[44] Cakacaka 24

¹Ni oti e lima na siga, sa basika mai o Ananaiasa na bete levu kei na so na qase ni lotu, kei na dua na loya na yacana o Teritulu, mera mai vakaraitaka vua na kovana na nodra i le me baleti Paula.

²Ni sa kacivi mai o Paula, sa tucake o Teritulu me vakamacala, ka vaka, keimami mai vakila tu oqo na vinaka sa ka ni nomuni vakatulewa, ena kena drodro vinaka tu na veiqaravi ka sa basika na bula sautu, oqo saka nomuni rai yawa na kovana,

³Ena vuku saka ni ka oqo, sa dua na ka neimami vakamuduo levu vei kemuni na turaga cecere saka Filikesa.

⁴Au sa kerei kemuni saka ki na vakabibi, mo ni vosota vakalailai ka rogoca mada na vosa keitou na tauca e matamuni.

⁵Keitou kunea vua na tamata oqo ni dua na dau vakacaca, ka dua e vakaculai ira na Jiu ena veiyasai vuravura taucoko, mera dau vakavunene ena kena saqati na veiliutaki ni matanitu o Roma, o koya e nodra i liuliu na Nasarini.

⁶E vaka dukadukalitaka tiko o koya na vale ni soro ena gauna keitou vesuki koya kina, na neitou lawa sa rawa sara ga me keitou sa lewai koya.

⁷Ia na kanala o Laisiasa kei ira na nona mataivalu, era qai mai kaliraki koya vakaukauwa ena liga I keimami,

⁸Ka vakarota mai o koya me keimami lako mai eke, ni o ni na dikeva vinaka na nona kisi, o ni na qai kila na dina keitou valataka tiko.

⁹Ni vosa oti o Teritulu era tokona kece na Jiu na nona vosa ena nodra vaka io kina.

¹⁰Ni sa gauna i Paula, sa vakatara na kovana me tucake o Paula ka me dua nona vosa, ka vaka, au yalo vakacegu ni'u kila ni sa dua na gauna balavu mai oqo o ni liutaka tiko kina na matanitu oqo, ka dei kina na yaloqu me'u na tusanaki au,

¹¹Kemuni sa rawa ni kila, se bera ni sivia e tini ka rua na siga noqu lako cake ki Jerusalemi me'u la'ki lotu.

¹²Era sega ni raici au me'u vakatubura tiko e dua na veivala, se dua na tiko yavavala ena loma ni vale ni lotu se loma ni koro.

¹³E sega ni dua nai vakadinadina mera kauta mai, me vakaraitaka ni cala na ka era beitaki au kina.

¹⁴Ia au vakatusa vei kemuni saka, me vaka na nodra i valavala o ira sa musuki ira (Nasarini), au sa qarava na nodra Kalou na tamaqu, ka vakabauta na ka kecega sa volai ena i Vunau kei na nodra i vola talega na Parofita.

¹⁵Au vakabauta na Kalou kei ira talega oqo, ni ra na tucake tale mai na mate o ira na yalo dodonu kei ira nai valavala ca.

¹⁶Ena vuku ni ka oqo au dau saga kina ena noqu kaukauwa taucoko, me donu tiko na vakatulewa ni lomaqu vua na Kalou kei ira talega na tamata.

¹⁷Ena vica na yabaki sa oti, au lesu mai kina i Jerusalemi ena noqu kauta mai nai lavo me mai vukei ira na Jiu, ka me'u mai vakacaboi soro talega vua na Kalou.

¹⁸Ni'u cakava tiko na noqu vakasavasavataki ena loma ni vale ni soro, eso na Jiu mai Esia era tu e kea era vakadinadinataka, ka sega mada ga ni dua nai lawalawa e tu volekati au se dua na veivala me yaco.

¹⁹E dodonu me so vei ira o ya mera tiko eke kevaka au cala dina.

²⁰Se mera tarogi na tamata oqo na cala cava sara mada era raica vei au ni'u tucake tu e matadra na nodra matabose cecere (Sanidrini).

²¹Ka vaka vo ga e dua na ka au tukuna ka sega ni dodonu me'u cavuta, ena noqu kailavaka ena matabose cecere o ya, ni ra na tucake tale o ira na mate.

²²Ia ni sa rogoca o Filikesa na nonai vakamacala, e kila vinaka sara tu ga ni sega ni rawa vei ira sa lotu mera vakavuna na vakacaca, sa vakarubeca ga na kisi ni veilewai, ka tukuna, me sa waraki mada ga o Laisiasa na kanala levu me lako mai, au na qai mai vakatauca kina na noqu lewa.

²³Sa mani vakarota vua na turaga ni valu me tauri tiko mada vakavesu o Paula, ia me soli tiko vua na galala ni veika kece, ka me kakua ni tarovi e dua na wekana ni mai sikovi koya, se kau kani loloma vua.

²⁴Ni oti e vica na siga rau sa qai lako mai vei Paula o Filikesa kei na watina o Rusila ka yalewa ni Isireli, sa lakovi o Paula ka mai wasea vei rau nai tukutuku i Jisu Karisito.

²⁵Ni sa wasea vei rau na kena bulataki na yalododonu,na yalo e qaqarauni, kei na lewa dodonu e se bera ni yaco mai, sa domobula o Filikesa ka tukuna, "Mo lako tani sara ga oqo; au na qai kacivi iko tale mai ke sa dua na gauna au galala tale kina."

²⁶E vinakata tale tikoga o koya, me vaqumia vua nai lavo o Paula me sereki kina, ka veitalai tikoga kina o koya, me lako mai o Paula ena vuqa na gauna me rau dau veitalanoa.

²⁷Ni sa oti e dua na yabaki sa mai sosomitaki Filikesa o Posese Vesito; ka sa lewa kina o Filikesa me sa vesu tikoga o Paula, ena nona vinakata me vakalomavinakataki ira tiko kina na Jiu.