[26] Isikeli 13

¹Na vosa i Jiova sa lako mai vei au, ka vaka,

²"Luve ni tamata, mo parofisaitaka na ca vei ira na parofita nei Isireli era ia tiko na parofisai, ka mo tukuna vei ira era ia na parofisai sa vu ga mai lomadra, 'Dou rogoca na vosa i Jiova!'"

³Sa tukuna vakaoqo o Jiova na Kalou: "Ena ca o ira na parofita lialia, era muria na yalodra ka segai na ka era raica!

⁴"Isa i Isireli, na nomu parofita era sa vaka fokisi ni vanua dravuisiga.

⁵"Dou a sega ni cabe cake ki na tikina mo dou tara kina e dua na bai ni vale i Isireli me na tudei rawa ni sa ia nai valu e na siga i Jiova.

⁶"Era sa raica na ka wale kei na vosa mana lasu, ka vaka, 'Sa tukuna vakaoqo o Jiova!' Ia o Jiova e a sega ni talai ira; ia era a nuitaka ni na vakadinadinati na vosa.

⁷"Dou a sega beka ni raica na raivotu wale, ka dou a sega beka ni vosataka na vosa mana lasu? Dou sa tukuna, 'Sa tukuna o Jiova,' ia Au a se bera ni vosa."

⁸O koya oqo sa tukuna kina vakaoqo na Kalou o Jiova: "Baleta ni dou sa cavuta na vosa lialia ka raivotutaka na lasu, o koya oqo Au sa mecaki kemudou kina," sa tukuna na Kalou o Jiova.

⁹"Na Ligaqu ena tarai ira na parofita era sa raivotutaka na ka wale, ka vosataka na vosa mana lasu; era na sega ni tiko ena nodra i soqosoqo na Noqu tamata, se me ra na volai e nai vola ni vuvale i Isireli, se me ra na curu ki na nodra vanua na Isireli. Dou na qai kila ni sai Au o Jiova na Kalou.

¹⁰"Baleta, e dina, baleta ni ra sa vakacalai ira na Noqu tamata, ka tukuna, 'Vakacegu!' ni sega ni vakacegu “ ia e dua sa tara na bai vatu, ka ra sa dregata vata ena drega e uli vakaca “

¹¹"Mo tukuna vei ira era dregata e na drega e uli vakaca, ni na bale ga. Ena tau bi mai na uca ni ualuvu, ia o iko, Uca cevata mata lelevu, mo na tau mai; ka na dua na cava levu ena basuraka.

¹²"E dina, ni sa bale na bai vatu, ena sega beka ni kainaki vei kemudou, 'Sa evei na drega dou a dregata kina?'"

¹³O koya na vosa kina vakaoqo o Jiova na Kalou: "Au na vakavuna e dua na cava levu me liwa yani vakaukauwa ena Noqu cudru; kei na dua uca levu ni ualuvu ena Noqu rarawa, kei na uca cevata mata lelevu ena Noqu cudru levu me vakaotia.

¹⁴"Au na basuraka sobu na bai vatu dou sa dregata ena drega uli vakaca, ka basuka sobu ki na qele, me na sega kina ni tabonaki na kena yavu; ena bale ga, ka dou na vakarusai e loma. Dou na qai kila ni sai Au o Jiova.

¹⁵"Au na vakayacora vakaoqo na noqu cudru ki na bai vatu vei ira talega era dregata e na drega uli vakaca ca; Au na tukuna vei kemudou, 'Sa yali na bai vatu, kei ira talega ka ra dregata,

¹⁶'O ya, o ira na parofita ni Isireli era parofisaitaki Jerusalemi, ka ra raica na raivotu ni vakacegu e na vukuna ni sega na vakacegu,'" sa tukuna o Jiova na Kalou.

¹⁷"E vaka kina, na luve ni tamata, mo vaqara na matamu vei ira na goneyalewa ni kai nomu, era parofisai mai na lomadra ga; mo parofisaitaka na ca vei ira,

¹⁸"Ka kainaka, 'Sa tukuna vakaoqo o Jiova na Kalou, "Ena ca o ira na yalewa era daucula nai vakatakilakila ni dau-vakadraunikau e na liga ni nodra i sulu, ka cakava nai sala ni ulu vei ira na tamata kecega e na kedra dui balavu me ra vakasasa yalo kina! Dou na vakasasataka li na yalodra na Noqu tamata, ka dou na maroroi kemudou mo dou bula?

¹⁹"Dou na vakacacani Au beka ena kedra maliwa Na noqu tamata e na vuku ni dua nai qaluku parile kei na so na tiki ni madrai, ka vakamatei ira na tamata e sega ni dodonu me ra mate, ka vakabulai na tamata e sega ni dodonu me ra bula, e na nomudou lasutaki ira na Noqu tamata ka ra vakarorogo ki na lasu?"

²⁰'O koya oqo sa tukuna kina o Jiova na Kalou: "Raica, Au sa cata na nomudoui vakatakilakila ni vakadraunikau dou sa vakasasa yalo kina maikea me vaka na manumanu vuka. Au na dresuka tani mai na ligamudou, ka sereki ira na yalo me ra lako, na yalodra dou sa vakasasataka me vaka na manumanu vuka.

²¹"Au na dresulaka talega na nomudoui sala, ka vakabulai ira na Noqu tamata mai na ligamudou, ka ra na sega ni tiko tale e na ligamudou me ra vakasavi; ia dou na kila ni sai Au o Jiova.

²²"Ka ni dou a vakararawataka na lomana na yalododonu e na nomudou lasu, ia oi Au, ka'u a sega ni vakararawataka; ka dou sa vakaukauwataka na ligana na tamata ca, me kakua ni lesu mai o koya mai na nonai valavala ca, ni dou sa yalataka vua na bula.

²³"Ia dou na sega kina ni raica tale na ka wale; ka dou na sega talega ni cakava na ka mana lasu: ni'u na kaliraki ira na noqu tamata mai na ligamudou: ia dou na kila ni sai au o Jiova."'"