[26] Isikeli 42

¹Sa qai kauti au yani o koya ki na loma ni rara e tautuba, e na sala vaka ki na vualiku; ka kauti au ki na veivale e veibasai kei na rara e tawasei, ka veibasai talega kei na vale e tiko vaka ki na vualiku.

²Vakaraica na kena balavu, o koya e dua na drau na kiupiti (na kena raba e lima-sagavulu na kiupiti), e tiko kina na katuba ki na vualiku.

³E veibasai kei na rara eloma ka ruasagavulu na kiupiti, ka veibasai kei na raravatu ni rara e taudaku, na varada era veitaravi ena veitaba vale e tolu.

⁴E na mata ni veivale, vaka ki loma, e dua nai gagade e tini na kiupiti na kena raba, me vaka na kena yawa e dua na kiupiti; kei na kena katuba e qara vaka ki na vualiku.

⁵Ia oqo nai taba loma ni vale ecake e rabailailai sobu, baleta na varada e taura vakalevu cake na vanua e nai taba vale e cake mai nai taba vale e ra kei na kena e loma.

⁶Ni ra taba tolu ka sega ni vakaduru e lona me vaka na duru e na rara; o koya o ya e vakalekalekataki kina mai na kena e ra kei na kena veimama mai na buturara ki cake.

⁷Kei na dua na lalaga e taudaku e rau cici vata kei na veivale, e na mata ni veivale ki na rara e tautuba; na kena balavu e limasagavulu na kiupiti.

⁸Na balavu na veivale vaka ki na rara e tautuba e limasagavulu na kiupiti, ia na kena e qara ki na vale ni soro e dua na drau na kiupiti.

⁹E nai taba vale e ra e tiko kina nai curucuru ki na yasana e na tokalau, ni dua e via lako yani kina mai na rara e tautuba.

¹⁰Era tu talega na veivale e na tikina vavaku ni lalaga ni rara vaka ki na tokalau, veibasai kei na rara e tawasei ka veibasai kei na vale.

¹¹E dua nai gagade e matadra talega, kei na kedra i rairai e tautauvata kei na veivale vaka ki vualiku; e tautauvata na kedra balavu kei na kedra raba kei ira na kena vo, kei na kedra katuba kece ni curu yani ka curu mai e vaka na kena lewa.

¹²Ka veitikivi kei ira na katuba ni veivale era qara ki na ceva, ni dua e curuma, e dua na katuba e na mata ni gagade, na sala e tu donuya na mata ni lalaga vaka ki na tokalau.

¹³Sa qai tukuna vei au o koya, "A veivale e na vualiku kei na veivale e na ceva, o ira sa veibasai kei na rara e tawasei, era veivale tabu me ra na dau kania kina nai soro tabu sara o ira na bete era dau torovi Jiova. E kea era na dau biuta kina nai soro tabu sara “ nai soro laukana, nai soro ni valavala ca, kei nai soro ni caka cala “ ni sa tikina tabu o ya.

¹⁴"Ni ra curu kina na bete, me ra kakua ni lako tani mai na tikina tabu ki na rara e tautuba; ia maikea me ra luvata kina na nodra i sulu ni veiqaravi, ni ra sa tabu. Me ra na daramaka nai sulu tani; me ra na qai torova yani na ka e baleti ira na tamata."

¹⁵Ia oqo ni sa oti na nona vakarautaka na vale ni soro e loma, sa kauti mai ki tuba ena sala e qara ki na tokalau, ka vakarautaka kece talega.

¹⁶Sa vakarautaka na yasana ki na tokalau e nai vakarau kau, e lima na drau na kau e na kenai vakarau.

¹⁷E vakarautaka o koya na yasana ki na vualiku, e lima na drau nai vakarau kau mai na kenai vakarau.

¹⁸E vakarautaka o koya na yasana ki na ceva, e lima na drau nai vakarau kau mai na kenai vakarau.

¹⁹Sa lako mai o koya vaka ki na ra ka vakarautaka me lima na drau nai vakarau mai na kenai vakarau.

²⁰Sa vakarautaka o koya e na yasana vava; e lalaga wavoki, e lima na drau na kiupiti na keina balavu ka lima na drau na kena raba, me tawasea na tikina tabu mai na tikina wale.