[26] Isikeli 20

¹Sa yaco e nai kavitu ni yabaki, e nai kalima ni vula, e nai katini ni siga ni vula, era sa lako mai eso na qase ni Isireli me tarogi Jiova, era sa mai tiko e mataqu.

²Na vosa i Jiova sa lako mai vei au, ka vaka,

³"Luve ni tamata, mo vosa vei ira na qase ni Isireli, ka tukuna vei ira, 'Sa tukuna vakaoqo na Kalou o Jiova; "Dou sa lako mai me tarogi Au, ne? Me vaka Au sa bula," sa tukuna na Kalou o Jiova, "Au na sega ni tarogi mai vei kemudou."'

⁴"O na sega li ni lewai ira, luve ni tamata? Mo vakatakila vei ira nai valavala vakasisila ni nodra qase.

⁵"Tukuna vei ira, 'Sa vosa vakaoqo na Kalou o Jiova: "E na siga Au a digitaki ira kina na Isireli, ka laveta cake na Ligaqu e na vukudra na kawa i Jekope, ka vakatakilai Au vei ira e na vanua o Ijipita, ni'u a laveta cake na ligaqu vei ira, ka tukuna, 'Oi Au o Jiova na nomudou Kalou.'

⁶"Ena siga Au a laveta cake kina na Ligaqu vei ira, Me'u kauti ira tani mai na vanua o Ijipita ki na dua na vanua Au a vakaraica me nodra, 'Sa dave kina na sucu kei na o ni.' Na vanua vakaiukuuku vei ira na veivanua kecega.

⁷"Au a qai tukuna vei ira, 'Mo dou dui biuta tani na ka vakasisila ni matamudou, ia mo dou kakua ni vakadukadukalitaki kemudou e na matakau ni Ijipita. Oi Au o Jiova na nomudou Kalou.'

⁸"Ia era sa vuki tani vei Au ka ra bese ni vakarorogo vei Au. Era sega ni dui biuta tani na ka vakasisila ni matadra, ka ra sega ni biuta na matakau ni Ijipita. Au a qai tukuna, 'Au na sovaraka na Noqu cudru vei ira, Me'u vakayacora na Noqu cudru vei ira e loma ni vanua o Ijipita.'

⁹"Ia ka'u a cakacaka ga e na vuku ni yacaqu, me kakua ni vakacacani e matadra na veimatanitu era sa tiko kina kei ira, ka'u a vakatakilai au vei ira e matadra, ni'u a kauti ira tani mai na vanua o Ijipita.

¹⁰"O koya oqo Au a cakava me ra lako tani mai na vanua o Ijipita ka kauti ira ki na vanua liwa.

¹¹"Au a solia talega vei ira na Noqu vunau, ka vakatakila vei ira na Noqu lewa, 'O koya, ke cakava e dua na tamata, ena bula kina.'

¹²"Ia Au a solia talega vei ira na Noqu Siga ni Vakacecegu, me Noqui vakatakilakila vei ira, me ra kila ni sai Au o Jiova ka vakatabui ira.

¹³"Ia sa vuki tani vei Au na vuvale ni Isireli mai na vanua liwa; ka ra sega ni muria na Noqu vunau; ka ra beca na Noqu lewa, 'O koya, ke cakava e dua na tamata, ena bula kina'; ka ra vakacacana sara na Noqu Siga ni Vakacecegu. Au a qai tukuna Ni'u na sovaraka na Noqu cudru vei ira e na vanua liwa, Me'u vakarusai ira.

¹⁴"Ia Au a cakacaka ga e na vuku ni Yacaqu, me kakua ni vakacacani e matadra na veimatanitu tani, Au a kauti ira tani mai e matadra.

¹⁵"Au a mani laveta cake talega na Ligaqu vei ira mai na vanua liwa, Me'u kakua ni kauti ira ki na vanua Au a solia, 'Ka sa dave kina na sucu kei na oni,' oqo e uasivi cake ki na veivanua kecega,

¹⁶"Baleta ni ra a beca na Noqu lewa ka ra sega ni muria na Noqu vunau, ka ra vakacacana na Noqu Siga ni Vakacecegu; ia e na lomadra era sa goleva na nodra matakau.

¹⁷"Ia sa vosoti ira na Mataqu Me'u kakua ni vakarusai ira. Au a sega kina ni vakaoti ira mai na vanua liwa.

¹⁸"Ia Au a tukuna vei ira na luvedra e na vanua liwa lala, 'Mo dou kakua ni muria na nodra vunau na nomudou qase, kakua ni vakabauta na nodra lewa, kakua talega ni vakadukadukalitaki kemudou e na nodra matakau.

¹⁹'Oi au o Jiova na nomudou Kalou: Dou muria na Noqu vunau, mo dou vakabauta na Noqu lewa, ka cakava;

²⁰'Dou vakatabuya na Noqu Siga ni Vakacecegu, ka ra nai vakatakilakila vei Au kei kemudou, mo dou kila ni sai Au o Jiova na nomudou Kalou.'

²¹"E sega ni dina, ka ni ra sa vuki tani vei Au o ira na luvedra; era sega ni muria na noqu vunau, ka ra sega ni yalomatua mera maroroya na Noqu lewa, 'Ia, ke sa cakava e dua na tamata, ena bula kina'; ia era sa vakacacana talega na Noqu Siga ni Vakacecegu. Au a qai tukuna, Au na sovaraka na Noqu cudru vei ira, Me'u vakayacora na Noqu cudru vei ira e na vanua liwa.

²²"Ia Au a tarova na Ligaqu ka cakacaka e na vuku ni Yacaqu, me kakua ni vakacacani e matadra na veimatanitu tani, Au a kauti ira tani mai e matadra.

²³"Au a laveta cake talega na Ligaqu vei ira e na vanua liwa, me'u dui vakasavi ira ki na veimatanitu tani ka duibiubiuti ira ki na veivanua,

²⁴"Ka ni ra sega ni muria na Noqu lewa, ka ra beca na Noqu vunau, ka ra vakacacana na Noqu Siga ni Vakacecegu, ka goleva na matakau ni nodra qase na matadra.

²⁵"O koya oqo Au a solia kina vei ira na vunau e sega ni vinaka, kei na lewa era na sega ni bula kina;

²⁶"Au na vakatokai ira me dukadukali, baleta na ka era vakacabora, ni ra sa vakacabora kecega na ulumatua e loma ni bukawaqa, Me'u vakasavi ira, me ra kila kina ni sai Au o Jiova."'

²⁷"O koya oqo, luve ni tamata, mo vosa vei ira na vuvale i Isireli, ka tukuna vei ira, 'Sa vosa vakaoqo na Kalou o Jiova: "Na ka talega oqo era sa vosavakacacataki Au kina o ira na nomudou qase, ni ra sa talaidredre vakalevu vei Au.

²⁸"Ni'u a kauti ira ki na vanua Au a dulaka cake kina na Ligaqu me'u solia vei ira, era sa qai raica na veiulu-ni-koro cecere kecega, kei na kau rugurugua kecega, era vakacabora maikea na nodra i soro kei na nodra i madrali talega me ra vakacudrui Au kina. Era sa tauca maikea na nodra ka boi vinaka ka sova maikea na nodra i soro laugunu.

²⁹"Au a qai tukuna vei ira, 'Na vanua cecere cava oqo dou sa lakova?' Ia sa vakatokai na yacana o Pama ka yacova na siga oqo."'

³⁰"O koya oqo mo vosa ki na vuvale i Isireli, 'Sa tukuna vakaoqo na Kalou o Jiova: "Dou sa vakadukadukalitaki talega e na nodra i valavala na nomudou qase ka dou sa ia talega na veibutakoci ka muria na nodra ka vakasisila, ne?

³¹"Ka ni dou sa cabora na nomudou i solisoli, ni dou vakacabori ira na luvemudou e loma ni bukawaqa, dou sa vakadukadukalitaki e na nomudou matakau kecega, ka yacova sara na siga oqo. Ia me'u tarogi li oi Au vei kemudou, na vuvale i Isireli? Me vaka Au sa bula," sa tukuna na Kalou o Jiova, "Au na sega ni tarogi mai vei kemudou.

³²"Ia na ka dou vakananuma e na lomamudou ena sega sara ni yaco, ni dou sa tukuna, 'Keimami na vakataki ira na lewe ni veimatanitu tani, kei na veimataqali ni veivanua me keimami qarava na kau kei na vatu.'

³³"Me vaka Au sa bula," sa tukuna na Kalou o Jiova, "E dina e na Liga kaukauwa, kei na Liga e dodo yani, kei na cudru sa sovaraki yani, Au na lewai kemudou.

³⁴"Au na kauti kemudou tani mai na veimata tamata ka vaka soqoni kemudou mai na veivanua dou a dui vakasavi kina, e na Liga kaukauwa, kei na Liga e dodo yani, kei na cudru sa sovaraki.

³⁵"Ia Au na kauti kemudou mai ki na vanua ni veimata-tamata, mai kea Au na ia kina na veilewai kei kemudou ni da veirai mata.

³⁶"Me vaka na Noqu a veilewai kei ira na nomudou qase e na vanua liwa mai na vanua o Ijipita, Au na veilewai vakakina kei kemudou," sa tukuna na Kalou o Jiova.

³⁷"Au na cakava mo dou takosova nai titoko, ka kauti kemudou mai mo dou vauci e na veiyalayalati;

³⁸"Au na wasei ira tani na daube mai na kemudou maliwa, kei ira era talaidredre vei Au; Au na kauti ira tani mai na veivanua era sa dui tiko kina, ia era na sega ni curuma na vanua o Isireli. Dou na qai kila ni sai Au o Jiova.

³⁹"Ia vei kemudou, na vuvale i Isireli," sa tukuna vakaoqo na Kalou o Jiova: "Dou dui la'ki qarava yadua na nona matakau “ emuri talega “ kevaka dou na sega ni vakarorogo vei Au; ka dou kakua ni vakacacana tale na Yacaqu Tabu e na nomudoui solisoli, kei na nomudou matakau.

⁴⁰"Mai na Noqu ulunivanua tabu, e na ulunivanua cecere i Isireli," sa tukuna na Kalou o Jiova, "Mai kea na vuvale kece i Isireli, o ira kece era sa tiko e na vanua, era na qaravi Au; mai kea Au na vinakati ira, maikea talega Au na gadreva na nomudou i soro kei nai sevu ni nomudoui soro, vata kei na veika kecega e vakatabui.

⁴¹"Au na ciqomi kemudou e na nomudoui madrali boi vinaka ni'u na kauti kemudou mai vei ira na veimata-tamata ka vakasoqoni kemudou mai na veivanua dou a dui vakasavi kina; Au na vakarokorokotaki vei kemudou e matadra na veimatanitu tani.

⁴²"Dou na kila ni sai Au o Jiova, ni'u na kauti kemudou ki na vanua oisireli, ki na vanua Au a dulaka cake kina na Ligaqu Me'u solia vei ira na nomudou qase.

⁴³"Ia mai kea dou na nanuma na nomudoui valavala kei na nomudou cakacaka kecega dou a vakadukadukalitaki kina; ka dou na beci kemudou vakataki kemudou e na vuku ni nomudou ca kecega dou sa cakava.

⁴⁴"Dou na kila ni sai Au o Jiova, ni'u a lewa vei kemudou e na vuku ni Yacaqu, ka sega e na vuku ni nomudoui tovo ca, se ena vuku ni cakacaka ca, oi kemudou na vuvale i Isireli," sa tukuna na Kalou o Jiova.'"

⁴⁵Sa baci yaco tale vei au na vosa i Jiova, ka vaka,

⁴⁶"Luve ni tamata, mo rai mada vaka ki na ceva; vunau ki na ceva, ka parofisai ki na vanua veikau, na Ceva,

⁴⁷"Ka tukuna ki na veikau mai na Ceva, 'Mo rogoca na vosa i Jiova! Sa tukuna vakaoqo na Kalou o Jiova: "Raica, Au na tutuvaka na buka vei iko, ia ena kama kina na nomu veikau bulabula kei na kau madu kecega e tu vei iko; ena sega ni bokoci rawa na yameyame ni bukawaqa, ia ena kama kina na matadra kecega mai na ceva me yacova na vualiku.

⁴⁸"Era na raica na ka bula kecega ni o Au, o Jiova, ka vakawaqaca na buka; ena sega talega ni bokoci."'"

⁴⁹Au a qai tukuna, "Ulei Jiova na Kalou! Era sa tukuna vei au, 'E sega beka ni cavuta o koya na vosa vakatautauvata?'"