[21] Dauvunau 5

¹Mo yaloqaseqase, ni o sa lako ki na vale ni Kalou; Mo kusarawa ni vakarorogo ka berabera ni vakacabora nai soro ni tamata lialia, ni ra sa sega ni ra kila ni ra sa dau caka ca.

²Mo kakua ni vakatotolo ni vosa, se na yalomu me cavuta vakariri e dua na ka ena mata ni Kalou. Sa tiko mai lomalagi na Kalou, o iko e vuravura; O koya oqo me lailai kina na nomu vosa.

³Na tadra e dau basika ni sa levu tiko na ka e daucaka, Na domo ni lialia sa daukilai ni sa levu na nona vosa.

⁴Ni o sa cakava na yalayala vua na Kalou, mo cakava sara vakatotolo; Sa sega ni dau marautaki ira na lialia o koya. Cakava vakatotolo na ka o sa yalayala kina -

⁵Sa vinaka cake mo kua ni yalayala ka ca ni o sa yalayala, qai sega ni vakayacora.

⁶Kua ni vakatara na vosa ni gusumu me valavala ca kina na yagomu, se mo tukuna vua na talai ni Kalou ni o ya e dua na cala lailai. Na cava me cudru kina na Kalou ena vuku ni nomu ulubale ka vakacacana kina na cakacaka ni ligamu?

⁷Sa levu na tadra sa levu talega na vosa, oqo sa ka wale kecega. Mo rerevaka na Kalou.

⁸Kevaka o sa raica nodra vakalolomataki na dravudravua, na veivaka saurarataki, na vakagolei cala ni lewa kei na dodonu ena vanua, kua ni yavavala kina; ni sa tiko e dua sa levu cake me vakaraici ira na veiliutaki ka lewai ira.

⁹Na vuata ni vanua sa noda kece, na tui vakataki koya sa qaravi mai na vanua;

¹⁰O koya sa lomana na siliva, ena sega ni mamau mai na siliva; se, saga me vakalevui nai yau. Oqo sa ka wale talega.

¹¹Ni sa levu na kakana, Sa levu talega o ira na kana; Sa qai vaka e vei na tubu me nona nai taukei o koya eda vei rai mata vata tiko?

¹²Na nona moce na tamata daucakacaka sa rui kamikamica, Ke sa kana vakalailai se kana vakalevu; Ia, na levu ni nona i yau ena sega ni vakatarai koya me moce.

¹³Sa dua na ka ca levu, au sa raica ena ruku ni matanisiga: Na i yau sa maroroi me vakamavoataki ira na kena i taukei

¹⁴Sa rusa na vutuniyau ena vuku ni vakacalaka; ni sa vakasucuma na luvena sa sega na ka e tu e ligana.

¹⁵Me vaka na nona lako mai ketei tinana, ena lesu luvaiwale tale, me lako, me vaka na nona lako mai; E na sega ni kauta e dua na ka sa cakava, se na ka me taura rawa na ligana.

¹⁶Oqo talega e dua na ca levu - me vaka sara ga na nona lako mai, ena vakatalega kina, na nona lako yani; sa qai cava na kena yaga, ni sa vaka ga na cagi na oca kecega?

¹⁷E na nona veisiga kece, sa kana ena butobuto, Sa levu mai na rarawa na tauvimate kei na cudru.

¹⁸Oqo na ka, au sa raica: Sa vinaka vua e dua me kana ka gunu ka marautaka na nona cakacaka kei na nona oca ena ruku ni matanisiga sa solia vei koya na Kalou, ni sai koya ga o ya na nona i votavota.

¹⁹Ki vei ira kece na tamata sa soli vei ira mai vua na Kalou na vutuniyau kei nai yau, kei na kaukauwa me kana kina, me taura na nona i votavota ka marau tiko ena nona cakcaka “ oqo nai solisoli ga ni Kalou.

²⁰Ni na sega ni tiko vata na lecaika ena veisiga ni nona bula, baleta ni sa maroroi koya tiko na Kalou me osooso tiko ena marau ni yalona.