[2] Lako Yani 24

¹Sa vosa o Jiova vei Mosese ka vaka, "Mo lako cake mai vei Jiova, o iko, kei Eroni, kei Natavi, kei Abaiu, kei na vitusagavulu na qase vei ira na Isireli, ka qaravi Au toka mai vakayawa.

²"O Mosese duadua ga me lako cake mai vei Jiova, o ira na kena vo me ra tiko vakayawa mai vei Au, se o ira na tamata me ra lako cake vata kei Mosese."

³Sa lako mai o Mosese ka tukuna vei ira na tamata na vosa kece i Jiova kei na nona lewa kecega. Era sa sauma yani na tamata kecega ena dua ga na domo, "Na vosa kecega sa tukuna o Jiova keimami na cakava."

⁴Sa vola kece o Mosese na vosa i Jiova. Sa tucake ena mataka lailai ka tara e dua na i cabocabo ni soro ena ruku ni ulunivanua kei na tinikarua na duru, me vaka na kedra i wiliwili na yavusa e Isireli.

⁵Sa tala o koya e so na cauravou ni luvei Isireli, me ra la'ki vakacabora na i soro kama ka vakacabora talega nai soro ni veivinakati na bulumakau vei Jiova.

⁶O Mosese, sa taura e veimama ni dra ka biuta ena beseni kei na veimama ni dra sa kaburaki ki na i cabocabo ni soro.

⁷Sa taura na i Vola ni Veiyalayalati o Mosese ka wilika vei ira na tamata ni ra sa vakarorogo tiko. Era sa tukuna lesu mai, "Na veika kecega sa tukuna o Jiova, keimami na cakava ka talairawarawa kina."

⁸Sa taura o Mosese na dra ka kaburaka vei ira na tamata ka tukuna, "Raica na dra ni veiyalayalati sa cakava o Jiova vata kei kemuni me vaka na veivosa kece oqo."

⁹Sa lako cake o Mosese, kei Eroni, kei Natavi kei Abaiu kei ira na vitusagavulu na qase ni Isireli,

¹⁰Era sa raica na Kalou ni Isireli. Ena ruku ni yavana, sa vaka e tuva tu kina na vatu Safaira, sa vaka na lomalagi na kena rarama savasava.

¹¹Vei ira na turaga ni gone ni Isireli sa sega ni tarai ira ena ligana. Era sa raica na Kalou ka kana ka gunu.

¹²Sa tukuna o Jiova vei Mosese, "Lako cake mai vei Au ki na ulunivanua ka tiko kina: Au na solia vei iko nai taba-vatu, na i vunau kei na i vakaro Au sa vola oti mo vakavulica vei ira na tamata."

¹³Sa tucake o Mosese kei Josua na nona i vukevuke, rau sa lako cake ki na ulunivanua ni Kalou.

¹⁴Sa qai tukuna vei ira na qase. "Ni wawa tiko eke me yacova ni keirau sa lesu tale mai. Sa tiko vata kei kemuni o Eroni kei Uri. Kevaka sa kunea e dua na dredre ni bula, me qai lako vei rau."

¹⁵Sa lako cake o Mosese ki na ulunivanua ka sa ubia na ulunivanua e dua na o.

¹⁶Na i ukuuku ni Kalou sa toka vakadua ena Ulunivanua o Sainiai, ka sa ubia tiko na o me ono na siga. Ena i ka vitu ni siga sa kacivi Mosese o Jiova mai na o.

¹⁷Na i rairai ni ukuuku i Jiova sa vaka na yameyame waqa sa kana voli ena ulunivanua ena matadra na luvei Isireli.

¹⁸Sa lako o Mosese ena loma ni o, ka lako cake ki na ulunivanua. Sa tiko ena ulunivanua o Mosese me vasagavulu na siga ka vasagavulu na bogi.