[26] Isikeli 34

¹Na vosa i Jiova sa lako mai vei au, ka vaka,

²"Luve ni tamata, mo parofisai vei ira nai vakatawa e Isireli, mo parofisai ka tukuna vei ira, 'Sa tukuna vakaoqo na Kalou o Jiova vei ira nai vakatawa: "Ena ca o ira nai vakatawa e Isireli era vakani ira ga vakataki ira! E sega li ni dodonu me ra vakania na qele ni sipi o ira nai vakatawa?

³"Dou kania na uro ka vakasulumi kemudou e na vuti ni sipi; dou vakamatea na sipi uro, ia dou sega ga ni vakania na qele ni sipi.

⁴"O ira na malumalumu dou a sega ni vakaukauwataka, se mo dou a vakabulai ira era a tauvimate, se vadretitaki ira na ramusu, se kauta lesu tale mai na ka e a vakasavi tani, se vakasaqara na ka sa yali; ia ena veivakasaurarataki kei nai valavala e sega ni loloma dou a lewa kina vei ira.

⁵"Sa yaco me ra dui veiseyaki baleta ni sa sega nai vakatawa; ka sa yaco me ra kakana vei ira na manumanu kila ni vanua ni ra sa dui veiseyaki.

⁶"Na noqu sipi era sa sese voli e na veiulunivanua kecega, kei na veidelana yadua; io, na Noqu qele ni sipi era sa veiseyaki e dela i vuravura taucoko, ka sega ni dua me vakataroga se vakasaqarai ira."

⁷'O koya oqo, oi kemudou nai vakatawa, dou rogoca na vosa i Jiova:

⁸"Me vaka Au sa bula," sa tukuna o Jiova na Kalou, "E dina ni sa yaco na Noqu qele ni sipi me kakana vei ira na manumanu kila kecega ni vanua, baleta ni sa sega ni dua nai vakatawa, se me ra vakasaqara na Noqu qele ni sipi o ira na Noqui vakatawa, ia era sa vakani ira vakataki ira ga nai vakatawa ka sega ni vakania na Noqu qele ni sipi"“

⁹'O koya oqo, Isa nai vakatawa, dou rogoca na vosa i Jiova!

¹⁰'Sa tukuna vakaoqo na Kalou o Jiova: "Raica, Au sa veimecaki kei ira nai vakatawa, ia Au na taroga na Noqu sipi e na ligadra; Au na vakavuna me ra kakua ni vakania tiko na sipi, ka ra na sega talega ni vakani ira tiko vakataki ira o ira nai vakatawa; Ni'u na kaliraka na Noqu qele ni sipi mai na gusudra, me kakua ni ra kakana tiko vei ira."

¹¹'Ni sa tukuna vakaoqo o Jiova na Kalou: "E dina oi Au duaduaga Au na vakatarogi ira na Noqu sipi ka vakasaqarai ira yadua.

¹²"Me vaka nai vakatawa sa vakasaqara na nona qele ni sipi e na siga sa tiko kina e na kedra maliwa na nona sipi veiseyaki, Au na vakasaqarai ira vakakina na Noqu sipi ka kaliraki ira mai na veiyasana kecega era sa dui veiseyaki kina e na dua na siga loaloa ka butobuto.

¹³"Au na kauti ira tani mai vei ira na veimatatamata ka vakasoqoni ira mai na veivanua, ka na kauti ira mai ki na nodra vanua; Au na vakani ira e na veiulunivanua i Isireli, e na veibuca kei na veivanua kecega sa tawani tu e na vanua.

¹⁴"Au na vakani ira e na vanua veico vinaka, kei na kedra kakana e na tiko e na veiulunivanua cecere i Isireli. E kea era na davo sobu e na lomanibai vinaka ka kana mai na veico bulabula e na dela ni veiulunivanua i Isireli.

¹⁵"Au na vakania na Noqu qele ni sipi, Au na cakava talega me ra davo sobu," sa tukuna o Jiova na Kalou.

¹⁶"Au na vakasaqara na ka sa yali ka kauti ira lesu mai era sa vakasavi, vadretitaka na ramusu, ka vakaukauwataki koya e tauvimate; ia Au na vakarusai ira sa urouro kei ira na kaukauwa, ka na vakani ira e na cudru."

¹⁷'Ka me vaka vei kemudou, Isa na Noqu qele ni sipi, sa tukuna vakaoqo o Jiova na Kalou: "Raica, Au na vakatulewa e na kedrau maliwa na sipi kei na sipi, e na maliwa ni sipi tagane kei na me tagane.

¹⁸"E lailai beka vei kemudou na nomudou sa kania oti na veico vinaka, mo dou buturaka kina e na yavamudou na vo ni nomudou vanua veico “ ka dou a gunu mai na wai makare, dou qai vakavuvuya na kena vo e na yavamudou?

¹⁹"Ka me vaka ki na Noqu qele ni sipi, era kania na ka dou sa butuka e yavamudou, ka ra gunuva na ka dou sa vakavuvuya e na yavamudou."

²⁰'O koya sa tukuna kina vakaoqo na Kalou o Jiova vei ira: "Raica, oi Au ga Au na vakatulewa e na maliwa ni sipi levulevu kei na sipi lila.

²¹"Baleta ni dou sa veibili e na sarisarimudou kei na tabamudou, ka cumuti ira era malumalumu e na nomudoui leu, ka vakasavi ira vakayawa.

²²"O koya oqo Au na vakabulai na Noqu qele ni sipi, ka ra na sega tale ni biu wale tiko; Au na vakatulewa e na maliwa ni sipi kei na sipi.

²³"Au na vakataudeitaka e dua nai vakatawa me nodra, ka na vakani ira o koya “ na Noqu tamata o Tevita. Ena vakani ira o koya ka na nodra i vakatawa.

²⁴"Oi Au, o Jiova, Au na nodra Kalou, kei na Noqu tamata o Tevita e na turaga e na kedra maliwa; oi Au o Jiova, sa kainaka.

²⁵"Au na cakava e dua na veiyalayalati ni veivinakati kei ira, ka vakavuna me ra lako tani na manumanu kila e na vanua; ka ra na qai tiko vinaka mai na vanua liwa lala ka moce e na veikau.

²⁶"Au na vakayacori ira kei na veivanua vakavolivolita na Noqu delana me ka ni veivakalouvinakataki; Au na vakavuna me tau mai na uca e na kena gauna; ena tau mai na uca ni veivakalouvinakataki.

²⁷"Na vu-ni-kau ni vanua era na qai vuataka na vuana, ia o vuravura ena vuataka vakalevu na kena vuata. Era na tiko vinaka e na nodra vanua; ka ra na kila ni sai Au o Jiova, Ni'u sa gutuva nai vau ni kedra i vua ka sereki ira mai na ligadra era a vakabobulataki ira.

²⁸"Ka ra na sega ni yaco tale me kedra kakana na veimatanitu, se me ra tilomi ira o ira na manumanu kila ni vanua; ia era na tiko vinaka ga, ka na sega ni dua me vakarerei ira.

²⁹"Au na vakatubura vei ira e dua na were e na rogo, ka na sega tale ni kani ira na viakana levu e na vanua, se vakamaduataki tale vei ira na veimatanitu tani.

³⁰"Era na kila vakaoqo ni sai Au, o Jiova na nodra Kalou, Au sa tiko vata kei ira, kei ira, na vuvale i Isireli, era sa Noqu tamata," sa tukuna na Kalou o Jiova.'"

³¹"Oi kemudou na Noqu qele ni sipi, na qele ni sipi ni Noqu vanua veico, dou sa tamata ga, ia Au sa nomudou Kalou," sa tukuna na Kalou o Jiova.