[21] Dauvunau 3

¹Ki na veika kecega sa tu na kena gauna, Na gauna kei nai naki ena ruku i lomalagi:

²Na gauna me sucu kina e dua, Na gauna me mate kina e dua; Na gauna ni teitei, Na gauna me tamusuki kina na ka sa tei;

³Na gauna ni veivakamatei, Na gauna ni veivakabulai; Na gauna ni basubasu Na gauna ni tara cake;

⁴Na gauna ni tagi, Na gauna ni dredre Na gauna ni tagi vakararawa Na gauna ni veimeketi;

⁵Na gauna ni bini vatu, Na gauna ni tala vatu, Na gauna ni veimokoti Na gauna me oti kina na veimokoti;

⁶Na gauna ni solia; Na gauna ni kumuna Na gauna ni maroroya, Na gauna ni kena kau tani na ka sa maroroi;

⁷Na gauna ni dresudresu, Na gauna ni culacula; Na gauna ni veigaluvi Na gauna ni veivosaki;

⁸Na gauna ni veilomani, Na gauna ni veicati; Na gauna ni valu, Na gauna ni sautu.

⁹Na cava na kena yaga vua na tamata na ka sa dau cakacaka kina o koya?

¹⁰Au sa raica oti na ka sa dausolia na Kalou me na vakacegui ira kina na luve ni tamata.

¹¹Na Kalou sa cakava vakarairaivinaka na ka kecega, ena kena gauna talega. Sa biuta na sega ni mudu ki na yalo ni tamata, sa sega kina na tamata sa raica rawa na ka sa cakava na Kalou mai na i vakatekivu ka yacova nai vakataotioti.

¹²Au sa kila, ni sa sega tale na ka e vinaka cake ena kena oqo, o ya me reki tikoga na tamata ka caka vinaka ni se bula tiko,

¹³Kei na tamata talega me gunu ka kana, ka rekitaka na vinaka ni nona cakacaka “ oqori sai solisoli ga ni Kalou.

¹⁴Au sa kila ni veika kece e cakava na Kalou, sa talei ka sega ni mudu. Sa sega na ka me vakuri kina Sa sega talega na ka me kautani mai kina. Sa cakava kecega oqo, me rere tiko kina vei koya na tamata.

¹⁵Na veika sa oti, kei na veika sa vo tu me vakaoti, Na Kalou sa vinakata me raica nai tukutuku ni veika sa caka oti. Sa Yaco Tikoga Na Veika Sa Sega Ni Dodonu Me Yaco

¹⁶Au sa raica ena ruku i matanisiga oqo; Ena i tikotiko ni veilewai, sa tiko talega kina nai valavala e ca; Ena vanua ni cakacaka dodonu, sa tiko talega kina na cakacaka e ca.

¹⁷Au sa tukuna ki na yaloqu, "Na Kalou ena lewai ira na dodonu kei ira na ca, ni sa na dua na gauna ni vei i naki kecega kei na vei cakacaka kecega."

¹⁸Au sa tukuna ki na yaloqu, "Baleta na ka era sa taukena na luve ni tamata, sa vakatovolei ira na Kalou, me rawa ni ra raica, me ra kila talega, ni ra sa vaka ga na manumanu."

¹⁹Na ka sa dau yaco vei ira na tamata, sa yaco talega vei ira na manumanu; sa mate e dua, sa mate talega o koya ka dua. E rau sa cegu ruarua. Sa sega kina ni uasivi na tamata mai na manumanu, sa ka wale na ka kecega.

²⁰E ra sa lako kecega kina dua na vanua: Era sa lako kecega mai na soso Era na lesu tale ki na soso.

²¹O cei sa kila rawa na yalo ni luve ni tamata ni sa lako cake, kei na yalo ni manumanu ni sa lako sobu?

²²Au sa kila ni sa sega tale na ka e vinaka vua na tamata, me marautaka ga na nona cakacaka, oqori na nona i votavota. O cei ena rawata me kauti koya tale mai me mai raica na ka sa cakava oti?