[44] Cakacaka 20

¹Ni sa malumu sobu na mauwe sa qai kacivi ira vata mai na tisaipeli o Paula me vosa ni veitataunaki kei na vakamoce, a sa biuti ira ka lako ki Masitonia.

²Ena veivanua taucoko e lakova mai e vunau ka vakayaloqaqataki ira na lewe ni lotu,ka yaco sara ki Kirisi.

³Sa tiko e kea me vula tolu. Era buki veretaki koya na Jiu, sa vakarau biubiu kina o koya me soko ki Siria, sa mani nanuma me lako curumi Masitonia.

⁴Sa veitomani kei koya ki Esia o Sopate na kai Peria “ kei Arisitako kei Sekutu na kai Cesalonaika, kei Keio na kai Tapi, kei Timoci

⁵E ratou sa lako rawa e liu nai lala oqo, meratou laki waraki keitou mai Tiroa.

⁶Ia sa biuti Filipai mai na neitou waqa ni sa oti na kana madrai sega ni vaka leveni, oti e lima na siga keitou sa qai kele yani ki Tiroa, ka vitu tale na siga neitou tiko e kea.

⁷Ena Siga Tabu ni dovi madrai era soqoni vata mai na tisaipeli ni vakarau biubiu tiko o Paula me lako ena siga ka tarava, e a vunau vei ira o Paula me yacova yani na bogi levu tutu.

⁸Ena taba vale e cake na vanua e vakayacori kina na soqoni sa cina wavoki ga,

⁹Ni sa vosa tikoga o Paula me lako tikoga nona i vunau e dua na cauravou na yacana o Autiko e dabe tiko ena katuba leka mai cake, ni vakarorogo tiko ena nona i vunau ka sosovu sara tiko, ka sega ni kila ni sa vakanaulu sobu mai nai katolu ni taba vale ka tau ira, ni sa keveti cake sa mate tu.

¹⁰Ia sa lako sobu vua o Paula, tauri koya cake, mokota, ka tukuna vei ira, "Dou kakua ni rarawa sa bula tale o koya!"

¹¹Sa lako cake tale ka dovia na madrai mera kana ka gunu vata ka vunau tale vei ira me yacova na kida ni mataka, ka sa qai lako.

¹²Era sa kauti koya na cauravou oqo ki nodratou ka ra sa marau kina vakalevu.

¹³E lako ga e vanua ki Aso o Paula, oi keitou sa soko e liu ni vinakata o koya me taubale me keitou qai laki sota ga i Aso.

¹⁴Ni keitou sa sota mai Aso keitou sa soko vata sara ki Mitilini.

¹⁵Keitou soko yani ena siga ka tarava keitou sivi Kio kina. Na siga tale ka tarava keitou yacovi Samo kina ka vakaruru e Tauluma, na siga ka tarava keitou kele e Milito.

¹⁶Sa sega ni vinakata tiko o Paula me kele tale na waqa i Efeso ena gauna oqo, ni vakatotolotaka tiko me tiko rawa mai Jerusalemi qai yaco na siga ni Penitiko. Era Sa Vakadreti Na Qase Ni Lotu Mai Efeso

¹⁷Ni sa yacoi Milito sa talatala mera lako mada mai vua o ira na qase ni lotu mai Efeso.

¹⁸Ni ra sa yaco mai vua, sa tukuna vei ira, dou sa kila vinaka nai matai ni siga au yaco mai kina ki Esia, kei na noqu i valavala ena kemudou maliwa ena veisiga kecega.

¹⁹"Au dau tagi vakalevu ena vuku ni ka rarawa edau vakayacori vei au, mai na nodra buki vere ca na Jiu, ia au sa qarava ga na Turaga ena yalo e lokomi;

²⁰Au sega ni dau vunitaka eso na ka e yaga vei kemudou,ia au a wasea ga vei kemudou ni'u sa vunau, au dau curuma talega nomudou dui veivalevale ni'u vakavulici kemudou,

²¹Au sega ni rere me'u tukuna vei ira na Jiu kei ira na kai Kirisi, mera veivutuni ka lesu vua na Kalou ka vakabauta na Turaga o Jisu Karisito.

²²Ia oqo, mo dou raica,sa baci uqeti au tiko oqo na Yalo Tabu me'u lako ki Jerusalemi, au sega ni kila na cava au na la'ki sotava e keya,

²³Ia ena tukuna rawa na Yalo Tabu vei au, na veikorokoro taucoko au na vunau kina, ena waraki au tu mai kina na sinucodo me'u vesu kina kei na veika rarawa tale eso.

²⁴Ia au sega ni dau via suka i muri ena veika walega oqo; ni noqu bula au sega ni dau wilika me ka talei vei au, me'u vakacavara ga vakavinaka na kaci oqo, ena cakacaka kei nai tavi sa solia mai vei au na Turaga o Jisu, me'u vunautaka nai tukutuku vinaka ni nona loloma na Kalou.

²⁵Ka raica, dou a dau raici au ni'u dau lako voli yani vei kemudou ena noqu vunautaka ka vakatavuvulitaka na matanitu ni Kalou, ia sa na vakarau oqo mo dou sega ni raici au tale vakadua.

²⁶Na nomudou mate sa baleti kemudou ga, au sa savasava mai kina.

²⁷Sa sega tale ni dua na ka me'u sega ni tukuna vei kemudou, au sa tukuna taucoko vei kemudou nai tukutuku ni Kalou.

²⁸O koya oqo, mo dou vakaraici kemudou vinaka kei ira kece na qele ni sipi, sa lesi kemudou kina na Yalo Tabu mo dou nodra i vakatawa, dou tubera nai soqosoqo lotu ni Kalou, o ira sa volia o Koya ena Nona dra na luvena.

²⁹Au sa kila tu, ena gauna au na lako tani kina eke, era na basika mai vei kemudou eso na wolifa daukata vakarerevaki, ena sega ni tu vei ira na lomana nai soqosoqo lotu.

³⁰Ena so talega na tamata mai vei kemudou ga, era na tucake mai ka vakatanitaka nai vakavuvuli dina, me ra dreta kina e dua nai wase ni tisaipeli vei ira.

³¹O koya oqo, mo dou sa yadrava tiko, dou nanuma ni tolu na yabaki au sega ni cegu tiko kina noqu dau vakasalataki kemudou, ka salavata tiko na noqu dau masulaki kemudou ena tagi.

³²Ia oqo na veiwekani, au sa na cabori kemudou vua na Kalou me maroroi kemudou ena veimaroroi ni Nona vosa, me rawa ni vakatuburi cake kina nomudou vakabauta, ka mo dou vakaivotavota vata kina kei ira sa tawasei tani tu.

³³Na yaloqu e sega ni bau kocova na siliva se na koula se dua nai sulu.

³⁴Kemudou sa kilai au vinaka, ni liga ga oqo e sotava tiko na noqu kana kei na noqu dau veilakoyaki, e sotavi tale tikoga kina o ira era cakacaka vata tiko kei au.

³⁵"Au tukuna vei kemudou ni tamata e dodonu me cakacaka tiko vakataki au me rawa ni kana kina, mo dou cakacaka mera sotavi kina na dravudravua, dou nanuma na vosa ni Turaga o Jisu, ni tukuna, ena vakalouvinakataki vakalevu sara o koya sa solia, mai vei koya sa taura."

³⁶Ni sa mai tauca oti na nona vosa vei ira, sa qai tekiduru sobu, ka masu vata kei ira vakaduaga.

³⁷Era sa roqoti Paula ka reguci koya ka ra sa veitagici sara vakalevu,

³⁸Era rarawa vakalevu ni tukuna o Paula na nona lako o ya era na sega ni na sota tale vakadua. Era sa qai kauti koya ki waqa me ra la'ki talaci koya kina.