ira na Kalou na veika mana vakailasu “ me ra vakabauta kina na ka e sega ni dina.

¹²Me ra na rusa kece kina o ira sa besetaka na dina, ka marautaka ga na veika e sega ni dodonu.

¹³Keitou sa vakavinavinaka tikoga oqo vua na Kalou ena vukumudou, oi kemudou na veiwekani sa kune loloma tiko mai vua na Turaga, baleta na Kalou sa digitaki kemudou sara mai na i vakatekivu, mo dou vakabulai ka vakasavasavataki ena nona Yalo Tabu, ni dou sa vakabauta na dina.

¹⁴Nai tukutuku keitou vunautaka vei kemudou, sa yaco kina na nomudou kacivi kei na kena taukeni na i serau ni noda Turaga o Jisu Karisito.

¹⁵O koya oqo, na veiwekani, mo dou tudei ka taura matua nai vakavuvuli keitou sa vakatavulica oti, mai na vosa keitou tukuna, se nai tukutuku keitou vola yani.

¹⁶Sai koya na Turaga o Jisu Karisito kei na Kalou o Tamada, sa lomani keda ka vakaiyautaki keda ena i yau e sega ni ca rawa, ka qai solia vei keda e dua na i nuinui ena nona loloma.

¹⁷Dou veivakacegui ka veivakadeitaki kemudou vakaikemudou ena vosa kei na cakacaka vinaka kecega.