[44] Cakacaka 22

¹"Vei kemuni na veiwekani kei kemuni na qase, dou vakarorogo me'u na tukuni au mada vei kemuni."

²Ni ra sa rogoca ni vosa mai o koya ena vosa vaka Iperiu, era sa vagagalu vakalevu sara sa qai tukuna:

³Oi au na Jiu dina, au a sucu mai Tarisu ena yasana o Silisia, au vuli ga ena koro oqo mai na veivakavulici nei Kamalieli, au vakavulici ena i valavala kei na kena maroroi nai vunau nodra na noda qase, sa dua na ka noqu soli bula vua na Kalou me vakataki kemudou e daidai.

⁴Au vakararawataki ira na lotu me yacova ni ra sa mate, au vesuki ira na tagane kei na yalewa ka'u biuti ira kina vale ni veivesu.

⁵Na bete levu se dua vei ira na matabose e cake e rawa ni vakadinadinataka na ka oqo, ni'u lako vei ira me soli mai kina vei au nai vola ni veivakadonui, baleta ira na lewe ni lotu era tiko mai Tamasiko, me'u vesuki ira mai ena sinucodo, ka kauta mai ki Jerusalemi me ra mai totogitaki.

⁶"E dua na ka e qai yaco, ni siga levu tutu ena noqu taubale tiko ka volekati Tamasiko, ka vakasauri e dua na rarama e lako mai lomalagi sa cila vakavolivoliti au.

⁷"E a vakadavori au kina qele, e dua na domo au qai rogoca ni tukuna, Saula, Saula, na cava o vakacacani Au tiko kina?"

⁸"Au taroga, 'O cei beka oi Kemuni, Turaga?" qai tukuna mai vei au, oi Au o Jisu na kai Nasareci, o koya o sa vakacacana tiko.

⁹O ira na noqui lawalawa era raica dina talega na rarama ka ra sa rere kina, ia era sega ga ni rogoca na domo i Koya e vosa tiko vei au.

¹⁰"Au a tukuna, na cava me'u cakava Turaga?" sa tukuna mai, mo tucake ka lako ki Tamasiko, ena qai tukuni taucoko mai vei iko e keya, na ka o sa kacivi kina.

¹¹Nai serau ni rarama o ya e sega sara ga ni'u rai rawa kina, o ira na noqu i lawalawa era sa qai tuberi au ki Tamasiko.

¹²E dua na tamata o Ananaisa na yacana, e tamata lotu dina me vaka nai vunau, era vakadinadinataki koya na Jiu taucoko ena vanua o ya,

¹³Sa mai tavaki au, ka tucake tu e mataqu, sa tukuna, 'Saula na wekaqu, me rai na matamu.' Ena auwa vata o ya au rai cake ka'u raici koya.

¹⁴Sa tukuna vei au, sa digitaki iko na nodra Kalou na noda qase mo kila na lomana, ka raici koya na Mesaia, mo rogoca talega na vosa e cavuta.

¹⁵O iko mo na dauvunautaki Koya vei ira na tamata kecega ena ka o sa raica ka rogoca.

¹⁶Na cava tale mo waraka? Mo tucake ka papitaiso, me bokoci kina na nomu i valavala ca, ni o sa masuta na yaca ni Turaga.

¹⁷Ena dua na siga ni'u sa lesu tale mai ki Jerusalemi au a laki masumasu tiko kina vale ni soro, au a raica kina e dua na raivotu.

¹⁸Au raici koya ni tukuna vei au, Mo totolo biuti Jerusalemi ni o ira na lewe ni vanua era sega ni vakabauta nai tukutuku Au solia vei iko mo tukuni Au kina.

¹⁹Au a tukuna vua, Turaga, o ira e kila tu ni'u dau vakanakuitaki ira ni ra lotu tiko, au biuti ira ena vale ni veivesu.

²⁰Ena gauna e vakadavei kina na dra ni nomuni tamata o Sitiveni, au duri sara tu ga kina ena noqu tokona na nona mate, au la'ki maroroya talega na nodratou i sulu na vakamatei koya.

²¹"Sa tukuna vei Au, mo biuti Jerusalemi, au na talai iko vakayawa sara ki vei ira na Veimatanitu Tani."

²²Era vakarogoci koya me yacova ni sa oti na nona vosa, era sa qai kailavaka, ka vaka, "Me vakawabokotaki na tamata vaka oqo mai vuravura, ni sa sega ni dodonu me bula tiko!"

²³Era qoqolou ka ra dui basuraka ga na nonai sulu vakataki ira, kei na nodra kaburaka na kuvu ni qele kina mata ni cagi.

²⁴Sa vakarota na kanala me sa kau mada mai o Paula kina i tikotiko ni mataivalu, me tau mada vua nai kuita me na rawa ni tusanaka kina, na vuna era rarawataki koya kina vakalevu na lewe vuqa.

²⁵Ni sa vesu tiko na ligai Paula me vakarau vakanakuitaki, sa tukuna o koya vua e dua na turaga ni valu e duri volekati koya, e dodonu li vei kemudou mo dou kuitataka e dua na kai Roma ni se bera na veilewai?

²⁶Ni rogoca na turaga ni valu na vosa oqo, sa lako sara ga vua na kanala, ka tukuna, "Mo qarauna na ka o via cakava vua na tamata oqo, ni o koya e kai Roma."

²⁷Sa lako mai na kanala ka tarogi koya, "Tukuna vei au, o iko dina na kai Roma?"Sa sauma mai, "io".

²⁸Sa tukuna na kanala, "Kemudou o au, e dua nai lavo levu au vakayagataka me'u wili kina me'u kai Roma." Sa tukuna o Paula, "Ia oi au, au sucu sara ga kina."

²⁹E vakasauri na nodra sa dui taseba o ira vakadua sa lesi tu mera vakanakuitaki koya; o koya talega na kanala sa rere vakalevu ni sa kila o Paula e kai Roma, ni sa mai vesuki koya ni se bera na veilewai.

³⁰Ena siga ka tarava, sa sereki Paula ni sa vinakata me vaqaqa se cava mada na vuna era sevaki koya tiko kina na Jiu, sa vakarota o koya, me kacivi mada mai na bete levu kei ira na matabose e cake, mera rairai mada mai vua, sa kauti Paula mai ka vakatura e matadra.