[5] Vakarua 6

¹"Oqo nai vakaro kei na i lesilesi kei na lewa, sa solia o Jiova na nomuni Kalou mo ni vakavulici kina, mo ni muria ena vanua o ni sa na takosova mo ni taukena,

²"Mo ni rerevaki Jiova na nomuni Kalou, Mo ni maroroya kecega na Nona i lesilesi kei na Nona i vakaro au sa vakarota vei kemuni kei ira na luvemuni kei ira na makubumuni, ena veisiga kece ni nomuni bula, mo ni na bula vakadede kina.

³"Oqo mo ni rogoca na Isireli, mo ni qarauna ka muria na vosa ni Kalou, me rawa ni vinaka kina veikemuni, mo ni vakalewevuqataki kina, me vaka sa yalataka oti veikemuni o Jiova na nodra Kalou na nomuni qase “ 'Ena vanua sa drodro kina na sucu kei na oni.'

⁴"Mo ni rogoca na Isireli, o Jiova na noda Kalou, o Jiova sa dua ga!

⁵"Mo ni lomani Jiova na nomuni Kalou ena yalomuni taucoko, ena lomani taucoko kei na nomuni kaukauwa taucoko.

⁶"Na vosa au sa vakarota vei kemuni e daidai, me tikoga ena yalomuni.

⁷"Mo ni vakavulica sara vakavinaka vei ira na luvemuni, mo ni tukuna tiko vei ira ni o ni sa tiko mai vale, ni o ni sa lako talega ena sala, ni o ni sa davo koto kei na nomuni sa duri cake talega.

⁸"Me vesuki talega ena liga me i vakatakitakila ena yadre talega ena maliwa ni mata.

⁹"Me volai ena duru ni katuba ni nomuni veivale kei na nomuni matamata talega.

¹⁰"Ena gauna sa na kauti kemuni kina o Jiova na nomuni Kalou ki na vanua sa solia vei kemuni, na vanua sa yalayala kina vei Eparama, Aisake kei Jekope, me solia vei kemuni na vanua levu ka rairai vinaka na kena veikoro, na veikoro o ni a sega ni tara,

¹¹"Na veivale sa sinai kina na veika vivinaka o ni a sega ni buno kina, na vei mata ni wai vinaka, o ni a sega ni kelia, na veivaini kei na vei olive o ni a sega ni tea”o ni sa kania ka mamau ”

¹²"Mo ni qarauna, de o ni qai guilecava na Kalou o Jiova, o koya sa kauti kemuni tani mai Ijipita, mai na vale ni veivakabobulataki.

¹³"Mo ni rerevaki Jiova na Nomuni Kalou, ka qaravi koya ka yalayala tiko ena vukuni yacana.

¹⁴"Mo ni kua ni lakovi ira na Kalou tani, na nodra Kalou na tamata era sa tiko vata kei kemuni

¹⁵"(Ni sa Kalou vuvu o Jiova na nomuni Kalou o Koya sa tiko vata kei kemuni), de qai tarai kemuni na cudru ni Kalou o Jiova ka vakarusai kemuni mai na matai vuravura.

¹⁶"Mo ni kakua ni vakatovolei Jiova na nomuni Kalou, me vaka o ni a vakayacora vua mai Masa.

¹⁷"E dodonu mo ni qarauna ka maroroya vakavinaka nai vakaro kece i Jiova na nomuni Kalou, na Nona i tukutuku kei na Nona i lesilesi o koya sa vakaroti veikemuni.

¹⁸"Mo ni cakava talega na veika e dodonu ka vinaka ena matai Jiova, me vinaka kina veikemuni, mo ni lako kina ka taukena na vanua sa yalayala kina o Jiova vei ira na tamamuni,

¹⁹"Me ra cemuri kina na meca kece sa tu e matamuni, me vaka sa vosa kina o Jiova.

²⁰"Ni ra sa tarogi kemuni o ira na luvemuni ena veisiga mai muri ka vaka: 'Na cava nai balebale ni tukutuku, lesilesi kei na lewa sa vakarota veikemuni na Kalou o Jiova?'

²¹"Mo ni qai tukuna vei ira: 'Keimami a bobula nei Fero mai Ijipita, ka sa kauti keimami tani mai kea o Jiova ena ligana kaukauwa;

²²'Sa vakatakila o Jiova nai vakatakilakila ena matai keimami, sa levu ka ca sara ena matadra na kai Ijipita, vei Fero kei na nona vuvale.

²³'Sa kauti keimami tani mai kea, me keimami curu mai ki ke, ka solia vei keimami na vanua sa bubului kina vei ira na neimami qase.

²⁴'Sa qai vakarota vei keimami o Jiova me keimami muria nai lesilesi kece oqo, me keimami rerevaki Jiova me keimami vinaka kina, me maroroi ka vakabulai keimami tiko, me yacova mai oqo.

²⁵'Sa dodonu kina vei keda, meda qarauna vakavinaka na noda muria nai vakaro kece oqo ena mata ni Kalou, me vaka sa vakarota vei keda o Koya.'