[2] Lako Yani 37

¹O Baselieli sa cakava na kato ena kau akaia; e tolu, tolu na i kava na fiti na kena balavu, rua, dua na i kava na fiti na kena cere.

²Sa boroya ena koula dina na lomana kei na kena e tuba. Sa cakava na koula me veimulomuloci e taudaku.

³Sa va na i tautauri koula ena veitutuna vava. Sa rua ena dua na yasana ka rua tale ena yasana kadua.

⁴Sa caka na kau akaia mei vua ka boroya ena koula dina.

⁵Sa vakacurumi nai vua oqori ki na i tautauri koula sa toka ena tutu ni kato me colati kina na kato.

⁶Sa caka talega na i dabedabe ni yalololoma ena koula dina, me tolu, tolu na i kava na fiti na kena balavu ka rua, dua na i kava na fiti na kena raraba.

⁷Sa rua na kena jerupi caka ena koula dina ka me dua ga na tikina, ka me rau dabe veiqaravi tiko ena i dabedabe ni yalololoma:

⁸dua na jerupi ena dua na yasana ka dua tale na jerupi ena dua tale na yasa. Sa dua ga na tikina e rau veiqaravi tiko ena dela ni dabedabe ni yalololoma.

⁹Na jerupi e rau sa vakateteva yani na tabadrau ka vakaruruga na i dabedabe ni yalololoma ni Kalou. Na jerupi e rau sa veitadravi tiko ka rai tiko vaka ki na i dabedabe ni yalololoma.

¹⁰Sa caka na teveli ni madrai ena kau akaia, sa tolu na fiti na kena balavu, dua veimama na fiti na kena raba, rua, dua nai kava na fiti na kena cere.

¹¹Sa boroi e cake na koula dina, ka sa caka vakavolivolita na koula muloci.

¹²Sa caka talega na i tatarovi vakavolivolita na teveli me vaka na raba ni liga, ka sa muloci talega kina na koula.

¹³Sa biu ena tutu vava ni teveli na i tautauri koula e yavana yadua.

¹⁴Oqo sa tiko voleka ki nai tatarovi, mei curucuru ni i vua me colati kina na teveli.

¹⁵Nai vua sa caka ena kau akaia ka boroi ena koula me colati kina na teveli.

¹⁶Na veiyaya kece ni teveli sa caka ena koula dina; na tere, na bilo na dari lalai kei na bilo titobu mei sovasova.

¹⁷Sa caka talega na i tutu ni cina ena koula dina; oqo sa caka ena i tukituki, na tolona, na tabana, na kena bilo, na kena i vesu kei na kena senikau sa dua vata kecega.

¹⁸Sa lako e na yasana e ono na tabana, e tolu na tabana ena dua na yasana, ka tolu tale ena dua na yasana.

¹⁹Sa tolu na bilo sa vaka na seni amodi, e dua na i ukuuku mokimokiti, dua na senikau ena dua na tabanaOSa vaka kina na tabana onoono.

²⁰Na i tutu ni cina, sa va na bilo vaka na se ni amodi na kena i ukuuku kei na kena senikau.

²¹sa veitaqataqai vakatolu na i ukuuku mokimokiti, me vei raurau vakatautauvata kei na taba onoono sa basika oti mai.

²²Sa tautauvata na kedra i ukuuku ka era sa tuki vata kecega mai na dua na tiki ni koula dina.

²³Sa vitu na kena cina ka koti vinaka na kena vauvau, na kena i dabedabe sa koula dina.

²⁴Sa caka kece oqo era koula dina e dua na taledi.

²⁵Sa caka nai cabocabo ni ka boi vinaka ena kau akaia. Na kena balavu e dua na kiupiti, na kena raba e dua na kiupiti” e veiraurau na yasana vava”rua na kiupiti na kena cere na kedrai leu sa cokotivata me dua na tikina.

²⁶Sa boroi ena koula dina na lomana e taudaku talega kei na i leu e tutuna. Ena yasana taucoko sa muloci kina na koula.

²⁷E rua nai tautauri koula sa toka ena dua na yasana ka rua tale ena dua tale na yasana, oqo mei curucuru ni kau i tautauri me laveti kina na i cabocabo, sa boroi oqo ena koula dina.

²⁸Sa caka na kau i tautauri (vua) ena kau akaia mei lavelave ni kato.

²⁹Sa caka talega na waiwai tabu ni veilumuti, sa ka boi vinaka sara, me vaka na nodra cakacaka na dau caka saluwaki.