[17] Eseta 2

¹Ni sa oti na veika oqo, ni sa malumu sobu mai na cudru nei Esirosi na tui, sa qai nanumi Vasiti tale, na ka e cakava kei na veika sa lewai me baleti koya.

²Sa lako mai na nona dauveiqaravi na tui ka tukuna, "Me ra lako mai na goneyalewa matavinaka ka sega ni cala, me qarai e dua vua na tui;

³"Me sa digitaka na tui eso na vakailesilesi e na veiyasana kece me ra vaqara mai na goneyalewa matavinaka ka sega ni cala ka me ra kau mai ki na nodra bure na yalewa ena nona veiqaravi o Eqai na euniki (matanivanua) ni tui, o koya sa dau vakaraici ira na yalewa me soli vei ira na veivakarautaki ni totoka.

⁴"O koya na goneyalewa sa vakalomavinakataka na tui, me ranadi mei sosomi kei Vasiti". Na ka oqo sa vakalomavinakataka na tui, ka sa cakava o koya.

⁵E Susani, sa tiko kina e dua na Iperiu na yacana o Motekai na luvei Jaire, na luvei Simei, na luvei Kisi, na luvei Penijamini.

⁶Sa kau vakabobula o Kisi mai Jerusalemi, o ira vata kei Jekonaia na tui Juta, o koya oqo sa kauta mai vakabobula o Nepukanesa na tui Papiloni.

⁷O Motekai sa susugi Etasa cake mai (oqori o Eseta), na luvei na vugona, ni sa sega o tamana kei tinana. Sa matavinaka ka sega cala o Eseta. Ni rau sa mate o tamana kei tinana, sa susugi koya mai o Motekai me vaka na luvena.

⁸Ni sa rogovaki yani nai rogorogo mai vua na tui, sa levu sara na gone yalewa sa lako mai ki Susani ena veivakarurugi nei Eqai, o Eseta talega sa kau mai ki na vale ni tui ena veivakarurugi nei Eqai na nodra dauniveiqaravi na marama.

⁹Sa vakalomavinakataka na tui o Eseta, sa vesuka na nona veivakadonui; sa solia vakarawarawa na veiqaravi ni veivakarautaki na tui vei Eseta sa vakatalega kina na nona i votavota. E vitu na dauveiqaravi uasivi duadua sa vakarautaki vua mai na vale ni tui, sa soli talega vua na tikina vinaka duadua me vakarautaki koya tiko kina ena nodra vale na marama.

¹⁰O Eseta e se sega ni via vakatakilai koya tiko vei ira na tamata se vei ira na wekana, ni sa vakasalataki koya oti tiko o Motekai me kua ni vakaraitaki koya.

¹¹O Motekai ena veisiga kece, sa dau veilakoyaki voli vakamalua ena mata ni nodra bure na yalewa me kila se sa vakacava tiko o Eseta kei na veika kece me baleti koya.

¹²Sa dau tu na gauna me ra dau lako yadudua yani kina na goneyalewa e na mata ni tui ni sa oti na nodra gauna ni vakavakarautaki, me vaka nai vola vakarautaki ena vuku ni vakavakarautaki, me ono na vula ni lumu mura ka ono na vula ni lumu ka boi vinaka kecega kei na vakavakarau ni veivakarairaivinakataki.

¹³Ni ra sa vakarautaki oti, era sa qai dau lako yadudua vua na tui. Sa dau soli vakayadua vei ira na ka ga era dui gadreva mai na nodra i tikotiko na marama mera kauta ni ra sa lako yani ki vua na tui.

¹⁴Ena yakavi sa dau lako yani na goneyalewa vua na tui ka sa dau qai lesu tale mai ena mataka ki na nodra bure na marama ena veiqaravi nei Sasaqasi na euniki (matanivanua), o koya sa dau qaravi ira na watina lalai na tui. Ena sega ni lesu tale vua na tui e dua na goneyalewa e vakavo kevaka sa vakamarautaka vinaka na tui, ka sa na kacivi koya na tui ena yacana.

¹⁵Ni sa nona gauna me sa lako yani kina o Eseta na luvei Apieli na vugoi Motekai, o koya sa maroroi Eseta me luvena, me lako vua na tui, sa sega na ka e kerea se vinakata, na nona i vakasala ga na dauniveiqaravi ni tui, o Eqai. O Eseta sa vesuka na yalodra o ira kecega sa raici koya.

¹⁶Sa kau vua na tui o Eseta kina vale vakatui ena i ka tini ni vula o Tebeci e nai ka vitu ni yabaki ni veiliutaki nei Esirosi na tui.

¹⁷Sa vinakati Eseta vakalevu cake duadua ga na tui mai vei ira kece na vo ni yalewa, sa kune loloma kei na taleitaki ena mata ni tui o Eseta mai vei ira kece na vo ni goneyalewa; sa vakaisalataki Eseta o Esirosi na tui ena i sala ni ranadi mei sosomi kei Vasiti.

¹⁸Na tui sa vakarautaka e dua na Solevu ni kana, na Solevu ni kana nei Eseta, na Solevu me nodra na vakailesilesi kei ira na dauniveiqaravi; sa kacivaki e dua na siga ni cegu ena yasana taucoko, sa soli talega kina nai loloma me vaka na nona yalovinaka na tui.

¹⁹Ni ra sa soqoni vata ena i karua ni gauna na goneyalewa, sa dabe tiko o Motekai e na matamata ni tui.

²⁰O Eseta e se bera tiko ni vakatakilai koya kei ira na wekana me vaka ga nai vakasala nei Motekai vua, sa dau vakarorogo ga o Eseta vei Motekai ni a susugi koya.

²¹Ena veisiga o ya ni dau dabe tiko o Motekai e na matamata ni vale ni tui, e rua na euniki (matanivanua) ni tui, o Bikacani kei Teresi, na dauqarava na katuba e rau sa cudru sara vakalevu ka rau sa vinakata me rau tara na tui ena ligadrau.

²²Sa kila o Motekai na ka oqo ka vakadewataka vei ranadi Eseta, sa tukuni na ka oqo vua na tui ka sa cavuti kina na yacai Motekai.

²³Ni sa caka na vakatataro ena vuku ni ka oqo, sa vakadinadinataki, ka rau sa laki kunati na dauveiqaravi oqo. Sa volai nai tukutuku e nai vola ni veigauna nai tukutuku oqo ena mata ni tui.