[44] Cakacaka 4

¹Ni rau se vosa tiko vei ira na tamata, sa lako mai vei rau o ira na bete, kei na turaga ni vale ni soro, kei ira na Sedusisi,

²Ena nodra cudru katakata, ni rau sa vakavulici ira na tamata ka vunautaka vei ira, na tucake tale i Jisu mai na mate.

³Era sega tale ni wawa ena nodra tauri rau, ka sogoti rau ena loma ni vale ni veivesu,me yacova na mataka baleta ni sa karobo mai na vanua.

⁴E lewe levu vei ira na rogoca nai vunau o ya era sa vakabauta; ka rauta tiko ni ra lewe lima na udolu.

⁵Ni sa yaco mai na siga ka tarava, o ira nodra i liuliu, kei ira na qase, kei ira na vuni vola,

⁶Sa vaka talega kina o Anasa na bete levu, kei Kaiava kei Alekisada, kei ira kecega na wili ena vuvale ni bete levu, era sa soqoni vata yani e Jerusalemi.

⁷Era sa qai biuti rau me rau tucake tu ena kedra maliwa, era sa qai tarogi rau, ena kaukauwa cava, se na yaca cava, drau sa cakava tiko kina na veika oqo?

⁸Sa vakasinaiti o Pita ena Yalo Tabu, me tukuna vei ira "Oi kemudou na nodra i liuliu na tamata kei na nodra qase na Isireli."

⁹"Kevaka mo dou na via vaqaqai keirau se rawa vakacava vua na tamata lokiloki o ya me vakabulai;

¹⁰"Mo dou na kila taucoko sara kei ira kecega na mataqali i Isireli, ni sa yaca i Jisu Karisito na kai Nasareci o koya dou a vakota, na Kalou qai vakaturi Koya cake tale mai na mate, ena Vukuna dou sa raica tu kina na tamata lokiloki ni sa veilakoyaki voli e matamudou e daidai.

¹¹"Sai koya na vatu dou a cata oi kemudou na matai ni vale, sa qai yaco o koya mei vakadei ni tutu ni vale."

¹²"E sega ni dua e rawa me veivakabulai, ni sega tale ni dua na yaca e ruku i lomalagi e soli vua na tamata me bula rawa kina."

¹³Ena nodra sa raica tiko na nodrau yalo qaqa o Pita kei Joni,ni ra sa kila talega e rau sega ni tamata vuli se me bau dua na ka rau kila tu, era sa kurabui sara kina. E dua ga na ka era sa qai vakasamataka rawa ni rau a dau bula vata kei Jisu.

¹⁴Ia ni ra sa raici koya tale na tamata lokiloki, o koya sa vakabulai ni tucake vata tu keirau,sa qai sega ga ni dua na ka mera cavuta rawa.

¹⁵Ia ni ra sa vakaroti rau me rau sa vagalala tani e tuba mai na loma ni vale ni bose,era sa qai veivosaki vakai ira,

¹⁶Era tukuna, "Na cava meda na cakava vei rau na tamata oqo? Ni sa kuruseta na vanua o Jerusalemi nai rogorogo ni cakacaka veivakurabuitaki oqo, na ka oqo sa kilai raraba ka sega ni tabonaki rawa.

¹⁷Ia na gaunisala ga me na tarovi rawa kina nai tukutuku sa tete ka sega ni tarovi rawa tiko oqo, o ya me rau sa na vakaroti me rau kakua tale ni vakatavuvulitaka na yaca i Jisu vua e dua na tamata.

¹⁸Era sa qai kacivi rau mai, ka vakarota sara vakaukauwa vei rau, me rau kakua ni vakatavuvulitaka se cavuta mada ga na yaca i Jisu.

¹⁹Ia e rau sa vosa ka tukuna vei ira, ka vaka, mo ni lewa ga se sa dodonu se sega ena mata ni Kalou, me keirau vakarorogo vei kemuni me kakua vua na Kalou.

²⁰"Ni sa dredre sara vei keirau, me keirau galuvaka na veika keirau sa raica ka vakadinadinataka."

²¹Ni sa yabaki vasagavulu vakacaca na tamata, sa yaco vua na cakacaka veivakurabuitaki levu oqo.

²³Ni rau sa lako yani e rau sa vakadodonu sara kivei ira na nodrau i tokani, e rau tukuna kece na ka era vosataka vei rau o ira na bete levu kei ira na qase.

²⁴Ni ra sa rogoca, era sa yalovata mera sa masuta na Kalou, ka vaka: Kemuni na Turaga, oi Kemuni na Kalou, o ni a bulia na lomalagi kei na vuravura ka vaka talega kina na waitui, kei na ka kecega sa tu kina,

²⁵O Tevita na Nomuni tamata o ni a tauca e gusuna me tukuna: Sa daucudru na veimatanitu ena vuku ni cava, kei ira na tamata era sa bukia na ka ca?

²⁶"Era sa tuvai valu na tui kei vuravura, kei ira na veituraga era sa soqoni; vata mera valuti Jiova kei na Nonai Lumuti.

²⁷O Eroti kei Ponitio Pailato vata kei ira na kai matanitu tani kei ira na Isireli, era sa vakasoqoni vata mera ia dina nai valu ena nodra saga, mera valuta na Luvemuni Yalosavasava o Jisu.

²⁸Era na sega ni rawa me tarova, na ka o ni sa nakita oti tu mai mera na vakayacora.

²⁹"Oqo, Turaga, mo ni raica mada na nodra sa tuvai valu tiko mai, mo ni solia kivei ira na Nomuni talatala na yalo e qaqa, me rawa ni ra tukuna vakadoudou kina na Nomuni vosa,

³⁰"Ka me dodo tale tikoga na ligamuni sa dau veivakabulai, me vakayacori kina na veivakatakilakila eso kei na ka e veivakurabuitaki ena yaca ni luvemuni Yalosavasava o Jisu."

³¹Ni sa oti na nodra masu, sa vakayavalati na vale taucoko era sa tiko kina; era sa duivakasinaiti kecega ena Yalo Tabu,era sa tukuna kina na vosa ni Kalou ena yalo e qaqa.

³²O ira kecega sa lotu tiko oqo era sa yalovata ka lomavata; sa sega ni dua me tukuna na ka e nona me nona duadua ga, ia sa nodra kece.

³³Ni ra vunautaka nai apositolo na nona tucake tale mai na mate na Turaga o Jisu, sa duatani na kaukauwa sa laurai vei ira, kei na kena sa sobuti ira taucoko tu na veilomani dina.

³⁴Sa sega ni qai dua vei ira me vakaloloma ni liga lala; vei ira na tiko nona tiki ni qele era volitaka, ka vaka talega kina eso e volitaki nona vale, na kenai sau era kauta vata mai;

³⁵Ka mai tauca kina yavadra nai apositolo era sa qai veiwaseyaka vei ira na vakaloloma ka liga lala.

³⁶O Josese era sa vakatoka nai apositolo me o Panapasa, (na kenai balebale a luve ni dauveivakacegui), o koya mai na yavusa i Livai ka lewe ni vanua mai na yanuyanu o Saipurusi,

³⁷E tiko e dua na nona qele, ka sa volitaka, na kena i lavo sa qai kauta mai ka mai biuta e yavadra nai apositolo.